JOŠUA 13

₁E rile Jošua a sena go tsofala, a le dinyaga-dintsi, Morena a mo raya a re: “Wena o tsofetse, o dinyaga-dintsi. Mme go sa ntse go setse lefatshe le legolo thata le le tshwanetseng go thopiwa. ₂Lefatshe le le setseng ke le: Ke dinaga tsotlhe tsa Bafelesita le tsa Bakesure tsotlhe ₃go tloga kwa nokeng ya Sigore e e fa thoko ga Egepeto go ya kwa nageng ya Ekerone kwa bokone e e balelwang Bakanana e bong naga ya dikgosi tse tlhano tsa Bafelesita ya Gasa le ya Ašetote le ya Ašekalone le ya Gathe le ya Ekerone, le dinaga tsa Baawi ₄kwa borwa. Go setse le lefatshe lotlhe la Bakanana le Meara yo e leng wa Basitone go ya kwa Afeke go ya kwa molelwaneng wa Baamori ₅le lefatshe la Bagebale le Lebanone yotlhe mo ntlheng ya botlhabatsatsi go tloga kwa Baale-Gate fa tlase ga thaba ya Heremone go ya go fitlha kwa Hamathe. ₆Go setse le baagi botlhe ba dithaba go tloga kwa Lebanone go ya kwa metsweding ya metsi a a bolelo. Basitone botlhe ke tla ba leleka fa pele ga Baiseraele. Fela naga ya bone o e abele Baiseraele jaanong ka tengwa go nna boswa jaaka ke go laetse. ₇Jaanong kgaoganya lefatshe le go nna boswa jwa ditso tse di le robongwe le jwa bontlhanngwe jwa lotso lwa ga Manase.”

₈Gonne bontlhanngwe jo bongwe jwa Manase bo amogetse boswa jwa bone mmogo le Barubene le Bagate, jo Moše o bo ba neileng kwa moseja ga Joretane go ya kwa botlhabatsatsi ka fa Moše motlhanka wa Morena a ba neileng ka teng: ₉Go tloga kwa Aroere yo o fa losing lwa noka ya Arenone le motse o o mo gare ga molapo le loboa lotlhe go tswa kwa Meteba go ya kwa Dibone ₁₀le metse yotlhe ya ga Sihone kgosi ya Baamori yo o neng a busa mo Hešebone go ya molelwaneng wa Baamone ₁₁le Gileate le naga ya Bakesure le ya Bamaagatha le thaba yotlhe ya Heremone le Basane yotlhe go ya kwa Salega ₁₂e le puso yotlhe ya ga Oge mo Basane yo o neng a busa mo Ašetharothe le mo Eterei. Ene o ne a setse e le wa masalela a Barefaime, bone Moše o ba bolaile, a ba leleka. ₁₃Fela Baiseraele ga ba a ka ba leleka Bakesure le Bamaagatha, mme Bakesure le Bamaagatha ba ntse ba agile mo gare ga Baiseraele go fitlha letsatsing leno.

₁₄Ke lotso lwa ga Lefi lo le losi fela lo Moše a se kang a lo naya boswa. Ditlhabelo tsa Morena, Modimo wa Iseraele, ke tsone boswa jwa lone jaaka a lo solofeditse.

₁₅Moše a abela lotso lwa Barubene ka fa ditshikeng tsa lone. ₁₆Se ba se abetsweng ke naga e e simologang kwa Aroere yo o fa losing lwa noka ya Arenone le kwa motseng o o mo gare ga molapo le leboa lotlhe go ya kwa Meteba ₁₇le motse wa Hešebone le metse yotlhe ya ona e e mo leboeng: E bong Dibone le Bamothe-Baale le Bethe-Baale-Meone ₁₈le Jahase le Ketemothe le Mefaathe ₁₉le Khiriathaime le Sibema le Serethe-Šahare fa thabeng ya leboa ₂₀le Bethe-Pheore le diphologelo tsa Phiseka le Bethe-Ješimothe ₂₁le metse yotlhe ya leboa le puso yotlhe ya ga Sihone kgosi ya Baamori yo o neng a busa mo Hešebone, yo Moše o mo fentseng mmogo le dikgosana tsa Midiane, e bong Ewi le Rekeme le Sure le Hure le Reba, ba e neng e le dikgosana tsa ga Sihone tse di neng di agile mo lefatsheng le. ₂₂Le Bileame wa moitseanape morwa Beore, Baiseraele ba mmolaile ka tšhaka mmogo le ba ba bolailweng bao. ₂₃Molelwane wa Barubene e ne e le Joretane. Ke jona boswa jwa Barubene ka fa ditshikeng tsa bone; ke yona metse le metsana ya teng.

₂₄Moše a abela lotso lwa Bagate ka fa ditshikeng tsa lone. ₂₅Naga e ba e abetsweng ke Jasere le metse yotlhe ya Gileate le bontlhanngwe jwa lefatshe la Baamone go ya kwa Aroere yo o mo ntlheng ya botlhabatsatsi ya Raba ₂₆le go tloga kwa Hešebone go ya kwa Ramathe-Mitsephe le kwa Betonime le go tloga kwa Mahanaime go ya kwa molelwaneng wa Letebire. ₂₇Mo lebaleng la Joretane ba abelwa metse ya Bethe-Harame le Bethe-Nimera le Sukothe le Safone, mo e leng lesalela la puso ya ga Sihone kgosi ya Hešebone. Molelwane e ne e le Joretane go ya kwa bofelong jwa letsha la Khinerethe kwa moseja ga Joretane ntlheng ya botlhabatsatsi. ₂₈Ke jona boswa jwa Bagate ka fa ditshikeng tsa bone; ke yona metse le metsana ya teng.

₂₉Moše a abela bontlhanngwe jwa lotso lwa Manase; se bontlhanngwe jwa lotso lwa Manase bo se abetsweng ka fa ditshikeng tsa bona ke se: ₃₀Naga ya bone e ne e le Basane yotlhe go simolola kwa Mahanaime, e le puso yotlhe ya ga Oge kgosi ya Basane le metsana yotlhe ya ga Jaire e e mo Basane, metse e le 60; ₃₁le bontlhanngwe jwa Gileate le Ašetharothe le Eterei yona metse ya puso ya ga Oge mo Basane. Ke yona naga ya bomorwa Magire morwa Manase; ke ya bontlhanngwe jwa bomorwa Magire ka fa ditshikeng tsa bone.

₃₂Ke tsona dinaga tse Moše o neng a di ba abela a le kwa mabaleng a Moabe kwa moseja ga Joretane, fa Jerigo ntlheng ya botlhabatsatsi. ₃₃Mme ba lotso lwa ga Lefi Moše a se ka a ba naya boswa. Morena Modimo wa Iseraele ke ene boswa jwa bone jaaka a ba solofeditse.