JEREMIA 35

₁Lefoko le le tlileng kwa go Jeremia le tswa mo Moreneng mo malatsing a ga Joyakime, morwa Josia, kgosi ya Juta, la re: ₂“Yaa kwa losikeng lwa Baregabe, o bue nabo, o ba ise kwa Ntlong ya Morena mo go nngwe ya matlwana, o ba nee weine, ba nwe.” ₃Ka ya ka tsaya Jaasanya, morwa Jeremia morwa Habasinya, le bomorwa-rraagwe le bomorwawe botlhe le losika lotlhe lwa Baregabe; ₄ka ba isa kwa Ntlong ya Morena, mo ntlwaneng ya bomorwa Hanane, morwa Igetalea, monna wa Modimo, e e bapileng le ntlwana ya dikgosana e e fa godimo ga ntlwana ya ga Maaseya, morwa Sadume, modisa wa mojako; ₅banna bao ba losika lwa Baregabe ka ba baya dinkgo tse di tletseng weine la dinwelo pele, ka ba raya ka re: “Nwaang, weine ke e!”

₆Mme ba fetola ba re: “Ga re nwe weine. Gonne Jonatabe, morwa Regabe, rraetsho, o re laetse a re: ‘Lo se ka lwa nwa weine ka gope, lona le bomorwaa-lona. ₇Le gona se ageng ntlo, se jwaleng peo, se tlhomeng tshimo ya moweine le e seng go nna nayo! Mme lo nne mo ditenteng ka malatsi otlhe a lona gore lo tle lo phele malatsi a mantsi mo lefatsheng le lo leng baeng mo go lone.’ ₈Jaanong re utlwile taolo ya ga Jonatabe, morwa Regabe, rraetsho, mo go tsotlhe tse o di re laetseng gore rona le basadi ba rona le bomorwaa-rona le bomorwadia-rona re se ka ra nwa weine ka malatsi otlhe a rona; ₉re se ka ra aga matlo go nna mo go ona; re se ka ra nna le tshimo ya moweine, le tshimo le peo, ₁₀mme re nna mo ditenteng, re utlwa e bile re dira fela jaaka Jonatabe rraetsho a re laetse. ₁₁Jaanong e rile Nebukatenesare, kgosi ya Babele, a tlhaga, a tsena mo lefatsheng, ra re: ‘Tlaang re yeng kwa Jerusalema, re tshabe batlhabani ba Bakalatea le batlhabani ba Basiria.’ Ra tla ra nna jalo mo Jerusalema.”

₁₂Ke fa Lefoko la Morena le tla kwa go Jeremia le re: ₁₃“Morena wa masomosomo, Modimo wa Iseraele, o bua jaana a re: Yaa o ree banna ba Juta le baagi ba Jerusalema o re: ‘A ga lo rate go amogela kgalemelo le go utlwa mafoko a me?’ go botsa Morena. ₁₄‘Mafoko a ga Jonatabe, morwa Regabe, a o a laetseng bomorwawe gore ba se ka ba nwa weine, a a tshegediwa; ga ba ise ba nwe weine go fitlha letsatsing la kajeno. Gonne ba utlwa taolo ya ga rraabo. Mme nna ke buile le lona ka tlhoafalo, mme ga lo a ka lwa nkutlwa. ₁₅Kana ke lo rometse baporofeti, batlhanka ba me botlhe, ka tlhoafalo, ka lo raya ka re: A ko lo boe, mongwe le mongwe mo tseleng e e bosula ya gagwe, lo siamise ditiro tsa lona! Se lateleng medimo e sele go e direla! Foo lo tla nna mo nageng e ke e lo fileng le borraeno. Mme ga lo a ka lwa sekega ditsebe le e seng go nkutlwa. ₁₆Ee, bomorwa Jonatabe, morwa Regabe, ba tshegeditse taolo ya ga rraabo e o e ba laetseng. Mme morafe o, ona ga o nkutlwe.’ ₁₇Jalo ge, Morena, Modimo wa masomosomo, Modimo wa Iseraele, o bua jaana a re: ‘Bonang, ke tla tlisetsa Juta le baagi ba Jerusalema dikotlo tsotlhe tse ke ba bopetseng ka tsona. Gonne ke buile le bone, mme ga ba a ka ba utlwa; ka ba bitsa, ba se ka ba araba.’ ”

₁₈Mme Jeremia a raya boora Regabe a re: “Morena wa masomosomo, Modimo wa Iseraele, o bua jaana a re: ‘E re ka lo utlwile taolo ya ga Jonatabe rraeno, lwa tshegetsa ditaolo tsotlhe tsa gagwe, lwa dira fela jaaka a lo laotse,’ ₁₉ke ka moo Morena wa masomosomo, Modimo wa Iseraele, a buang jaana a re: ‘Jonatabe, morwa Regabe, ga a kitla a tlhoka monna wa losika lwa gagwe ka gope yo o ntirelang.’ ”