BAATLHODI 9

₁Abimelege morwa Jerubaale letsatsi lengwe a ya kwa Šegeme kwa go bomalomaagwe, a ya go bua nabo le losika lotlhe lwa ga gabo mogolo a re: ₂“A lo ke lo botse mo ditsebeng tsa batho ba Šegeme botlhe lo re: ‘Se se molemo mo go lona ke eng? A ke go busiwa ke banna ba le 70 bomorwa Jerubaale botlhe, kampo go busiwa ke monna a le mongwe? Le gona lo gakologelwe fa ke le lesapo la lona le nama ya lona.’ ” ₃Ke fa bomalomaagwe ba ya go bua mafoko aotlhe ao ka ga gagwe mo ditsebeng tsa batho ba Šegeme botlhe. Mme dipelo tsa bone tsa ineela Abimelege, ka e le ngwana wa kgaitsadia-bona. ₄Ba mo naya diselefera di le 70 di tswa mo ntlong ya ga Baale-wa-kgolagano. Mme Abimelege a rapa banna ba e seng ba sepe ka tsona ba ba ikgantshang; ba mo sala morago. ₅A ba a ya kwa kgotleng ya ga rraagwe kwa Ofera, a bolaya bomorwa-rraagwe, bana ba ga Jerubaale, banna ba le 70 mo lefikeng le le lengwe, mme ga falola Jothame morwa Jerubaale yo mmotlana, ka a ne a iphitlhile. ₆Jaanong ga phuthega batho ba Šegeme botlhe le ba kago ya phemelo botlhe, ba tla ba dira Abimelege kgosi fa setlhareng sa mooka se se kwa Šegeme, fa go leng lefika la bosupi.

₇E rile Jothame a sena go sebelwa jalo, a ya a ema mo setlhoeng sa thaba ya Gerisime, a tlhatlosa lentswe, a tlhaeletsa, a ba raya a re: “Ntheetseng lona beng ba Šegeme gore Modimo le ona o lo utlwe. ₈Ditlhare di kile tsa bolola go itloletsa kgosi, tsa raya setlhare sa olefa tsa re: ‘Nna kgosi ya rona.’ ₉Mme setlhare sa olefa sa di fetola sa re: ‘A lo a re, ke tlogele monono wa me o Modimo le batho ba o tlotlang mo go nna, ke ye go okama ditlhare?’ ₁₀Ke fa ditlhare di raya setlhare sa feie di re: ‘Tlaya wena, o nne kgosi ya rona!’ ₁₁Mme sa feie sa di fetola sa re: ‘A lo a re ke tlogele botshe jwa me le maungo a a monate a me, ke ye go okama ditlhare?’ ₁₂Ke fa ditlhare di raya moweine di re: ‘Tlaya wena, o nne kgosi ya rona.’ ₁₃Mme moweine wa di fetola wa re: ‘A lo a re, ke tlogele matute a me a a itumedisang Modimo le batho, ke ye go okama ditlhare?’ ₁₄Ke fa ditlhare tsotlhe di raya mosu di re: ‘Tlaya wena, o nne kgosi ya rona.’ ₁₅Mme mosu wa araba ditlhare wa re: ‘Fa lo ntlotsa ka nnete go nna kgosi ya lona, tlayang he lo tshabele mo moriting wa me. Mme fa go sa nne jalo molelo o tla tswa mo mosung, o ja mesetere ya Lebanone.’

₁₆“Jaanong he, fa lo dirile ka boikanyo le ka nnete ka go dira Abimelege kgosi, fa lo diretse Jerubaale le ba lapa la gagwe sentle, fa lo mo diretse tse di tshwanetseng tiro ya diatla tsa gagwe. ₁₇Kana rre o ne a lo tlhabanela, a tsenya bophelo jwa gagwe mo kotsing gore lona lo pholosiwe mo diatleng tsa Bamidiane. ₁₈Mme lona lo tsogetse lelapa la ga rre kajeno, lwa bolaya bomorwawe, banna ba le 70, mo lefikeng le le lengwe, lwa dira Abimelege morwa lelata la gagwe kgosi ya beng ba Šegeme, ka e le wa ga lona. ₁₉Kana ka re: Fa lo diretse Jerubaale le ba lapa la gagwe ka boikanyo le ka nnete ka letsatsi la kajeno, foo itumeleleng Abimelege, mme a le ene a lo itumelele! ₂₀Mme fa go sa nna jalo, a molelo o tswe mo go Abimelege, o je beng ba Šegeme le ba kago ya phemelo; o be o tswe mo go beng ba Šegeme le mo go ba kago ya phemelo, o je Abimelege.” ₂₁Morago ga moo Jothame a thoba a tshabela kwa Beere, a nna teng ka ntlha ya go boifa Abimelege morwa-rraagwe.

₂₂Jaanong e rile Abimelege a sena go busa Baiseraele dinyaga di le tharo, ₂₃Modimo wa romela mowa o o bosula o o lwantshanyang Abimelege le beng ba Šegeme, mo ba bileng ba direla Abimelege ka boikanyologo; ₂₄e le go re tshiamololo e e diretsweng bomorwa Jerubaale ba le 70 le polao ya bone e tle e wele mo go Abimelege morwa-rraabo yo o ba bolaileng; e be e wele mo go beng ba Šegeme ba ba mo thusitseng go bolaya bomorwa-rraagwe. ₂₅Ka moo beng ba Šegeme ba mmeela balaledi mo ditlhoeng tsa dithaba gore ba thukhuthe mongwe le mongwe yo o fetang fa go bone mo tseleng, mme Abimelege a sebelwa tseo.

₂₆Le gona ga tlhaga Gaale morwa Ebete, a na le bomorwa-rraagwe, ba hudugela kwa Šegeme, mme beng ba Šegeme ba mo ikanya. ₂₇Mme ba tswela kwa masimo, ba fula mo masimong a meweine a bone, ba gata maungo a meweine, ba dira moletlo, ba tsena mo ntlong ya modimo wa bone, ba ja, ba nwa, ba hutsa Abimelege. ₂₈Gaale morwa Ebete a ba tlhotlheletsa a re: “Abimelege ke mang, mme rona ba Šegeme re bomang, mo re tshwanetseng go mo direla? A ga se ene morwa Jerubaale, mme Sebule ke kgosana ya gagwe? Direlang banna ba ga Hemore rraagwe Šegeme. Ke ka ntlha ya eng fa rona re tshwanetse go direla ene? ₂₉Ao! Fa nka bo ke busa morafe o, nka bo ke tlosa Abimelege, ke raya Abimelege ke re: ‘Ntsifatsa mephato ya gago, o bolole!’ ”

₃₀Mme ya re Sebule, kgosana ya motse, a utlwa mafoko a ga Gaale morwa Ebete, a tuka bogale, ₃₁a roma barongwi kwa go Abimelege ka sephiri a re: “Bona, Gaale morwa Ebete le bomorwa-rraagwe ba tlile mono Šegeme. Ba bile ba go tsosetsa moferefere. ₃₂Jaanong o tsoge bosigo, wena le batho ba ba nang nao, o ba lalele mo nageng. ₃₃Mme e re mo mosong fa letsatsi le tswa, o phakele, o tlhasele motse. Jaanong fa ene le batho ba ba nang nae ba tswela kwa go wena, o mo direle ka fa mabogo a gago a kgonang ka teng.”

₃₄Abimelege a tsoga bosigo le batho botlhe ba ba nang nae, ba lalela Šegeme ka ditlhopha tse nne. ₃₅Mme ya re Gaale morwa Ebete a tswa a ema fa kgorong ya motse, Abimelege a ragoga le batho ba ba nang nae, ba tswa mo talelong. ₃₆Ya re Gaale a bona batho bao, a raya Sebule a re: “Bona batho ba fologa mo ditlhoeng tsa dithaba.” Mme Sebule a mo raya a re: “O bona meriti ya dithaba wa re ke batho.”

₃₇Gaale a ba a bua gape a re: “Bona, batho ba fologa mo mohubung wa lefatshe, mme setlhopha se sengwe se tswa ntlheng ya mooka wa baroka.”

₃₈Ke fa Sebule a mo raya a re: “Jaanong molomo wa boikgantsho jwa gago o kae o ò buileng ka ona wa re: ‘Abimelege ke mang, mo re tshwanetseng go mo direla?’ A ga se bona batho ba, ba o ba nyaditseng? Jaanong bolola he, o tlhabane nabo!” ₃₉Gaale a bolola, e etelela batho ba Šegeme pele, a tlhabana le Abimelege. ₄₀Fela Abimelege a mo leleka, mme a tshaba fa pele ga gagwe; ga nna ga wa ba bantsi ba ba bolawang go ya go fitlha kwa kgorong. ₄₁Jaanong Abimelege a nna kwa motseng wa Aruma, mme Sebule a leleka Gaale le bomorwa-rraagwe gore ba se ka ba aga mo Šegeme.

₄₂Mme ya re kamoso batho ba tswa ba ya masimo, Abimelege a begelwa jalo. ₄₃Ke fa a tsaya batho, a ba aroganya, a ba dira ditlhopha tse tharo, a lalela kwa nageng. Jaanong fa a bona batho ba tswa mo motseng, a ba wela, a ba bolaya. ₄₄Abimelege a bolola le setlhopha se se nang nae, ba ema fa kgorong ya motse, mme ditlhopha tse pedi tsa bolola, tsa wela botlhe ba ba kwa masimo, tsa ba bolaya. ₄₅Abimelege a tlhabana le motse ka letsatsi lotlhe leo, a thopa motse, a bolaya batho ba ba neng ba le mo go ona, a senya motse, a gasa letswai mo go ona.

₄₆Ya re batho ba ba mo kagong ya phemelo ya Šegeme ba utlwa jalo, ba tsena mo maiphitlhelong a a ka fa tlase ga ntlo ya modimo-wa-kgolagano. ₄₇Ya re Abimelege a sena go begelwa gore batho botlhe ba ba neng ba le mo kagong ya phemelo ya Šegeme ba phuthegetse teng, ₄₈a tlhatlogela mo thabeng ya Salemone, ene le batho botlhe ba ba nang nae; Abimelege a tsaya selepe sa gagwe, a rema letlharapa la setlhare, a le tsholetsa, a le sikara, a raya batho ba ba nang nae a re: “Se lo bonang ke se dira, akofang lo se dire jaaka nna!” ₄₉Ke fa batho botlhe ba rema matlharapa, ba sala Abimelege morago, ba feta ba a baya mo godimo ga maiphitlhelo ale, ba a tshuba godimo ga bale. Ka mokgwa oo batho botlhe ba kago ya phemelo ya Šegeme le bone ba a swa, e ka nna banna ba le sekete ba tlhakanye le basadi.

₅₀Jaanong Abimelege a ya kwa motseng wa Thebese, a o dikanyetsa ka ntwa, a o thopa. ₅₁Mme ga bo go le kago e e godimo ya phemelo mo gare ga motse; banna botlhe ba motse le basadi le beng ba motse botlhe ba tshabela teng, ba tswala fa morago ga bone, ba tlhatlogela kwa godimo ga kago ya phemelo. ₅₂Ke fa Abimelege a tla kwa kagong eo ya phemelo, a e tlhasela, a atamela mojako wa yona gore a e fise ka molelo. ₅₃Mme mosadi mongwe a mo konopa ka tshilwana, ya itaya tlhogo ya ga Abimelege, ya mo thuba logata. ₅₄Ke fa a bitsa mokaba-dibolai wa gagwe ka potlako, a mo raya a re: “Somola tšhaka ya gago, o mpheletse, e se re gongwe ba bua ka ga me ba re: ‘O bolailwe ke mosadi.’ ” A dira jalo, a mo phololetsa, mme a a swa. ₅₅Ya re banna ba Iseraele ba bona Abimelege a sule mongwe le mongwe a ya kwa legaeng la gagwe.

₅₆Modimo wa lefetsa Abimelege bosula jalo jo o bo diretseng rraagwe ka go bolaya bomorwa-rraagwe ba le 70. ₅₇Le gona Modimo wa busetsa bosula jotlhe jwa banna ba Šegeme mo ditlhogong tsa bone. Khutso ya ga Jothame morwa Jerubaale ya ba wela jalo.