BAATLHODI 3

₁Mme ditšhaba tse Morena o neng a di sadisa gore ka tsona a leke Baiseraele botlhe ba ba neng ba sa itse dintwa tsotlhe tsa Kanana, ke tse: ₂(E ne e le ka ntlha ya tlhalefo ya ditshika tsa Baiseraele fela go ba ruta tlhabano; bone fela ba ba neng ba sa e itse pele ga foo.) ₃Ke dikgosi tse tlhano tsa Bafelesita le Bakanana le Basitone le Bahewi botlhe ba ba neng ba agile kwa dithabeng tsa Lebanone go tswa thabeng ya Baale-Heremone go ya go fitlha kwa Hamathe. ₄Tsone tsa sala, e le go leka Baiseraele ka tsone, go tle go bonwe gore a ba tla utlwa ditaolo tsa Morena tse o di laetseng borraabo ka Moše. ₅Jaanong e rile Baiseraele ba ntse ba agile mo gare ga Bakanana le Bahethe le Baamori le Baferesi le Bahewi le Bajebusi, ₆ba tsaya bomorwadia merafe eo go nna basadi ba bone; gape ba neela bomorwa merafe eo bomorwadia-bone, ba be ba direla medimo ya yona.

₇Jaanong Baiseraele ba nna ba dira tse di bosula mo matlhong a Morena, ba lebala Morena, Modimo wa bone, ba direla boBaale le boAšera. ₈Ke fa bogale jwa Morena bo tukela Baiseraele, mme a ba rekisa mo diatleng tsa ga Khušane-Rišathaime, kgosi ya Mesopotamia. Jaanong Baiseraele ba direla Khušane-Rišathaime dinyaga di le robedi. ₉Mme ya re Baiseraele ba lelela Moreneng, a ba tsosetsa mogolodi yo o neng a ba golola, e bong Otheniele, morwa Kenase, monnaa Kalebe. ₁₀Mowa wa Morena wa tsena mo go ene, a siamisa Baiseraele, a bolola go ya mo ntweng, mme Morena a neela Khušane-Rišathaime kgosi ya Mesopotamia mo diatleng tsa gagwe; letsogo la gagwe la fenya Khušane-Rišathaime. ₁₁Mme lefatshe la nna mo kagisong dinyaga di le 40. Ke fa Otheniele morwa Kenase a swa.

₁₂Fela Baiseraele ba boela gape go dira tse di bosula mo matlhong a Morena. Ke fa Morena a tiisa Egelone kgosi ya Moabe gore a ba bogise; ka gonne ba ne ba dira tse di bosula mo matlhong a Morena. ₁₃A ba a iphuthela Baamone le Baamaleke, a ya go itaya Baiseraele, a thopa Motse wa Mekolane. ₁₄Jaanong Baiseraele ba direla Egelone kgosi ya Moabe dinyaga di le 18.

₁₅Mme ya re Baiseraele ba lelela Moreneng a ba tsosetsa gape mopholosi, e bong Ehute, morwa Gera wa Mobenyamene, monna yo o molema. Baiseraele ba ne ba romela lekgetho kwa go Egelone kgosi ya Moabe ka ene. ₁₆Jaanong Ehute a itirela tšhaka e e magale-mabedi ya boleele jwa letsogo, a e tlama ka fa teng ga diaparo tsa gagwe fa seropeng sa le le jang; ₁₇a ba a isa lekgetho kwa go Egelone kgosi ya Moabe. Mme Egelone e ne e le monna yo o nonneng thata. ₁₈Jaanong ya re a sena go gorosa lekgetho, a felegetsa batho ba ba neng ba rwele lekgetho. ₁₉Morago a boa kwa ditshwantshong tsa medimo tse di mo Gilegala, a boela kwa kgosing, a feta a re: “Ke go tletse lefoko la sephiri, wena kgosi.” Ke fa e re: “Didimalang!” Mme botlhe ba ba neng ba eme fa go yona ba tswela kwa ntle.

₂₀Ya re Ehute a tsena kwa go yona, yona ya bo e dutse mo ntlwaneng e e kwa godimo e e tsiditsanyana e e leng ya yona e le yosi. Ehute a re: “Ke go tletse taelo ya Modimo.” Ke fa e nanoga mo sedulong sa yona sa bogosi. ₂₁Mme Ehute a tsenya letsogo la molema la gagwe, a somola tšhaka fa seropeng sa le le jang, a e tlhaba mo mpeng ya yona. ₂₂Ya tsena le mhinyana, wa latela bogale. Mme mafura a bipa bogale, ka a se ka a somola tšhaka mo mpeng ya yona, ya phunyeletsa ka kwa morago. ₂₃Jaanong Ehute a tswela kwa mathuding, a tswala setswalo sa ntlwana e e kwa godimo fa morago ga gagwe, a se lotlela. ₂₄Ya re a sena go tswela kwa ntle, batlhanka ba yona ba tla, ba bona setswalo sa ntlwana e e kwa godimo se lotletswe ba re: “Kooteng e ithomile fela mo ntlwaneng e e tsiditsanyana.” ₂₅Ba e emela sebaka go fitlhelela ba fela pelo, mme ya se ka ya bula setswalo sa ntlwana e e kwa godimo. Jaanong ba tsaya selotlele, ba bula, ba fitlhela morena wa bone a wetse fa fatshe a sule.

₂₆Mme Ehute o ne a falola, ba sa ntse ba diegile jalo, a feta fa ditshwantshong tsa medimo, a tshabela kwa Seira. ₂₇Ya re a sena go fitlha, a letsa lonaka mo dithabeng tsa Eferaime. Ke fa Baiseraele ba fologa nae mo dithabeng, ene a ba eteletse pele. ₂₈Mme a ba raya a re: “Ntshaleng morago, gonne Morena o neetse Bamoabe, baba ba lona, mo diatleng tsa lona.” Ba fologa, ba mo sala morago, ba tseela Bamoabe matsibogo a Joretane, ba sa dumelele ope go tshela. ₂₉Ka nako eo ba bolaya Bamoabe ba e ka nnang ba le 10 000; botlhe e le batlhabani ba ba tiileng, ga se ka ga falola ope. ₃₀Bamoabe ba ne ba kokobediwa jalo ka letsatsi leo fa tlase ga dinao tsa Baiseraele, mme lefatshe la nna mo kagisong dinyaga di le 80.

₃₁Morago ga gagwe ga bo go le Samegare morwa Anathe yo o neng a bolaya banna ba le 600 ba Bafelesita ka lešwane la dipholo. Le ene a golola Baiseraele jalo.