1Mme Ifetha wa kwa Gileate e ne e le mogale, fela e ne e le morwa mosadi wa seaka, a tsetswe ke Gileate. 2Jaanong ya re mosadi wa ga Gileate a sena go mo tsholela bomorwa, mme bomorwa mosadi yoo ba sena go gola, ba leleka Ifetha, ba mo raya ba re: “Ga o a tshwanela go rua boswa mo kgotleng ya ga rraetsho, gonne o morwa mosadi o sele.” 3Ke fa Ifetha a tshaba, a tlogela bomorwa-rraagwe, a nna mo lefatsheng la Tobe. Mme banna ba ba motlhofo ba mo kgobokanela, ba bolola nae.
4Ga tla malatsi a ntwa ya Baamone le Baiseraele. 5Mme ya re Baamone ba tlhabana le Baiseraele, bagolo ba Gileate ba ya go tsaya Ifetha kwa lefatsheng la Tobe, 6ba raya Ifetha ba re: “Tlaya o nne moeteledipele wa rona gore re ye go tlhabana le Baamone.”
7Mme Ifetha a fetola bagolo ba Gileate a re: “A ga se lona ba lo ntlhoileng, lwa nteleka mo kgotleng ya ga rre? A jaanong lo tla kwano go nna, fa lo le mo tlalelong?”
8Bagolo ba Gileate ba raya Ifetha ba re: “Ke ka moo re boetseng kwa go wena jaanong. Mme fa o ya le rona, o tlhabana le Baamone, o tla nna tlhogo ya rona ya baagi botlhe ba Gileate.”
9Mme Ifetha a fetola bagolo ba Gileate a re: “Fa lo mpusetsa kwa gae go ya go tlhabana le Baamone, Morena a ba a nnaya go ba fenya, gona ke tla nna tlhogo ya lona.”
10Ke fa bagolo ba Gileate ba araba Ifetha ba re: “Morena ke moutlwi fa gare ga rona. Ruri, re tla dira ka fa lefokong la gago.” 11Jaanong Ifetha a ya le bagolo ba Gileate, mme morafe wa mo dira tlhogo le molaodi wa ona. Ifetha a ba a bolela mafoko aotlhe a gagwe fa pele ga Morena kwa Mitsepha.
12Jaanong Ifetha a roma barongwi kwa kgosing ya Baamone a re: “O batlang mo go nna fa o tlile go ntlhabantshetsa lefatshe la me?”
13Kgosi ya Baamone ya fetola barongwi ba ga Ifetha ya re: “Kana e rile Baiseraele ba tlhaga kwa Egepeto, ba tsaya naga ya me go tloga nokeng ya Arenone go ya go fitlha kwa go ya Jaboke le ya Joretane. Jaanong e nthebolele, foo ke tla tsamaya ka kagiso.”
14Ifetha a boa a roma barongwi gape kwa kgosing ya Baamone 15gore ba ye go e raya ba re: “Ifetha o bua jaana a re: Ga go a nna jalo, Baiseraele ga ba a tsaya lefatshe la Moabe le e seng la Baamone. 16Gonne e rile Baiseraele ba bolola kwa Egepeto, ba sepela mo sekakeng go fitlha kwa Lewatleng la Motlhaka, ba be ba fitlha kwa Kateše. 17Ke fa Baiseraele ba roma barongwi kwa kgosing ya Etomo ba re: ‘Re letlelele go ralala lefatshe la gago.’ Mme kgosi ya Etomo ya se ka ya dumela. Le gona ba roma kwa kgosing ya Moabe, le yona ya gana. Ke ka moo Baiseraele ba diegileng kwa Kateše. 18Gape ba sepela mo sekakeng, ba potologa lefatshe la Etomo le lefatshe la Moabe, ba tla kwa ntlheng ya botlhabatsatsi ya lefatshe la Moabe, ba thibelela ka kwano ga Arenone, ba se ka ba tsena mo nageng ya Moabe, ka noka ya Arenone e le molelwane wa Moabe. 19Jaanong Baiseraele ba roma barongwi kwa go Sihone kgosi ya Baamori, kgosi ya Hešebone; Baiseraele ba mo raya ba re: ‘A ko o re letlelele go ralala lefatshe la gago go fitlha kwa re yang teng.’ 20Sihone a se ka a dumelela Baiseraele go ralala naga ya gagwe, mme Sihone a phutha morafe otlhe wa gagwe, a thibelela kwa Jahase, a tlhabana le Baiseraele. 21Ke fa Morena, Modimo wa Iseraele, a neela Sihone le morafe otlhe wa gagwe mo diatleng tsa Baiseraele, mme ba ba fenya; Baiseraele ba thopa jalo lefatshe lotlhe la Baamori, ba ba neng ba agile mo lefatsheng leo. 22Ba thopa naga yotlhe ya Baamori go tloga kwa nokeng ya Arenone go fitlha kwa go ya Jaboke le go tloga kwa sekakeng go fitlha kwa Joretane. 23Jaanong he! Morena, Modimo wa Iseraele, o lelekile Baamori fa pele ga Iseraele morafe wa gagwe, mme a wena o a re o ka tsaya naga e? 24A ga ke re, wena o tshwanetse go tsaya naga e o e filweng ke Kamose, modimo wa gago? Le rona re tsaya naga jalo ya mongwe le mongwe yo o lelekilweng ke Morena, Modimo wa rona. 25Mme jaanong a wena o siame go gaisa Balake morwa Siphore, kgosi ya Moabe? A ene o kile a sekisanya le Baiseraele gongwe a tlhabana nabo, 26jale fa Baiseraele ba ntse ba agile mo Hešebone le mo metsaneng ya teng le mo Aroere le mo metsaneng ya teng le mo metseng yotlhe e e mo ntlheng tse pedi tsa Arenone dinyaga di le 300. Ke ka ntlha ya eng fa lo se ka lwa e re amoga ka sebaka seo? 27Nna ga ke a go leofela, mme wena o ntirela bosula ka go tlhabana le nna. A Morena yo e leng moatlhodi a atlhole kajeno fa gare ga Baiseraele le Baamone.” 28Mme kgosi ya Baamone ya se ka ya dumelana le mafoko a ga Ifetha a o neng a a romela kwa go yona.
29Ke fa Mowa wa Morena o tsena mo go Ifetha, mme a ralala naga ya Gileate le ya Manase, a fetela kwa Mitsepha yo o mo Gileate. Go tswa teng a fetela kwa go Baamone. 30Mme Ifetha a ikanela Morena maikano a re: “Fa o ka neela Baamone tota mo diatleng tsa me, 31foo ene yo o tla tswang ka mojako wa ntlo ya me go nkgatlhantsha mogang ke boang kwa go Baamone ka kagiso, e tla nna wa Morena; ke tla mo dira setlhabelo sa phiso.”
32Ifetha a fetela jalo kwa go Baamone go tlhabana nabo, mme Morena a ba neela mo diatleng tsa gagwe. 33A ba fenya go tloga kwa Aroere go ya go fitlha kwa Minithe, a thopa metse e le 20, le go fitlha kwa Abele-Keramime, ya nna phenyo e kgolo thata. Baamone ba kokobediwa jalo fa pele ga Baiseraele.
Morwadia Ifetha
34Mme ya re Ifetha a goroga kwa Mitsepha mo lapeng la gagwe, a rakana le morwadie a tswa mo ntlong go mo kgatlhantsha ka meropana le dipina; mme e ne e le ngwana o esi, go se na ope yo o tsetsweng nae, mosimane kampo mosetsana. 35Ya re a mmona, a ikgagola diaparo a re: “Ijoo, morwadiaka! O nkokobetsa jang! O ntigela mo tatlhegong. Kana ke butse molomo, ka ikanela Morena, mme ga ke kgone go dirolola.”
36Mme morwadie a mo raya a re: “Rra, fa o butse molomo, wa ikanela Morena, dira ka nna ka fa go duleng mo molomong wa gago ka teng, ka Morena a setse a go diretse pusoloso e e tletseng mo babeng ba gago, e bong Baamone.” 37Gape a raya rraagwe a re: “A ke direlwe selo se: Mphe sebaka sa dikgwedi di le pedi, ke ye kwa dithabeng, ke lelele bokgarebe jwa me, nna le balekane ba me.” 38Rraagwe a re: “Yaa,” mme a mo naya tsela kgwedi tse pedi. Morwadie a tsamaya, ene le balekane ba gagwe ba basetsana, a lelela bokgarebe jwa gagwe kwa dithabeng. 39Mme ya re dikgwedi tse pedi di sena go feta, a boela kwa go rraagwe, mme ene a mo direla ka fa maikanong a gagwe a o neng a a ikanne. Mme morwadie a se ka a itse monna. Jaanong ga nna tlwaelo mo Iseraeleng ya gore: 40Ka ngwaga le ngwaga bomorwadia Iseraele ba ya go opelela morwadia Ifetha wa kwa Gileate malatsi a le mane.
