JESAYA 34

₁Lona ditšhaba, atamelang lo utlwe; lona merafe, tlhokomelang! A go utlwe lefatshe le tse di tletseng mo go lone; a go utlwe naga le tsotlhe tse di melang mo go yona! ₂Gonne Morena o bogale le ditšhaba tse tsotlhe; o galefetse masomo otlhe a tsona; o a hutsitse, a a neela mo polaong. ₃Babolawi ba tsona ba latlhwa fela. Direpa tsa bone di tlhatlosa sebodu sa tsona. Dithaba di ela madi a bona. ₄Masomo otlhe a legodimo a tla nyelela. Legodimo le menwa jaaka lokwalo. Masomo otlhe a lone a swaba jaaka go swaba matlhare a moweine, jaaka matlhare a feie a tlhotlhorega mo setlhareng.

₅Bonang, e tla re fa tšhaka ya me e gaketse kwa legodimong, e wele mo go Etomo, mo morafeng o ke o hutsitseng gore e dirafatse katlholo. ₆Tšhaka ya Morena e tletse madi, e tlhamuketse mafura le madi a dikwana le a diphoko le mafura a diphilo tsa diphelehu. Gonne Morena o na le setlhabelo kwa Bosera le polao e kgolo kwa lefatsheng la Etomo. ₇Mme dinare di tla wa natso mmogo le dipholo le dipoo. Lefatshe la bone le tla kgora madi. Naga ya bone e tla nontshiwa ka mafura. ₈Gonne Morena o beile letsatsi la pusoloso le ngwaga wa tefetso, e le go atlholela Sione.

₉Dinoka tsa gagwe di fetoga boka, mmu wa gagwe o fetoga sebabole. Lefatshe la gagwe e tla nna boka jo bo tukang; ₁₀jo bo sa timeng bosigo le motshegare. Musi wa teng o ntse o tlhatloga ka go sa feleng. E tla nna sekaka mo ditshikeng tsotlhe, go se yo o le ralalang ka metlha le metlha. ₁₁Sefudi le setlhong di tla le rua. Morubisi le legakabe di tla nna mo go lone. Mme Morena o tla gagamatsa mogala o o lekanyang le wa serophiso mo go lone, e le go le tobekanya le go le fetola sekaka. ₁₂Batlotlegi ba lone – ga go na bogosi teng jo ba ka bo tlhabelang mokgosi. Dikgosana tsotlhe tsa lone di nyeletse. ₁₃Mitlwa e tla tlhoga mo matlong a borena a lone. Bogopa le tshetlho di tla mela mo dikagong tsa phemelo tsa lone. E tla nna meago ya diphokojwe le lesaka la bontšhwe. ₁₄Dibatana tsa sekaka di tla kgatlhana le diphiri teng. Didimo tsa sekaka di tla kopana gona. Ee, ke teng foo fela kwa sepoko sa bosigo se nnang teng, se iponela boikhutso. ₁₅Mokopa o na le mosima teng, o tsala mae, o a elama, o a thuthusa mo moriting wa ona. Ee, manong a tla kgobokana teng; lengwe le lengwe le kopana le selekane sa lone.

₁₆Tlhotlhomisang mo lekwalong la Morena lo buise: Ga go tlhokafale sepe sa dilo tse. Ga go sephedi sepe se se tlhokang selekane sa sona. Gonne molomo wa me ke ona o o laotseng jalo. Mowa wa gagwe ona o phuthile. ₁₇Ene ka esi o di tlhametse tengwa, seatla sa gagwe sa di abela lefatshe la Etomo ka mogala o o lekanyang. Di tla le rua ka go sa feleng, di nna mo go lone mo ditshikeng tsotlhe.