GENESI 37

₁Jakobe o ne a nna mo lefatsheng le rraagwe a neng a le moeng mo go lone, mo lefatsheng la Kanana. ₂Tse di diragaletseng Jakobe ke tse: E rile Josefa a le dinyaga di le 17, a disa letsomane le bomogolowe – ene a sa le mmotlana – a na le bomorwa Bileha le Silepa, basadi ba ga rraagwe. E ne e a tle e re fa a utlwa tse di bosula ka ga bone, Josefa a di sebele rraabo.

₃Mme Iseraele a rata Josefa bogolo go bomorwawe botlhe, ka e le ngwana wa botsofe jwa gagwe; a mo direla seaparo se seleele se se nang le mabogo. ₄Jaanong ya re bomogolowe ba bona, fa rraabo a mo rata bogolo go bone botlhe, ba mo tlhoa, ba se ka ke ba bua nae ka kagiso.

₅Josefa o kile a lora toro, a e bolelela bomogolowe; ke fa ba mo tlhoa bogolo go pele. ₆O ne a ba raya a re: “A ko lo utlwe ka ga toro e ke e lorileng. ₇Ke lorile re bofa dingata kwa tshimong, ka bona ngata ya me e tsoga e ema, ka bona dingata tsa lona di dikanyetsa ngata ya me, di e ikobela.”

₈Ke fa bomogolowe ba mo raya ba re: “A o a re, o tla nna kgosi ya rona? A tota o rata go re busa?” Mme letlhoo la bone la oketsega ka ntlha ya ditoro tsa gagwe le mafoko a gagwe.

₉A boela a lora toro gape, a e bolelela bomogolowe a re: “Ke lorile toro gape, ka bona letsatsi le ngwedi le dinaledi di le 11 di nkobamela.”

₁₀Ya re a bolelela rraagwe le bomogolowe jalo, rraagwe a mo kgalemela, a mo raya a re: “Toro e ke ya eng e o e lorileng? A o a re, nna le mmaago le bomogoloo re tle tota, re inamele fatshe fa pele ga gago?” ₁₁Bomogolowe ba mo fufegela, mme rraagwe a boloka dilo tseo mo pelong.

₁₂E kile ya re bomogolowe ba ile go fudisa letsomane la ga rraabo kwa Šegeme, ₁₃Iseraele a raya Josefa a re: “A ga ke re, bomogoloo ba fudisa kwa Šegeme? Tlaya, ke go rome kwa go bone.” A mo araba a re: “Ke fano.”

₁₄Jakobe a mo raya a re: “A ko o ye o bone gore bomogoloo ba phela jang, le diruiwa di phela jang; o tle o boe o mpolelele.” A mo roma jalo. Mme Josefa a tloga fa mokgatsheng wa Heberone, a ya a fitlha kwa Šegeme. ₁₅Jaanong monna mongwe a mmona a ntse a kgarakgatshega mo nageng; monna yoo a mmotsa a re: “O batlang?”

₁₆A araba a re: “Ke batla bonkgonne. A ko o mpolelele gore ba fudisa kae?”

₁₇Monna yoo a re: “Ba tlogile fa. Ke ba utlwile ba re: ‘A re yeng kwa Dothane!’ ” Josefa a latela bomogolowe, a ba fitlhela kwa Dothane.

₁₈Jaanong ya re ba mmona a sa le kgakala, a ise a ba atamele, ba mo logela maano a go mmolaya; ₁₉ba raana ba re: “Bonang, rra-ditoro ke yole, o e tla. ₂₀Re tle re mmolaeng, re mo latlhele mo sedibeng sengwe. Re tla re, o jelwe ke sebata. Re tla bona gore ditoro tsa gagwe di tla dirafala jang!”

₂₁Ya re Rubene a utlwa jalo, a mo golola mo diatleng tsa bone a re: “A re se mmolaeng!” ₂₂Rubene a ba a ba raya a re: “Se tsholeleng madi! Mo latlheleng mo sedibeng se se mo sekakeng, mme lo se ka lwa mmolaya.” A re jalo gore a mo golole mo diatleng tsa bone, a mmusetse kwa go rraagwe. ₂₃Jaanong ya re Josefa a sena go fitlha kwa go bomogolowe, ba mo apola seaparo, e bong sele se seleele se se nang le mabogo se a se apereng. ₂₄Ba mo tsaya, ba mo latlhela mo sedibeng. Mme sediba seo sa bo se kgadile, go se na metsi mo go sona.

₂₅Jaanong ba nna fa fatshe, ba ja. Ya re ba tlhatlosa matlho, ba bona go tla lesomo la Baisemaele, ba tswa kwa Gileate. Dikammele tsa bone tsa bo di rwele boroku le ditlhare le ditlolo tse di nkgang monate, ba di isa kwa Egepeto. ₂₆Ke fa Juta a raya bomorwa-rraagwe a re: “Go tla re thusa eng, fa re bolaya monnaa-rona, re loba madi a gagwe? ₂₇A re mo rekiseng mo Baisemaeleng, mme a diatla tsa rona di se ka tsa mmolaya, gonne ke monnaa-rona le nama ya rona.” Bomorwa-rraagwe ba dumalelana nae. ₂₈Jaanong ya re go feta barekisi ba Bamidiane, bomogoloa Josefa ba mo goga, ba mo ntsha mo sedibeng, ba rekisa Josefa mo go Baisemaele ka diselefera di le 20; mme bone ba ya le ene kwa Egepeto.

₂₉Ya re Rubene a boela kwa sedibeng, a fitlhela Josefa a se yo mo go sona. Ke fa a ikgagola diaparo, ₃₀a boela kwa go bomonnawe a re: “Mosimane ga a yo. Mme nna ke tla ya kae?”

₃₁Mme ba tsaya seaparo sa ga Josefa, ba tlhaba phoko, ba ina seaparo mo mading, ₃₂ba se romela kwa go rraabo, ba se fitlhisa mo go ene ba re: “Ke se re se thwetseng. A ko o se sekaseke, o bone gore a ke seaparo sa ga morwao gongwe nnyaya.”

₃₃Ya re a se bona, a re: “Ke seaparo sa ga morwaake. Sebata se mo jele! Ee, ruri Josefa o gagogantswe!” ₃₄Ke fa Jakobe a ikgagola diaparo, a apara lesela la bohutsana lethekeng, a hutsafalela morwawe malatsi a mantsi. ₃₅Bomorwawe botlhe le bomorwadie botlhe ba nanoga, ba re ba mo gomotsa, mme a gana go gomotsega a re: “Nnyaya! Ke tla fologela kwa go morwaake kwa felong ga baswi ke ntse ke hutsafetse.” A mo lelela jalo.

₃₆Jaanong Bamidiane ba rekisa Josefa kwa Egepeto mo go Photifare, modiredi wa ga Farao, tlhogo ya bafemedi ba kgosi.