EKESODU 39

₁Le gona ba ne ba dira diaparo tse di logilweng sentle tsa go direla mo Tempelaneng ka masela a mabududu le a bohibidu jwa bofifadu le a bohibidu jwa madi; ba dira diaparo tse di boitshepo tsa ga Arone jaaka Morena a laetse Moše. ₂Ba dira khiba ka gouta le masela a mabududu le a bohibidu jwa bofifadu le a bohibidu jwa madi le a masweu a a ditlhale-pedi. ₃Ba papetla gouta ya nna letsatsanyana, ba e sega ditlhale go di logela mo maseleng a mabududu le a bohibidu jwa bofifadu le a bohibidu jwa madi le a masweu, e le tiro ya mologi wa masela a a ditshwantsho.

₄Khiba ba e direla dibata tsa magetla tse di tshwaragantsweng; tsa gokelelwa mo go yona mo dintlheng tse pedi. ₅Moitlamo wa yona e ne e le wa lesela le le lengwe nayo, o dirilwe jaaka yona ka gouta le masela a mabududu le a bohibidu jwa bofifadu le a bohibidu jwa madi le a masweu a a ditlhale-pedi, jaaka Morena a laetse Moše. ₆Le gona ba betla majwana a a tlhokegang a šohama, a tsenngwa mo khuparelong ya gouta, a gwaiwa maina a bomorwa Iseraele jaaka go gwaiwa sekano. ₇Ba a gokelela mo dibateng tsa magetla tsa khiba, e le majwana a go gopola Baiseraele, jaaka Morena a laetse Moše.

₈Le gona ba dira kgwatlhana ya sehuba, e le tiro ya setswerere e logilwe jaaka khiba ka gouta le masela a mabududu le a bohibidu jwa bofifadu le a bohibidu jwa madi le a masweu a a ditlhale-pedi. ₉E ne e na le dikhutlo di le nne; ba dira kgwatlhana e pataganye; boleele le bophara jwa yona bo ne bo lekana le seatla, e menagantswe. ₁₀Ba e goma ka methalo e mene ya majwana a a tlhokegang; mo mothalong wa ntlha go tlhomaganye majwana a kareneole le topase le semarage. ₁₁Mo mothalong wa bobedi go le rubine le safire le jasepise. ₁₂Mo mothalong wa boraro go le hiasinte la agate le amethisete. ₁₃Mo mothalong wa bone go le kerisolite le šohama le onikese; a tlapisitswe ka gouta e a huparetse. ₁₄Majwana ao a ne a le some le bobedi ka fa maineng a bomorwa Iseraele; lentswana lengwe le lengwe la bo le na le leina la lotso longwe lwa ditso tse di 12, le kwadilwe ka go gwaiwa jaaka sekano.

₁₅Le gona ba dira dikeetane tse di tshophilweng tsa gouta e e sa pekwang mo kgwatlhaneng, di tshophilwe jaaka megala. ₁₆Ba ne ba dira matshwaro a mabedi a gouta le mefitshane e mebedi ya gouta; ba gokelela mefitshane e mebedi mo dikhutlong tse pedi tsa kgwatlhana tse di kwa godimo. ₁₇Ba gokelela dikeetane tse pedi tsa gouta mo mefitshaneng e mebedi fa dikhutlong tsa kgwatlhana.

₁₈Mme dintlha tse pedi tse dingwe tsa dikeetane tse pedi tseo ba di gokelela mo matshwarong a a gokeletsweng mo dibateng tsa khiba fa pele ga yona. ₁₉Ba dira mefitshane e le mebedi ya gouta gape, ba e gokelela mo dikhutlong tse pedi tse di kwa tlase tsa kgwatlhana fa mafelelong a yona a a potileng ka fa khibeng ka fa teng. ₂₀Ba dira mefitshane e le mebedi ya gouta gape, ba e gokelela mo dibateng tse pedi tsa magetla tsa khiba ka fa pele fa tlase, fa e tshwaragantsweng natso teng fa godimo ga moitlamo wa khiba.

₂₁Ba gokelela kgwatlhana ka mogala o mobududu o o tswang mo mefitshaneng ya yona, o ya kwa mefitshaneng ya khiba gore kgwatlhana e pote ka fa godimo ga moitlamo wa khiba, mme e se ka ya suta, le fa e le go tloga mo khibeng, jaaka Morena a laetse Moše.

₂₂Le gona ba dira kobo e kgolo e e ka fa teng ga khiba, e le tiro ya mologi, e le ya lesela le lebududu gotlhe. ₂₃Ba dira phatlha ya go tsenya tlhogo mo kobong e kgolo e e tshwanang le phatlha ya seaparo sa tshipi sa motlhabani. Phatlha ya yona e ne e na le momeno gore e se ka ya gagoga. ₂₄Le gona ba dira digaranata tsa lesela le lebududu le la bohibidu jwa bofifadu le la bohibidu jwa madi le le lesweu le le ditlhale-pedi mo mafelelong a kobo e kgolo kwa tlase.

₂₅Gape ba dira ditshipinyana tse di lelang tsa gouta e e sa pekwang, ba tlhabakanya ditshipinyana le digaranata fa mafelelong a kobo e kgolo kwa tlase go potologa kobo yotlhe. ₂₆Tshipinyana nngwe le nngwe e ne e bapile le garanata di ntse di tlhabakana mo mafelelong a a kwa tlase a kobo e kgolo, di dikologa jalo; e le tsa go direla mo Tempelaneng jaaka Morena a laetse Moše.

₂₇Le gona ba direla Arone le bomorwawe dihempe tsa masela a masweu tse di logilweng ₂₈le serwalo sa lesela le lesweu le ditlhoro tsa mokgabo tsa lesela le lesweu; le marokgwe a lesela le lesweu le le ditlhale-pedi; ₂₉le moitlamo wa masela a masweu a a ditlhale-pedi le a mobududu le a bohibidu jwa bofifadu le a bohibidu jwa madi, ka mokgwa wa go loga marabata, jaaka Morena a laetse Moše.

₃₀Le gona ba dira papetlana ya serwalo se se boitshepo ka gouta e e sa pekwang, ba kwala mo go yona jaaka go gwaiwa sekano ba re: “O itshepetse Morena!” ₃₁Ba gokelela mogala o mobududu mo go yona gore e tshegediwe kwa godimo mo serwalong jaaka Morena a laetse Moše.

₃₂Tiro yotlhe ya Tempelana ya Tente ya Boipontsho ya fediwa jalo. Baiseraele ba e dirile fela jaaka Morena a laetse Moše, ba e dira jalo.

₃₃Jaanong ba tlisa Tempelana kwa go Moše, e le tente le dilo tsotlhe tsa yona, e bong dikgogetso tsa yona le dipati tsa yona le mephakarego ya yona le maotwana a yona le ditlhako tsa yona; ₃₄le thulelo ya matlalo a diphelehu a a hubiditsweng le thulelo ya matlalo a dintšwa tsa lewatle le lesire le le sirang; ₃₅le Letlole la Tshupo le dithobane tsa lone le sekhurumelo sa thuanyo; ₃₆le lomati le didiri tsotlhe tsa lone le dinkgwe tsa tshupo; ₃₇le setlhomo sa dipone sa gouta e e sa pekwang le dipone tsa sona, dipone di rulagantswe, le didiri tsotlhe tsa sona le mafura a setlhomo; ₃₈le aletare ya gouta le lookwane lwa tlotso le maswalo a tse di nkgang monate le sebipo sa mojako wa Tempelana; ₃₉le aletare ya kgotlho le letloa la kgotlho la yona le dithobane tsa yona le didiri tsotlhe tsa yona le mogopo o o tlhapelang le lekoto la ona; ₄₀le masela a a lepeletseng a lelapa le maotwana a lone le ditlhako tsa ona le sebipo sa kgoro ya lelapa le dithapo tsa lone le dimapo tsa lone le dilo tsotlhe tsa tirelo ya Tempelana ya Tente ya Boipontsho; ₄₁le diaparo tse di logilweng sentle tsa go direla mo Ntlong e e Boitshepo, e bong diaparo tse di boitshepo tsa ga Arone, moperesiti, le diaparo tsa bomorwawe tsa go direla e le baperesiti.

₄₂Baiseraele ba dirile tiro yotlhe fela jaaka Morena a e laetse Moše. ₄₃Jaanong Moše a leba tiro yotlhe, a fitlhela ba e dirile ka fa Morena a laetseng ka teng; ba e dirile fela jalo. Ke fa Moše a ba tshegofatsa.