EKESODU 37

₁Mme Besalele a dira Letlole ka dipati tsa mokgwa; boleele jwa lone e le mabogo a le mabedi le bontlhanngwe; bophara jwa lone e le letsogo le bontlhanngwe; bogodimo jwa lone e le letsogo le bontlhanngwe. ₂A le manega gouta e e sa pekwang ka fa teng le ka fa ntle, a le gaola ka gouta mo tikologong. ₃A le bopela melepo e le mene ya gouta mo maotwaneng a mane a lone; e le mebedi mo lotlhakoreng longwe lwa lone, e mebedi e mengwe mo lotlhakoreng lwa bobedi lwa lone. ₄A ba a betla dithobane tsa morukuru, a di manega gouta. ₅A somela dithobane tseo mo melepong fa ditlhakoreng tsa Letlole go le sikara. ₆Le gona a dira sekhurumelo sa thuanyo sa lone ka gouta e e sa pekwang, boleele jwa sona e le mabogo a le mabedi le bontlhanngwe, bophara jwa sona e le letsogo le bontlhanngwe.

₇A ba a dira boKerubime ba le babedi ba gouta, a ba thula ka gouta e e kwenneng mo ntlheng tse pedi tsa sekhurumelo; ₈Kerubime mongwe a le mo ntlheng eno, Kerubime yo mongwe a le mo ntlheng ele; a dira boKerubime mo ntlheng tse pedi tsa sekhurumelo sa thuanyo; bone ba bo ba direleletswe mo go sona ka gouta e le nngwe. ₉BoKerubime ba bo ba tsharololetse diphuka kwa godimo, ba okame sekhurumelo sa thuanyo ka diphuka tsa bone. Difatlhego tsa bone tsa bo di lebanye. Difatlhego tsa boKerubime tsa bo di lebile sekhurumelo sa thuanyo.

₁₀Le gona a dira lomati lwa bojelo ka dipati tsa mokgwa; boleele jwa lone e le mabogo a le mabedi; bophara jwa lone e le letsogo; bogodimo jwa lone e le letsogo le bontlhanngwe. ₁₁A lo manega gouta e e sa pekwang; a lo gaola ka gouta mo tikologong. ₁₂A lo direla losi ka logong lwa bophara jwa seatla mo tikologong; a gaola losi loo ka gouta mo tikologong. ₁₃A lo bopela melepo e le mene ya gouta, a gokelela melepo eo mo dikhutlong tse nne tsa maoto a lone. ₁₄Melepo e ne e le fa tlase ga losi, e le masomelo a dithobane tsa go sikara lomati lwa bojelo loo. ₁₅A betla dithobane tsa morukuru go sikara lomati ka tsona, a di manega gouta. ₁₆Le gona a dira didiri tse di mo lomating, e bong megopo ya lone le dijana tsa lone le digo tsa lone le dinkgwana tse di dirisiwang mo tshupelong ya noo; a di dira ka gouta e e sa pekwang.

₁₇Le gona a dira setlhomo sa dipone sa gouta e e sa pekwang. A dira setlhomo le matshego a sona le kutu ya sona ka gouta e e thudilweng. Dikgolokwane tsa sona, e bong dinoko tsa sona le dithunya tsa sona tsa bo di direleletswe mo go sona ka gouta e le nngwe.

₁₈Jaanong go tswa dikala di le thataro mo ditlhakoreng tsa sona; dikala di le tharo tsa setlhomo mo lotlhakoreng longwe lwa sona le dikala tse tharo tsa setlhomo mo lotlhakoreng lwa bobedi lwa sona. ₁₉Kala nngwe le nngwe e ne e na le dikgolokwane tse tharo tse e kete ke dithunya tsa moamantele, e le noko le sethunya; dikala tse thataro tsa setlhomo di ne di ntse jalo. ₂₀Mo kutung ya setlhomo go ne go le dikgolokwane di le nne tse e kete ke dithunya tsa moamantele, e le dinoko tsa sona le dithunya tsa sona: ₂₁Go ne go le noko kwa godimo; gape go le noko fa tlase ga dikala tse pedi tsa ntlha tsa sona; gape go le noko fa tlase ga dikala tse pedi tsa bobedi tsa sona; gape go le noko fa tlase ga dikala tse pedi tsa boraro tsa sona. Go ne go le jalo mo dikaleng tse thataro tsa sona. ₂₂Dinoko tsa tsona le dikala e ne e le tsa gouta e le nngwe fela mmogo le kutu; setlhomo sotlhe e ne e le gouta e le nngwe e e thudilweng e e sa pekwang. ₂₃Le gona a dira dipone tse supa tsa sona le dipomo tsa sona le dipomelo tsa sona ka gouta e e sa pekwang. ₂₄A se dira le didiri tsotlhe tsa sona ka talente e le nngwe ya gouta e e sa pekwang.

₂₅Le gona a dira aletare ya go tshuba maswalo ka dipati tsa mokgwa; boleele jwa yona e le letsogo, le bophara jwa yona e le letsogo; e na le dikhutlo tse nne; bogodimo jwa yona e le mabogo a le mabedi. Dinaka tsa yona tsa fetela kwa tlase go nna maoto. ₂₆A e manega gouta e e sa pekwang, e bong bophaphathi jwa yona le dithoko tsotlhe tsa yona le dinaka tsa yona; a e gaola ka gouta mo tikologong. ₂₇A e direla melepo e le mebedi ya gouta fa tlase ga segaolo mo ntlheng tse pedi mo ditlhakoreng tse pedi tsa yona, e le masomelo a dithobane tse e sikarwang ka tsona. ₂₈A betla dithobane tsa morukuru, a di manega gouta.

₂₉Le gona a dira lookwane lwa tlotso lo lo boitshepo le tse di nkgang monate tse di sa pekwang tsa go kuisa musi, jaaka go dira motlhakanyi wa ditswaiso le ditlôlô.