EKESODU 24

₁Morena a raya Moše a re: “Tlhatlogela kwano Moreneng, wena le Arone le Natabe le Abihu le bagolo ba le 70 ba Baiseraele, lo mo obamele lo le kgakala. ₂Mme a Moše a atamele Morena a le esi, bale ba se ka ba atamela; le morafe o se ka wa tlhatloga nae.”

₃Ya re Moše a sena go tla, a bolelela morafe mafoko otlhe a Morena le melao yotlhe. Ke fa morafe otlhe o araba ka lentswe le le lengwe o re: “Mafoko otlhe a Morena o a buileng re tla a dirisa.” ₄Moše a kwala mafoko aotlhe a Morena, a ba a phakela mo mosong, a aga aletare fa tlase ga thaba, a tlhoma majwe a a motloutlo a le 12 ka fa ditsong di le 12 tsa Baiseraele. ₅A roma makau a Baiseraele go direla Modimo ditlhabelo tsa phiso, a tlhabela Morena dipoo, e le ditlhabelo tsa tebogo. ₆Jaanong Moše a tsaya bontlhanngwe jwa madi, a a tshela mo megopong; a ba a kgatsha bontlhanngwe jwa madi mo aletareng. ₇A ba a tsaya lokwalo lwa kgolagano, a le buisa mo ditsebeng tsa morafe. Mme wa re: “Tsotlhe tse Morena o di buileng, re tla di dira le go di utlwa.”

₈Ke fa Moše a tsaya madi ale, a kgatsha morafe ka ona a re: “Bonang, ke madi a kgolagano e Morena o e dirileng le lona ka mafoko otlhe ao.”

₉Morago ga moo Moše le Arone le Natabe le Abihu le bagolo ba le 70 ba Baiseraele ba tlhatloga, ₁₀ba bona Modimo wa Baiseraele; ka fa tlase ga dinao tsa ona e kete go tlhatlaganye matlapa a mawebu a safire, go galalela jaaka legodimo. ₁₁Mme wa se ka wa tsholeletsa batlotlegi ba Baiseraele letsogo; ya re ba sena go bona Modimo, ba ja, ba nwa.

₁₂Morena a raya Moše a re: “Tlhatlogela kwano go nna mo thabeng, o nne teng. Ke tla go naya matlapa a maboti le molao le ditaolo tse ke di kwadileng go di ba ruta.”

₁₃Moše a nanoga, a na le Jošua, modiredi wa gagwe; Moše a tlhatlogela kwa thabeng ya Modimo, ₁₄a laela a re: “Re leteleng fa go fitlhelela re boele kwano go lona. Bonang, Arone le Hure ba na le lona. Yo o nang le dikgang, a a tle kwa go bone.”

₁₅Ya re Moše a tlhatlogela kwa thabeng, leru la bo le khurumeditse thaba; ₁₆kgalalelo ya Morena ya bo e le mo godimo ga thaba ya Sinai; leru la e khurumetsa malatsi a marataro, mme a bitsa Moše ka letsatsi la bosupa a le mo teng ga leru. ₁₇Kgalalelo ya Morena e Baiseraele ba e bonyeng e ne e tshwana le molelo o o tukang mo setlhoeng sa thaba. ₁₈Moše a tsena mo teng ga leru, a tlhatlogela kwa thabeng. Moše a nna mo thabeng malatsi a le 40 le masigo a ona.