DOITERONOMIO 25

₁“E re fa go na le kgang mo banneng, mme ba ya kwa lekgotleng go seka, a baatlhodi ba ba sekise, ba atlholele mosiami, ba atlhole yo o molato. ₂Jaanong fa mosenyi a tshwanetse go itewa, a moatlhodi a mo kgwathise, mme a itewe fa pele ga gagwe mo go lekanyeng molato wa gagwe. ₃Moatlhodi o ka mo atlhola dithupa di le 40, e seng go feta foo, e se re gongwe wa ga eno a nyatsega mo matlhong a gago, fa a mo atlhotse dithupa di le dintsi go feta tseo.

₄“O se ka wa bofa kgomo molomo, fa e photha.

₅“E re fa bomorwa motho ba agile mmogo, mme mongwe wa bone a swa a se na ngwana wa mosimane, a mosadi wa moswi a se ka a nyalwa ke monna o sele, mme a morwa-rraagwe monna wa gagwe a tsene kwa go ene, a mo tlhatswe go nna mosadi wa gagwe, a mo direle tshwanelo ya ga morwa-rraagwe. ₆Jaanong morwa wa ntlha yo a tla mo tsholang a bidiwe ka leina la ga morwa-rraagwe yo o suleng gore leina la gagwe le se ka la phimolwa mo go Iseraele. ₇Mme fa monna yoo a sa rate go tsaya motlholagadi wa ga morwa-rraagwe, a motlholagadi wa ga morwa-rraagwe a ye kwa lekgotleng kwa bagolong, a bolele a re: ‘Morwa-rraagwe monna wa me o ganne go tsosetsa morwa-rraagwe leina mo go Iseraele; ga a rate go ntlhatswa jaaka e le tshwanelo.’ ₈Jaanong a bagolo ba motse wa ga gabo ba mmitse, ba bue nae. Mme fa a tlhomamisa a re: ‘Ga ke rate go mo tlhatswa,’ ₉gona a motlholagadi wa morwa-rraagwe a mo atamele mo matlhong a bagolo, a mo role setlhako mo lonaong, a mo kgwele mathe mo sefatlhegong, a fetole a re: ‘Monna yo o ganang go aga ntlo ya ga morwa-rraagwe o tla direlwa jalo.’ ₁₀Mme o tla tewa leina mo go Iseraele go twe: Goora-morolwasetlhako.

₁₁“E re fa banna ba le babedi ba lwa, mme mosadi wa yo mongwe a atamela, a re o namolela monna wa gagwe mo seatleng sa yo o mo itayang, a ntsha letsogo, a mo tshwara mapele, ₁₂gone o mo kgaole seatla; leitlho la gago le se ka la mo rekegela.

₁₃“O se ka wa nna le mefuta e le mebedi ya majwe a a lekanyang bokete, a mogolo le a mannye, mo kgwatlhaneng ya gago. ₁₄O se ka wa nna le mefuta e le mebedi ya dielo tsa efa mo ntlong ya gago, se segolo le se sennye. ₁₅O nne le lentswe le le lekanyang bokete le le tletseng le le siameng; o nne le efa e e lekanyeng e e siameng gore malatsi a gago a nne mantsi mo lefatsheng le Morena, Modimo wa gago, o tla le go nayang. ₁₆Gonne mongwe le mongwe yo o dirang tseo tse di sokameng ke maila mo Moreneng, Modimo wa gago.

₁₇“Gopolang tse Baamaleke ba di lo diretseng mo tseleng, fa lo tswa kwa Egepeto, ₁₈ka fa ba neng ba emelana le lona mo tseleng ka teng, ba bolaya botlhe ba lona ba ba setseng kwa morago ba fedile thata, lona lo lapile, lo feletswe, mme ba se ka ba boifa Modimo. ₁₉Jaanong e re fa Morena, Modimo wa gago, a sena go go naya boikhutso go se na mmaba ope yo o ka go tshwenyang tikologong mo lefatsheng le Morena, Modimo wa gago, o tla le go nayang go nna boswa gore o le rue, gona o phimole leina la Baamaleke fa tlase ga legodimo. O se ka wa lebala.