DANIELE 3

₁Kgosi Nebukatenesare o kile a dira setshwantsho sa gouta; bogodimo jwa sona e ne e le mabogo a le 60, boatlhamo jwa sona e le mabogo a le 6; a se emisa kwa nageng ya Babele, fa molapong wa Dura. ₂Kgosi Nebukatenesare a roma go kgobokanya babusi ba dinaga le dikgosana le balaodi ba mephato le bagakolodi le baokamedi ba mahumo le baatlhodi le bakwaledi ba bagolo le balaodi botlhe ba lefatshe la Babele gore ba tle go kgakola setshwantsho se kgosi Nebukatenesare a se emisitseng. ₃Ke fa go phuthega babusi ba dinaga le dikgosana le balaodi ba mephato le bagakolodi le baokamedi ba mahumo le baatlhodi le bakwaledi ba bagolo le balaodi botlhe ba lefatshe leo go kgakola setshwantsho se kgosi Nebukatenesare a se emisitseng; ba tla ba ema fa pele ga setshwantsho se Nebukatenesare a se emisitseng. ₄Ke fa mokui a kuela godimo a re: “Lona merafe le ditšhaba le dipuo, lo a laolwa ga twe: ₅‘Mogang lo utlwang go lediwa dinaka le ditlhaka le mangope le dirankure le dikwadi le diphala le diletso tsotlhe tsa mefutafuta, lo khubameng, lo obamele setshwantsho sa gouta se kgosi Nebukatenesare a se emisitseng. ₆Mme yo o sa khubameng, a se obamela, o tla latlhelwa ka yona nako eo mo teng ga ntlo ya molelo o o tukang.’ ” ₇Ka moo, ya re merafe yotlhe e utlwa go lediwa dinaka le ditlhaka le mangope le dirankure le dikwadi le diletso tsotlhe tsa mefutafuta, botlhe ba khubama ka pele e le ba merafe le ba ditšhaba le ba dipuo, ba obamela setshwantsho sa gouta se kgosi Nebukatenesare a se emisitseng.

₈Ka sebaka seo banna bangwe ba Bakalatea ba atamela, ba baya Bajuta molato. ₉Ba simolola go bua, ba raya kgosi Nebukatenesare ba re: “Kgosi, phela ka bosakhutleng! ₁₀Wena kgosi o beile molao o o reng: ‘A batho botlhe, fa ba utlwa go lediwa dinaka le ditlhaka le mangope le dirankure le dikwadi le diphala le diletso tsotlhe tsa mefutafuta, ba khubame, ba obamele setshwantsho sa gouta! ₁₁Mme yo o sa khubameng, a se obamela, o tla latlhelwa mo teng ga ntlo ya molelo o o tukang.’ ₁₂Jaanong go na le banna ba Bajuta ba o ba dirileng baokamedi ba puso ya naga ya Babele, e bong Šaterage le Mešage le Abetenego. Banna bao ga ba re sepe ka taolo ya gago, wena kgosi. Modimo wa gago ga ba o tlotle; setshwantsho sa gouta se o se emisitseng ga ba se obamele.”

₁₃Ke fa Nebukatenesare a laola ka bogale, a gaketse, gore go tlisiwe Šaterage le Mešage le Abetenego. Ya re banna bao ba sena go tlisiwa fa pele ga kgosi, ₁₄Nebukatenesare a simolola go bua, a ba botsa a re: “A ke ka bomo, wena Šaterage le Mešage le Abetenego, fa lo sa tlotle medimo ya me, fa lo sa obamele setshwantsho sa gouta se ke se emisitseng? ₁₅Jaanong he, e re lo utlwa go lediwa dinaka le ditlhaka le mangope le dirankure le dikwadi le diphala le diletso tsotlhe tsa mefutafuta, ka nako ya teng lo khubame, lo obamele setshwantsho se ke se dirileng. Mme fa lo sa se obamele, lo tla latlhelwa ka pele mo teng ga ntlo ya molelo o o tukang. E ka nna modimo ofe o o ka lo pholosang mo seatleng sa me?”

₁₆Šaterage le Mešage le Abetenego ba fetola kgosi Nebukatenesare ba re: “Ga go batlege gore re go arabe ka ntlha ya mafoko a. ₁₇Fa go ka nna jalo, Modimo wa rona o re o direlang, o nonofile go ka re pholosa mo ntlong ya molelo o o tukang; o tla re golola mo seatleng sa gago, kgosi. ₁₈Mme le fa o sa dire jalo, a go itsiwe ke wena kgosi, fa re sa ka ke ra tlotla medimo ya gago ka gope, le e seng go obamela setshwantsho sa gouta se o se emisitseng.”

₁₉Ke fa Nebukatenesare a tuka bogale, a bifela Šaterage le Mešage le Abetenego, a bua, a laola a re: “A go gotsiwe molelo mo ntlong o o fetang wa gale gasupa.” ₂₀A ba a laela banna ba e leng diganka mo mephatong ya gagwe gore ba bofe Šaterage le Mešage le Abetenego, ba ba latlhele mo ntlong ya molelo o o tukang. ₂₁Mme banna bao ba bofiwa, ba ntse ba rwele ditlhako le dikuane, ba apere marokgwe le diaparo tse dingwe, ba latlhelwa mo ntlong ya molelo o o tukang. ₂₂Jaanong ya re ka taolo ya kgosi e ne e le bogale thata, mme go gotsitswe molelo o mogolo thata mo ntlong, banna bao ba ba latlhelang Šaterage le Mešage le Abetenego mo go ona, ba bolawa ke kgabo ya molelo. ₂₃Mme banna ba bararo bao, Šaterage le Mešage le Abetenego, ba wela mo teng ga ntlo ya molelo o o tukang ba ntse ba bofilwe.

₂₄Ke fa kgosi Nebukatenesare a rerega, a nanoga ka pele, a bua a botsa ditona tsa gagwe a re: “A ga re a latlhela banna ba le bararo mo teng ga molelo ba ntse ba bofilwe?” Tsa araba, tsa raya kgosi tsa re: “Ee, kgosi!”

₂₅A fetola a re: “Mme ntlha, ke bona banna ba le bane, ba bofologile, ba itsamaela mo molelong. Ga go na ntho epe mo go bone. Tebego ya wa bone e tshwana le ya morwa medimo.”

₂₆Ke fa Nebukatenesare a atamela mojako wa ntlo ya molelo o o tukang, a bua a re: “Šaterage le Mešage le Abetenego, lona batlhanka ba Modimo o o godimodimo, tswayang moo, lo tle kwano!” Šaterage le Mešage le Abetenego ba be ba tswa mo molelong. ₂₇Jaanong ga phuthega babusi ba dinaga le dikgosana le balaodi ba mephato le ditona tsa kgosi, ba bona mo banneng bao, fa molelo o ne o se na thata epe mo mebeleng ya bone, le meriri ya ditlhogo tsa bone e sa kakoga le diaparo tsa bone di sa šwa, le e seng monko wa molelo go utlwala mo go bone.

₂₈Ya baa gona Nebukatenesare a buang a re: “A go bakwe Modimo wa ga Šaterage le Mešage le Abetenego o o romileng moengele wa ona gore a pholose batlhanka ba ona ba ba o ikantseng, ba tlola taolo ya kgosi, ba neela mebele ya bone mo molelong gore ba se ka ba tlotla modimo ope o sele, le e seng go o obamela, fa e se Modimo wa bone fela.

₂₉“Jaanong ke tlhoma molao gore mongwe le mongwe, le fa e le wa morafe ofe gongwe wa setšhaba sefe gongwe wa puo efe, yo o tla buang sengwe sa go nyatsa Modimo wa ga Šaterage le Mešage le Abetenego o tla remaganngwa le ntlo ya gagwe e fetolwa thotobolo; ka gonne ga go na modimo ope o sele o o nonofileng go pholosa jaaka ona.”

₃₀Ke fa kgosi e godisa Šaterage le Mešage le Abetenego mo nageng ya Babele.