2 SAMUELE 21

₁Go kile ga bo go le tlala mo malatsing a ga Dafita dinyaga di le tharo tse di tlhomaganyeng. Jaanong ya re Dafita a botsa Morena, Morena a re: “Go na le molato wa madi mo go Saule le ba lapa la gagwe; ka gonne o bolaile Bagibeone.” ₂Ke fa kgosi e bitsa Bagibeone, e ba botsa – kana Bagibeone e ne e se Baiseraele, mme e le masalela a Baamori. (Jaanong le fa Baiseraele ba ne ba ba ikanetse go ba rekegela, Saule o ne a ntse a ba bolaya ka go tlhoafalela Baiseraele le Bajuta.) ₃Dafita a botsa Bagibeone a re: “Nka lo direlang, nka dira thuanyo ka eng gore lo tshegofatse boswa jwa Morena?”

₄Bagibeone ba mo araba ba re: “Ga re batle selefera le gouta mo go Saule le mo go ba lapa la gagwe; le gona ga go a re tshwanela go bolaya motho mo Iseraeleng.” A ba a ba botsa a re: “Lona lo a reng, ke lo direle eng?”

₅Ba araba kgosi ba re: “Monna yole yo o re feditseng, a re logela maano a go re nyeletsa gore re se ka ra tlhola re nna teng mo nageng yotlhe ya Iseraele, ₆a re neelwe banna ba supa ba e leng bana ba gagwe gore re ba pegele Morena kwa Gibea wa ga Saule motlhophiwa wa Morena.” Kgosi ya re: “Ke tla ba lo neela.”

₇Mme kgosi ya rekegela Mefibosethe morwa Jonathane morwa Saule ka ntlha ya maikano a Morena a a neng a le fa gare ga bone, fa gare ga Dafita le Jonathane morwa Saule. ₈Fela bomorwa ba babedi ba ga Ritsepha morwadia Aya ba a ba tshotseng le Saule, e bong Aremoni le Mefibosethe le bomorwa ba batlhano ba ga Merabe morwadia Saule ba a ba tshotseng le Ateriele morwa Baresilai wa Mehola, kgosi ya ba tsaya, ₉ya ba neela mo diatleng tsa Bagibeone, mme ba ba kaletsa mo thabeng fa pele ga Morena, ba swa mmogo ka bosupa jwa bone. Ba bolawa mo malatsing a ntlha a thobo mo tshimologong ya kotulo ya garase.

₁₀Ke fa Ritsepha morwadia Aya a tsaya lesela la khutsafalo, a le ikalela mo letlapeng, e le ka tshimologo ya kotulo go ya go fitlhelela pula e e tswang kwa legodimong ya kgogolamoko e ba na; a se ka a leseletsa dinonyane tsa loapi go nna mo go bone motshegare le e seng dibata tsa naga bosigo.

₁₁E rile Dafita a begelwa se Ritsepha morwadi Aya mogadingwana wa ga Saule a se dirileng, ₁₂Dafita a ya a tsaya marapo a ga Saule le Jonathane morwawe kwa go beng ba motse wa Jabese kwa Gileate, a ditoto tse ba neng ba di utswa kwa loboteng lwa Betšheane kwa Bafelesita ba neng ba di pegile teng ka letsatsi le Bafelesita ba fentseng Saule ka lone kwa Gileboa; ₁₃a tlhatlosa marapo a ga Saule le Jonathane morwawe go tswa teng; le gona ba phutha marapo a bone bale ba ba kaleditsweng, ₁₄ba a fitlha mmogo le marapo a ga Saule le Jonathane morwawe mo nageng ya Benyamene kwa Sela mo mabitleng a ga Khiše rraagwe. Ba dira tsotlhe tse kgosi e di ba laetseng. Morago ga moo Modimo wa tlhomogela lefatshe leo pelo.

₁₅Go kile ga nna ntwa gape ya Bafelesita le Baiseraele. Ke fa Dafita a bolola le batlhanka ba gagwe nae, ba tlhabana le Bafelesita, mme Dafita a lapa. ₁₆Ke fa Išebi-Benobe mongwe wa mekaloba a re o bolaya Dafita. Bokete jwa lerumo la gagwe e ne e le dišekele di le 300 tsa kgotlho, a tlamilwe ka tšhaka e ntšhwa. ₁₇Mme Abisai morwa Seruya a mo thusa, a fenya Mofelesita yoo a mmolaya. Foo banna ba ga Dafita ba ikanela Dafita ba re: “Ga o kitla o tlhola o bolola le rona go ya tlhabanong, e se re gongwe wa tima lobone lwa Iseraele.”

₁₈Morago ga moo ga tsoga ntwa gape kwa Gobe le Bafelesita. Foo Sibegai wa Mohuša a bolaya Safe yo e neng e le mokaloba.

₁₉Ga ba ga tlhabanwa gape le Bafelesita kwa Gobe. Ke fa Elehanane morwa Jaire wa Betleheme a bolaya Goliathe wa Gathe yo lore lwa lerumo la gagwe lo neng lo le kana ka tlhomeso.

₂₀Ga ba ga lowa ntwa gape kwa Gathe. Teng go ne go le monna yo moleele thata, a na le menwana e merataro mo diatleng tsoo pedi le menwana e merataro mo dinaong tsoo pedi, mmogo e le menwana e le 24. Le ene e ne e le mokaloba. ₂₁Mme ya re a kgoba Iseraele, a bolawa ke Jonathane morwa Simei mogoloa Dafita.

₂₂Ba bane bao e ne e le ba losika lwa mekaloba kwa Gathe, mme ba bolawa ke Dafita le ke batlhanka ba gagwe.