2 DITIRAFALO 6

₁Ka nako ele Salomo a bua a re: “Morena a re, o rata go nna mo bontshong jwa maru. ₂Mme nna ke go agetse Ntlo, ke bonno jo bo tlhomameng gore o nne teng ka bosakhutleng.”

₃Jaanong kgosi ya retologa, ya tshegofatsa phuthego yotlhe ya Iseraele, phuthego e ntse e eme. ₄Ya ba ya re: “A go tumisiwe Morena, Modimo wa Iseraele, o o dirafaditseng ka diatla tsa ona se o se solofeditseng Dafita rre ka molomo wa ona wa re: ₅‘E sa le ka letsatsi le ke ntshitseng morafe wa me kwa lefatsheng la Egepeto ka lone, ga ke ise nke ke tlhophe motse ope mo ditsong tsotlhe tsa Iseraele go aga Ntlo teng gore leina la me le nne teng; le gona ke ne ke ise ke tlhaole monna go nna kgosi ya morafe wa me wa Iseraele. ₆Mme ke tlhophile Jerusalema gore leina la me le nne teng; ka ba ka tlhaola Dafita go nna mookamedi wa morafe wa me wa Iseraele.’

₇“Dafita rre o ne a ikaeletse go agela leina la Morena, Modimo wa Iseraele, Ntlo, ₈mme Morena a raya Dafita rre a re: ‘Maikaelelo a pelo ya gago a go agela leina la me Ntlo a siame. ₉Fela wena ga o ne o aga Ntlo ya me, mme morwao yo o tla mo tsalang ke ene yo o tla agelang leina la me Ntlo.’

₁₀“Jaanong Morena o dirafaditse lefoko la gagwe le o le buileng: Kana ke tsogile mo boemong jwa ga Dafita rre, ka nna mo sedulong sa bogosi sa Iseraele jaaka Morena a buile, ka agela leina la Morena, Modimo wa Iseraele, Ntlo. ₁₁Ka ba ka baya Letlole teng, le tshupo ya kgolagano ya Morena e leng mo go lone e o e dirileng le Baiseraele.”

₁₂Salomo a ba a ema fa pele ga aletare ya Morena a lebaganye le phuthego yotlhe ya Iseraele, a tsholetsa mabogo. ₁₃Kana Salomo o ne a dirile sefata sa kgotlho, a se baya fa gare ga lelapa, boleele jwa sona e le mabogo a le matlhano le bophara jwa sona e le mabogo a le matlhano, bogodimo jwa sona e le mabogo a le mararo. Jaanong a ema mo go sona, a khubama ka mangole fa pele ga phuthego yotlhe ya Iseraele, a tsholeletsa mabogo kwa legodimong ₁₄a re: “Morena, Modimo wa Iseraele, kwa legodimong le mono lefatsheng ga go na modimo ope o o tshwanang nao. Wena o bolokela batlhanka ba gago kgolagano le bopelotlhomogi, fa ba sepela fa pele ga gago ka pelo yotlhe. ₁₅Wena o diretse motlhanka wa gago Dafita rre tse o di mo solofeditseng. Ruri, o ne o di buile ka molomo wa gago, mme o bile o di dirafaditse ka seatla sa gago jaaka go ntse kajeno. ₁₆Jaanong he, Morena, Modimo wa Iseraele, o dirafaletse motlhanka wa gago Dafita rre le tse o di mo solofeditseng wa re: ‘Ga o kitla o tlhoka monna fa pele ga me yo o dutseng mo sedulong sa bogosi sa Iseraele; go ka nna jalo fela fa bana ba gago ba disa tsela ya bone ka go sepela ka fa molaong wa me jaaka wena.’ ₁₇Jaanong he, Morena Modimo wa Iseraele, a lefoko la gago le o le solofeditseng motlhanka wa gago Dafita le tlhomame.

₁₈“Mme a ruri Modimo o ka nna le batho mo lefatsheng? Kana loapi le magodimo otlhe ga di go lekane. Jaanong Ntlo e ke e agileng yona e tlhaela bogolo jang! ₁₉Morena, Modimo wa me, ngoka thapelo ya motlhanka wa gago le mokokotlelo wa gagwe gore o utlwe go goelela le go rapela mo motlhanka wa gago a go rapelang fa pele ga gago ₂₀le gore matlho a gago e nne a a budulogetseng Ntlo e bosigo le motshegare, e bong felo fa o buileng ka ga gona wa re, o tla baya leina la gago teng; gape le gore o utlwe thapelo e motlhanka wa gago o tla e rapelang a lebile felo fano. ₂₁A ko o utlwe mokokotlelo wa motlhanka wa gago le wa morafe wa gago wa Iseraele o ba tla o rapelang ba lebile felo fa; o o utlwe o le kwa felong fa o nnang teng kwa legodimong; mme o re o o utlwa, o ba itshwarele.

₂₂“E re fa motho a leofetse mongwe-ka-ene, mme ba mo ikanisa gore a ikhutse, mme a tla a bua khutso fa pele ga aletare ya gago fa Ntlong e, ₂₃foo o utlwe o le kwa legodimong, o itshupe ka tiro, o direle batlhanka ba gago tshiamo ka go betsa moikepi, ka go digela ditiro tsa gagwe mo tlhogong ya gagwe le ka go atlholela mosiami o re, ga a na molato, ka go mo naya ka fa tshiamong ya gagwe.

₂₄“E re fa morafe wa gago wa Iseraele o fenngwa ke mmaba, ka ba tla bo ba go leofetse, mme ba sokologela kwa go wena, ba ipolela leina la gago, ba rapela ba go kokotlela mo Ntlong e, ₂₅foo o utlwe o le kwa legodimong o itshwarele boleo jwa morafe wa gago wa Iseraele, o ba busetse kwa nageng e o e ba fileng le borraabo.

₂₆“E re fa legodimo le tswetswe, go se na pula, ka ba tla bo ba go leofetse, mme ba rapela ba lebile felo fa, ba ipolela leina la gago, ba boa ba tlogela boleo jwa bone, ka o tla bo o ba kokobetsa, ₂₇foo o utlwe o le kwa legodimong, o itshwarele boleo jwa motlhanka wa gago le jwa morafe wa gago wa Baiseraele – kana o ba ruta tsela e e siameng e ba tshwanetseng go sepela mo go yona – o nesetse lefatshe la gago pula le o le neileng morafe wa gago go nna boswa.

₂₈“E re fa go le tlala mo lefatsheng, fa go le leroborobo, fa go le phori gongwe mongadule gongwe boijane gongwe tsie, fa mmaba wa morafe a o dikanyetsa ka ntwa mo lefatsheng kwa go nngwe ya dikgoro tsa ona, le fa go le pogo efe gongwe bolwetse bofe, ₂₉foo o utlwe thapelo nngwe le nngwe. O utlwe selelo sengwe le sengwe, le fa e le sa motho ofe, le fa e le sa morafe otlhe wa gago wa Iseraele, ka ba tla bo ba lemoga mongwe le mongwe petso ya gagwe le botlhoko jwa gagwe, ba tsholeletsa mabogo kwa Ntlong e. ₃₀Foo o utlwe o le kwa legodimong kwa bonnong jwa gago, o ba itshwarele, o nee mongwe le mongwe ka fa ditsamaong tsotlhe tsa gagwe. Kana o itse pelo ya gagwe; gonne ke wena o le wesi fela o itseng dipelo tsa bana ba batho ₃₁gore ba go boife, ba sepele mo ditseleng tsa gago ka malatsi otlhe a ba phelang ka ona mo lefatsheng le o le neileng borraetsho.

₃₂“Le ene moditšhaba yo e seng wa morafe wa gago wa Iseraele, fa a tswa kwa lefatsheng le le kgakala ka ntlha ya leina le legolo la gago le seatla sa gago se se thata le letsogo la gago le le otlologileng; fa a tla a rapela a lebile Ntlo e, ₃₃foo o utlwe o le kwa legodimong kwa bonnong jwa gago, o dire fela jaaka moditšhaba a goela kwa go wena gore merafe yotlhe ya lefatshe e itse leina la gago, e go boife jaaka morafe wa gago wa Iseraele; e be e lemoge gore Ntlo e, e ke e agileng, ke e agetse leina la gago.

₃₄“E re fa morafe wa gago o bolola go ya go tlhabana le baba ba ona ka taelo ya gago, mme ba go rapela ba lebile kwa motseng o, o ò o tlhophileng le kwa Ntlong e ke e agetseng leina la gago, ₃₅foo o utlwe thapelo ya bone le selelo sa bone o le kwa legodimong, o ba direle tshiamo.

₃₆“E re fa ba go leofela – kana ga go na motho ope yo o sa leofeng! – mme o ba galefela, o ba neela mo diatleng tsa mmaba, mme bathopi ba bone ba ba isa mo botshwarong kwa lefatsheng le le kgakala gongwe le le gaufi ₃₇jaanong fa ba itshôla kwa lefatsheng le ba isitsweng teng mo botshwarong, ba sokologa, ba lelela kwa go wena ba le kwa lefatsheng la botshwaro jwa bone, ba re: ‘Re leofile, ra senya, ra ikepa!’ ₃₈Fa ba boela jalo kwa go wena ka pelo yotlhe le ka mowa otlhe ba le kwa lefatsheng la botshwaro jwa bone kwa ba isitsweng teng mo botshwarong, mme ba rapela ba lebile kwa lefatsheng la bone le o le neileng borraabo le kwa motseng o ò o tlhophileng le kwa Ntlong e ke e agetseng leina la gago, ₃₉foo o utlwe thapelo ya bone le dilelo tsa bone o le kwa legodimong kwa bonnong jwa gago, o ba direle tshiamo, o itshwarele morafe wa gago o o go leofetseng.

₄₀“Jaanong he, Modimo wa me, ka thapelo, a matlho a gago a buduloge, a ditsebe tsa gago di sekegelwe thapelo ya felo fa. ₄₁Nanoga jaanong, Morena Modimo, o tle felong ga boikhutso jwa gago, wena le Letlole la thata ya gago. A baperesiti ba gago, Morena Modimo, ba apare pholoso; a ba o ba tlhomogetseng pelo ba itumedisiwe ka tse di molemo! ₄₂Morena Modimo, se gane go utlwa motlodiwa wa gago; gakologelwa mapelotlhomogi a o a solofeditseng Dafita motlhanka wa gago.”