1 SAMUELE 14

₁Ka letsatsi le lengwe Jonathane morwa Saule a raya motlhanka yo o rweleng dibolai tsa gagwe a re: “Tlaya, re kgabaganyetse kwa balebeleding ba Bafelesita ba ba kwa ntlheng ele!” Mme a se ka a bolelela rraagwe. ₂Saule o ne a le kwa molelwaneng wa Gibea, a dutse fa tlase ga setlhare sa garanata se se kwa Migerone. Batlhabani ba ba neng ba na nae e ne e ka nna ba le 600. ₃Ahia morwa Ahitube morwa-rraagwe Ikabote morwa Phinehase morwa Eli moperesiti wa Morena kwa Silo a bo a apere khiba ya boperesiti. Banna ba ne ba sa itse gore Jonathane o tsamaile.

₄Mo gare ga phata fa Jonathane a neng a batla go kgabaganya teng go tlhasela batlhodi ba Bafelesita ga bo go le lefika le le ntlha mo ntlheng eno le lefika le le ntlha mo ntlheng ele; leina la lengwe e le Bosese, leina la le lengwe e le Sene. ₅Lefika le le ntlha le le kwa bokone le ne le lebaganye le Migemase; le lengwe le le kwa borwa le ne le lebaganye le Geba.

₆Jaanong Jonathane a raya motlhanka yo o rweleng dibolai tsa gagwe a re: “Tlaya, re kgabaganyetse kwa batlhoding ba ba sa rupang bale. Ka gongwe Morena o tla re thusa; gonne ga go na se se ka thibelang Morena go pholosa ka bontsi gongwe ka bobotlana.”

₇Motshola-dibolai wa gagwe a mo araba a re: “Dira tsotlhe tse pelo ya gago e di ikaeletseng. Ke na nao. Se o se ratang le nna ke a se rata.”

₈Jonathane a ba a re: “Bona, re tla kgabaganyetsa kwa banneng bale, re ba ipontsha. ₉Jaanong fa ba ka re raya jaana ba re: ‘Emang, re be re fitlhe koo go lona!’ gona re tla ema fa re leng teng, re sa tlhatlogele kwa go bone. ₁₀Mme fa ba ka re: ‘Tlhatlogelang kwano go rona!’ foo re tla tlhatloga; gonne Morena o tla bo a ba neetse mo diatleng tsa rona. Selo seo e tla nna sesupo mo go rona.”

₁₁Ya re ba ipontsha batlhodi ba Bafelesita ka bobedi jwa bone Bafelesita ba re: “Bahebere ke bale, ba tswa mo mesimeng, mo ba neng ba iphitlhile teng.” ₁₂Mme banna ba batlhodi ba bitsa Jonathane le motshola-dibolai wa gagwe ba re: “Tlhatlogelang kwano, re tle go lo tlhalefisa!”

Ke fa Jonathane a raya motshola-dibolai wa gagwe a re: “Tlhatloga o ntshale morago, gonne Morena o ba neetse mo diatleng tsa Baiseraele.” ₁₃Jonathane a tlhatloga ka go abula, motshola-dibolai wa gagwe a mo setse morago. Ke fa ba wa fa pele ga Jonathane, mme motshola-dibolai wa gagwe a mo sala morago, a ba fofotsa. ₁₄Polao ya ntlha eo e Jonathane le motshola-dibolai wa gagwe ba bolaileng banna ba e ka nnang ba le 20 mo go yona ya dirafala mo felwaneng ga bontlhanngwe jwa tema ya letsatsi. ₁₅Jaanong ga nna letshogo mo bothibelelong le mo nageng le mo banneng botlhe ba Bafelesita; le gona ga rerega batlhodi le lekoko la bathukhuthi; le lefatshe la roroma, ya nna theregiso ya Modimo.

₁₆Jaanong rile batlhodi ba ga Saule kwa Gibea wa Benyamene ba leba, ba bona bontsi bo tetesela, bo tabogela kwa le kwa. ₁₇Ke fa Saule a raya banna ba ba nang nae a re: “A ko lo bale, lo bone yo o se yong mo go rona.” Ya re ba bala ba fitlhela Jonathane le motshola-dibolai wa gagwe ba se yo. ₁₈Saule a ba a raya Ahia a re: “Tlisa Letlole la Modimo.” Letlole la Modimo le ne le le mo Baiseraeleng ka sebaka seo. ₁₉Ya re Saule a sa ntse a bua le moperesiti tlhodio e e mo bothibelelong jwa Bafelesita ya nna ya golela pele. Ke fa Saule a raya moperesiti a re: “Tlogela!” ₂₀Ga kuiwa Saule le banna botlhe ba ba nang nae; ya re ba fitlha kwa tlhabanong ba fitlhela go bolayana bone ka ditšhaka, go le tlhakatlhakanyo e kgolo thata. ₂₁Mme Bahebere ba ba neng ba ntse ba thusa Bafelesita ba ba neng ba bolotse nabo mo mephatong ba tlhanoga le bone, ba thusa Baiseraele ba ba nang le Saule le Jonathane. ₂₂Jaanong ya re banna botlhe ba Iseraele ba ba neng ba iphitlhile kwa dithabeng tsa Eferaime ba utlwa go twe, Bafelesita ba a tshaba, le bone ba ba khutšhela mo tlhabanong. ₂₃Morena o ne a naya Iseraele phenyo jalo ka letsatsi leo. Jaanong tlhabano e feta Bethawene.

₂₄Mme banna ba Iseraele ba lapile ka letsatsi leo, Saule a ikanisa banna a re: “Go hutsitswe monna yo o ka jang dijo pele ga mantsiboa, ke ise ke ipusolosetse mo babeng ba me.” Ka moo banna botlhe ba se ka ba ja dijo. ₂₅Batho botlhe ba tsena mo sekgweng, mme ga bo go tletse dinotshe mo nageng eo. ₂₆Ya re banna ba phunya dinotshe, ba fitlhela di tsentse, e bile mamepe a tshologa, mme go se na ope yo o isang seatla sa gagwe kwa molomong ka banna ba boifa khutso ele. ₂₇Mme Jonathane o ne a sa utlwa fa rraagwe a ikanisa banna; a ntsha ntlha ya molamu o a o tshotseng, a kgotla mo lemepeng, a isa kwa molomong, a mona; ke fa matlho a gagwe a apoga. ₂₈Mme mongwe wa banna a mo raya a re: “Rraago o ikanisitse banna maikano a a reng: ‘Go hutsitswe monna yo o jang dijo kajeno.’ Ke ka mo banna ba feletsweng ke thata.”

₂₉Jonathane a re: “Rre o isitse lefatshe le mo tatlhegong. A ko lo bone jaaka matlho a me a apogile fa ke sena go ja bobotlana jwa mafura a dinotshe a. ₃₀Kana fa banna ba ka bo ba dumeletswe go ja tsa thopo ya baba ba bone kajeno e ba e bonyeng, foo polao mo Bafelesiteng e ka bo e le kgolo thata.”

₃₁Ka letsatsi leo ba ne ba bolaya Bafelesita go tswa kwa Migemase go ya kwa Ayalone; fela banna ba ne ba lapile thata. ₃₂Jaanong banna ba tla ba wela thopo, ba tsaya dinku le dikgomo le dipoana, ba di tlhabela fa fatshe; ba be ba di ja di ntse di rotha madi. ₃₃Ke fa Saule a begelwa go twe: “Bona, banna ba leofela Morena ka go ja nama e e rothang madi.” Mme a re: “Lo dira molato! Pitikelang lentswe le legolo kwano go nna.” ₃₄Saule a ba a re: “Phatlalalelang mo banneng, lo ba ree lo re: ‘A mongwe le mongwe a tlise kgomo ya gagwe gongwe nku ya gagwe kwano go nna, lo di tlhabe fano, lo be lo je, mme lo se ka lwa leofela Morena ka go ja nama e e rothang madi.’ ” Ke fa mongwe le mongwe a tlisa se a nang naso bosigo joo, ba di tlhabela teng. ₃₅Mme Saule a agela Morena aletare, e le aletare ya ntlha e o e agetseng Morena.

₃₆Jaanong Saule a re: “A re fologeng, re latelele Bafelesita bosigo jo, re ba thukhuthe dilo go ya phepafalong ya moso, mme re se ka ra sadisa ope wa bone.” Ba re: “Dira tsotlhe tse di siameng mo matlhong a gago.” Mme moperesiti a re: “A re atameleng Modimong fano.”

₃₇Ke fa Saule a botsa Modimo a re: “A ke fologe, ke latelele Bafelesita? A o tla ba neela mo diatleng tsa Baiseraele?” Mme wa se ka wa mo araba ka letsatsi leo. ₃₈Saule a ba a re: “Atamelang kwano lona bagolo lotlhe ba morafe, lo lemoge, lo bone gore boleo joo bo dirafetse ka eng kajeno? ₃₉Gonne ka bophelo jwa Morena yo o fileng Iseraele phenyo le fa bo le mo go Jonathane morwaake, o tshwanetse go swa!” Mme ga se ka ga nna ope mo banneng botlhe yo o mo arabang. ₄₀Jaanong a raya Baiseraele botlhe a re: “Lona lo nnele ntlha ele, mme nna le Jonathane morwaake re tla nna ka kwano.” Banna ba araba Saule ba re: “Dira ka fa o bonang ka teng.”

₄₁Ke fa Saule a raya Morena a re: “Modimo wa Iseraele, re supetse boammaaruri.” Ga tshwarwa Jonathane le Saule, mme banna ba falola fela. ₄₂Saule a re: “Ntlhameleng tengwa le Jonathane morwaake.” Ga tshwarwa Jonathane. ₄₃Ke fa Saule a raya Jonathane a re: “A ko o mpolelele se o se dirileng.” Jonathane a mmolelela a re: “Ke jele bobotlana jwa mafura a dinotshe fela ka ntlha ya molamu o ke neng ke o tshotse. Ke fano. Nka swa.”

₄₄Saule a re: “A Modimo o ntirele jaana, o nkokeletse jaana, fa ke sa go bolae, Jonathane.”

₄₅Mme banna ba raya Saule ba re: “A Jonathane o tla swa yo o dirileng phenyo e kgolo e mo Iseraeleng? A go nne kgakala! Ka bophelo jwa Morena! Ruri, ga go kitla go wela thiri epe ya gagwe fa fatshe. Gonne o e dirile ka thuso ya Modimo ka letsatsi la kajeno.” Banna ba golola Jonathane jalo mme a se ka a swa.

₄₆Jaanong Saule a tlogela Bafelesita a ya gae. Bafelesita bone ba ya kwa ga bone.

₄₇E rile Saule a se na go tsaya bogosi jwa Iseraele, a tlhabana le baba botlhe ba gagwe mo tikologong, e bong Bamoabe le Baamone le Baetomo le dikgosi tsa Soba le Bafelesita, mme gongwe le gongwe kwa a yang teng a fenya. ₄₈A itshupa a le pelokgale, a fenya Baamaleke, a namolela Baiseraele mo diatleng tsa yo o ba thukhuthang.

₄₉Bomorwa Saule e ne e le Jonathane le Iswi le Malekhišua. Maina a bomorwadie ba babedi e ne e le a: Leina la yo mogolo e le Merabe leina la yo mmotlana e le Migale. ₅₀Leina la mosadi wa ga Saule e ne e le Ahinoame morwadia Ahimaase; leina la molaodi wa mephato ya gagwe e le Abenere morwa Nere rrangwanaagwe Saule. ₅₁Kana Khiše rraagwe Saule le Nere rraagwe Abenere e ne e le bomorwa Abiele.

₅₂Go ne go le dintwa tse di makete le Bafelesita ka malatsi otlhe a ga Saule. Ka moo e ne ya re fa Saule a bona monna wa mogale gongwe wa senatla a mo itseele.