1 DITIRAFALO 22

₁Mme Dafita a re: “Felo fa e tla nna ga Ntlo ya Morena Modimo le aletare ya ditlhabelo tsa phiso tsa Baiseraele e tla nna fa.”

₂Dafita a ba a laela gore go phuthwe baeng ba ba mo lefatsheng la Iseraele. A ba a tlhoma babetli go betla majwe a go aga Ntlo ya Modimo. ₃Le gona Dafita a thula tshipi e ntsi, a dira dimapo tsa ditswalo tsa dikgoro le dipataganyo le kgotlho e ntsi e e sa itsiweng bokete; ₄a kgobokanya dikota tsa mesetere tse di se nang palo; gonne ba Sitone le ba Tiro ba ne ba tlisetsa Dafita bontsi jwa dikgong tsa mesetere. ₅Kana Dafita o ne a re: “Salomo morwaake o sa le mošwa o tlhoka temogo, mme Ntlo e e tshwanetseng go agelwa Morena e tshwanetse ya nna e kgolo mo go feteletseng e e tumileng e e kgabetseng mafatshe otlhe. Nte ke mo etleeletse.” Mme Dafita o ne a etleetsa ka tse dintsi a ise a swe.

₆A ba a bitsa Salomo morwawe, a mo laela gore a tle a agele Morena, Modimo wa Iseraele, Ntlo. ₇Dafita a raya Salomo a re: “Morwaaka, ke ne ke ikaeletse ka nosi go agela leina la Morena, Modimo wa me, Ntlo. ₈Mme lefoko la Morena la tla kwa go nna la re: ‘O tsholotse madi a mantsi, o lole dintwa tse dikgolo. Ga o a tshwanela go agela leina la me Ntlo; ka gonne o tshololetse madi a mantsi fa fatshe fa pele ga me. ₉Bona, morwa yo ò tla mmelegelwang o tla nna monna wa boikhutso, mme ke tla mo ikhutsisa go se na mmaba ope tikologong; gonne leina la gagwe e tla nna Salomo, mme ke tla naya Baiseraele kagiso le boikhutso malatsing a gagwe. ₁₀Ene o tla agela leina la me Ntlo; o tla nna morwaake, nna ke nne rraagwe, mme ke tla tlhomamisa sedulo sa bogosi jwa gagwe mo go Iseraele ka bosakhutleng.’

₁₁“Jaanong he, morwaaka, a Morena a nne nao, o nne maatlametlo go ka aga Ntlo ya Morena, Modimo wa gago, jaaka a buile ka ga gago. ₁₂Fela a Morena a go nee kutlwisiso le tlhaloganyo, a go laodise Baiseraele, a go thuse go tshegetsa molao wa Morena, Modimo wa gago. ₁₃Foo o tla tshegofala fa o ela tlhoko go dira ka melao le ka ditshwanelo tse Morena o di laetseng Baiseraele ka Moše. Tia o tlhomame! Se boife le e seng go tshoga! ₁₄Bona, le fa ke ne ke le pogisegong, ke etleeleditse Ntlo ya Morena ditalente di le 100 000 tsa gouta le ditalente di le 1 000 000 tsa selefera le kgotlho le tshipi tse di sa kakeng tsa lekanngwa bokete. Ke bile ke etleeditse ka dikgong le majwe, mme tsona o ka di oketsa ka tse dingwe. ₁₅Le gona o na le badiri ba bantsi, e bong babetli ba mafika le baagi le babetli ba dikgong le batlhalefi ba mefutafuta mo ditirong tse dintsi ₁₆tsa gouta le selefera le kgotlho le tshipi tse di se nang palo. Nanoga he, o simolole tiro, mme a Morena a nne nao!”

₁₇Dafita a ba a laela dikgosana tsotlhe tsa Iseraele gore di thuse Salomo morwawe a re: ₁₈“A ga ke re, Morena, Modimo wa lona, o na le lona, o bile o lo neile boikhutso ntlheng tsotlhe. Gonne o ne wa neela baagi ba pele ba lefatshe le mo diatleng tsa me, mme lefatshe le la tsenngwa mo taolong ya Morena le ya morafe wa gagwe. ₁₉Jaanong ineeleng ka dipelo le mewa go batla Morena, Modimo wa lona, lo nanoge lo age Ntlo e e Boitshepo ya Morena Modimo gore lo itse go tsenya Letlole la Kgolagano ya Morena le didiri tse di boitshepo tsa Modimo mo Ntlong e e tla agelwang leina la Morena.”