SEKARIA 3

₁A ntshupetsa Jošua moperesiti yo mogolo a eme fa pele ga moengele wa ga Jehofa, le Satane a eme ka fa ntlheng ya letsogo le legolo la gagwe, gore a nne moganetsi wa gagwe. ₂Jehofa a raya Satane a re: “A Jehofa a go kgalemele wena Satane; ee, Jehofa yo o itshenketseng Jerusalema, a a go kgalemele; yo a ga se motswaiso o o swatotsweng mo molelong?”

₃Jaana Jošua o ne a apere diaparo tse di maswe, a eme fa pele ga moengele. ₄Mme a raya ba ba emeng fa pele ga gagwe, a re: “Tlosang diaparo tse di matladika mo go ene.” Mme a mo raya a re: “Bona, ke fetisitse ka tlosa tshiamololo ya gago mo go wena, mme ke tlaa go apesa diaparo tse dintle.”

₅Ka re: “A ba mo rwese tlhoro e ntle mo tlhogong.” Mme ba mo rwesa tlhoro e ntle mo tlhogong, ba mo apesa diaparo; mme moengele wa ga Jehofa a bo a eme teng.

₆Moengele wa ga Jehofa a tlhomamiseletsa Jošua, a re: ₇“Jehofa wa masomosomo o bua jaana, a re: Fa o sepela mo tseleng tsa me, fa o tshegetsa tebelo ya me, foo le gone o tlaa atlhola ntlo ya me, le gone o tlaa lebela malwapa a me, mme ke tlaa go naya boemo jwa katamelo mo go ba ba emeng teng.

₈“ ‘Utlwa jaana, wena Jošua moperesiti yo mogolo, wena le bankana ba gago ba ba dutseng fa pele ga gago; gonne ke banna ba ba leng segakgamatso; gonne, bona, ke tlaa ntshetsa kwa ntle motlhanka wa me yo go tweng Letlhogela. ₉Gonne bona, lentswe le ke le beileng fa pele ga Jošua; mo lentsweng le le lengwe fela go matlho a supa; bona, ke tlaa seta ditseto tsa lone,’ go bua Jehofa wa masomosomo, ‘mme ke tlaa tlosa boikepo jwa lefatshe leo ka tsatsi le le lengwe fela. ₁₀E tlaa re mo tsatsing leo,’ go bua Jehofa wa masomosomo, ‘lo tlaa bitsakanya mongwe le mongwe le wa ga gabo, ba le fa tlase ga mofine le fa tlase ga mofeige.’ ”