SEKARIA 14

₁Go tla motlha mongwe wa ga Jehofa, mogang thopo ya gago e tlaa kgaoganngwang mo gare ga gago. ₂“Gonne ke tlaa phuthela merafe yotlhe kwa Jerusalema, e tla go tlhabana nao; motse o tlaa gapiwa le matlo a tlaa hukudiwa, basadi ba tlaa betelelwa ka thata; bontlhanngwe jwa motse bo tlaa ya botshwarong, mme masalela a batho ga a ketla a kgaolwa mo motseng.” ₃Foo Jehofa o tlaa bolola a ya go tlhabana le merafe eo, jaaka jale a kile a tlhabana mo motlheng wa tlhabano. ₄Mo motlheng oo dinao tsa gagwe di tlaa ema mo thabeng ya Matlhware e e lebaganyeng le Jerusalema, ka fa ntlheng ya botlhabatsatsi, mme Thaba ya Matlhware e tlaa fatogana ka bogare bolebana le botlhabatsatsi le bophirimatsatsi, mme go tlaa nna mogogoro o mogolo; bontlhanngwe jwa thaba bo tlaa sutela ntlheng ya botsheka, le bontlhanngwe ntlheng ya borwa. ₅Lo tlaa tshaba le mogogoro wa dithaba tsa me; gonne mogogoro wa dithaba o tlaa ditlha kwa Asale; ee, lo tlaa tshaba jaaka lo kile lwa tshaba fa pele ga thoromo ya lefatshe mo metlheng ya ga Usia kgosi ya Juta; mme Jehofa Modimo wa me o tlaa tla, le baitshepi botlhe nao.

₆Go tlaa dirala mo motlheng oo, go re, lesedi ga le ketla le nna ka phatsimo le ka lotobo; ₇mme e tlaa nna letsatsi le le lengwe fela le le itsiweng ke Jehofa; e seng motshegare, le e seng bosigo; mme go tlaa dirala, go re, e re ka lotlatlana lwa maitsebowa go tlaa bo go le lesedi.

₈Go tlaa dirala mo motlheng oo, go re, metsi a a tshedileng a tlaa tswa mo Jerusalema; bontlhanngwe jwa one bo tlaa leba lewatle la botlhabatsatsi, le bontlhanngwe jwa one bo lebe lewatle la bophirimatsatsi; go tlaa nna jalo selemo le mariga. ₉Jehofa o tlaa nna kgosi ya lefatshe lotlhe; mo motlheng oo, o tlaa nna mongwe fela, le leina la gagwe lengwe fela.

₁₀Lefatshe le tlaa fetolwa le nna jaaka Araba, go tswa Geba go ya Rimona, go pota Jerusalema ntlheng ya borwa; mme o tlaa tsholediwa, o tlaa aga mo felong ga gagwe, go tswa kgorong ya ga Benjamine, go ya felong ga kgoro ya ntlha, go ya kgorong ya kgokgotsho, le go tswa kagong e e godileng ya ga Hananele go ya dikgatisetsong tsa kgosi. ₁₁Batho ba tlaa aga mo go one, mme ga go ketla go nna phutso epe; mme Jerusalema o tlaa nna mo polokegong.

₁₂E ke yone petso e Jehofa o tlaa betsang ka yone ditšhaba tsotlhe tse di tlhabanyeng le Jerusalema; nama ya bone e tlaa jega ba sa ntse ba eme ka dinao, matlho a bone a tlaa jega mo kgapeng tsa one, le loleme lwa bone lo tlaa jega mo melomong ya bone.

₁₃Go tlaa dirala mo motlheng oo, go re, go tlaa nna pheretlho e kgolo, mo go bone, e e tswang kwa go Jehofa; mongwe le mongwe o tlaa tshwara wa ga gabo ka letsogo, mme letsogo la gagwe le tlaa tsogela letsogo la wa ga gabo. ₁₄Le Juta o tlaa tlhabana kwa Jerusalema; mme khumo ya merafe yotlhe mo tikologong e tlaa phuthwa: gouta, selefera, le diaparo ka letlotlo le legolo.

₁₅Mme petso ya pitse e tlaa nna jalo, ya mmoulo, ya kamela, ya esela, le ya ditshedi tsotlhe tse di tlaa bong di le mo mathibelelong ao, e tlaa nna jaaka petso e.

₁₆Go tlaa dirala go re, mongwe le mongwe yo o setseng wa merafe yotlhe e e neng e tsile go tlhasela Jerusalema, o tlaa ya ka ngwaga le ngwaga go obamela Kgosi, Jehofa wa masomosomo, le go dira modiro wa diobo. ₁₇Go tlaa dirala, go re, le fa e le mang wa ditshika tsa lefatshe yo o sa tlhatlogelang kwa Jerusalema a ya go obamela Kgosi, Jehofa wa masomosomo, ga go ketla go nna pula mo ga bone. ₁₈Fa losika lwa Egepeto lo sa tlhatloge, mme ba sa tle, le mo go bone ga e ketla e na; go tlaa nna sebetso se Jehofa o tlaa betsang ka sone merafe e e sa yeng go dira modiro wa diobo. ₁₉E tlaa nna yone petso ya Egepeto, le petso ya merafe yotlhe e e sa yeng go dira modiro wa diobo.

₂₀Mo motlheng oo go tlaa kwalwa mo dikolokwaneng tsa dipitse go twe: BOITSHEPELO JEHOFA; le dipitsa mo ntlong ya ga Jehofa di tlaa tshwana le megopo e e fa pele ga sebeso. ₂₁Ee, dipitsa tsotlhe tse di mo Jerusalema, le tse di mo Juta, di tlaa nna boitshepelo Jehofa wa masomosomo; mme botlhe ba ba isang setlhabelo ba tlaa tla ba tsaya ga tsone, ba apaya ka tsone; mme mo motlheng oo ga go ketla go tlhola go nna le Mokanana mo ntlong ya ga Jehofa wa masomosomo.