Go wa ga bagateledi
1Bula dikgoro tsa gago,
wena Lebanone, gore
molelo o tle o laile masetara a gago.
2Bokolela, wena setlhare sa mofira,
gonne mosetara o ole,
gonne tse dintle di sentswe;
bokolelang lona maoka a Bašane,
gonne sekgwa se se thata
se fologile.
3A kodu ya pokolelo ya badisa!
Gonne kgalalelo ya bone e sentswe;
a kodu ya go duma ga ditau!
Gonne boikgodiso jwa Joretane
bo sentswe.
Badisa ba babedi
4Jehofa Modimo wa me o bua jaana, a re: “Fudisang letsomane la tlhabo; 5le barui ba lone ba le tlhabang, mme ba ikaya ba se molato; le ba ba di rekisang, ba re: ‘A go bakweng Jehofa, gonne ke humile’; badisa ba tsone tota ga ba di tlhomogele pelo.
6“Gonne ga nketla ke tlhola ke tlhomogela banni ba lefatshe pelo,” go bua Jehofa; “mme bonang, ke tlaa tsenya mongwe le mongwe mo seatleng sa wa ga gabo, le mo seatleng sa kgosi ya gagwe; mme ba tlaa itaya lefatshe, mme ga nketla ke ba golola mo seatleng sa bone.”
7Jalo ka fudisa letsomane la tlhabo, ee, ruri tse di malolo tsa letsomane. Ka itseela dithobane di le pedi; nngwe ka e raya leina ka re: “Bontle,” e nngwe ka e raya leina ka re: “Diphapo”; mme ka fudisa letsomane. 8Ka kgaola badisa boo bararo ka kgwedi e le nngwe fela; gonne mowa wa me o ne o lapile ka bone, le mowa wa bone o ne wa nkila. 9Foo ka re: “Ga nketla ke lo fudisa; se se swang, a se swe; se se laoletsweng go kgaolwa a se kgaolwe; mme mo go tse di setseng a nngwe le nngwe e je nama ya e nngwe fela.” 10Mme ka tsaya thobane ya me, e bong Bontle, ka e pomaganya ka bogare, gore ke tle ke senye kgolagano ya me e ke e dirileng le ditšhaba tsotlhe. 11Mme ya rojwa ka tsatsi leo; jalo tse di malolo tsa letsomane tse di ntlhokometseng tsa itse fa e ne e le lefoko la ga Jehofa. 12Ka ba raya ka re: “Fa go le molemo mo go lona, lo nneye tuelo ya me; mme fa go sa nna jalo, lo ka lesa. Mme ba lekanya dipapetlana tsa selefera di le 30, e le tuelo ya me.”
13Mme Jehofa a nthaya, a re: “E latlhele mmopi wa dipitsa, e bong tlhwatlhwa e e molemo e ke e sekaseketsweng tlhwatlhwa ke bone.” Ka tsaya dipapetlana tsa selefera tse di 30, ka di latlhela mmopi wa dipitsa, mo ntlong ya ga Jehofa. 14Foo ka pomaganya thobane ya me e nngwe ka bogare, e bong Diphapo, gore ke tle ke senye bokaulengwe gare ga Juta le Iseraele.
15Mme Jehofa a nthaya, a re: “Itseele gape dilo tsa modisa yo o seeleele. 16Gonne bona, ke tlaa tsosa modisa mo lefatsheng yo o se ketlang a lekola tsone tse di kgaotsweng, le fa e le go batla tsone tse di faletseng, le fa e le go alafa tse di robegileng; le gone ga a ketla a fudisa tsone tse di itekanetseng, mme o tlaa ja nama ya tse di nonneng, a gagoganye ditlhako tsa tsone. 17A bo go latlhega modisa yo o se nang molemo, yo o tlogelang letsomane! Tšhaka e tlaa nna mo letsogong la gagwe le mo leitlhong la gagwe le legolo; letsogo la gagwe le tlaa omelelela ruri, leitlho la gagwe le legolo le tlaa fifalela ruri.”
