BAROMA 14

₁Yo o bokoa mo tumelong lo mo amogele, e seng go tsena mo dikgannyeng tse di belaesegang. ₂Motho mongwe o na le tumelo ya go ja dilo tsotlhe; mme yo o bokoa a je merogo fela. ₃Yo o jang fela, a a se nyatse yo o sa jeng; le yo o sa jeng, a se ka a sekisa yo o jang fela; gonne Modimo o mo tshotse. ₄O mang wena yo o sekisang motlhanka wa yo mongwe? Go ema le go wa ga gagwe, e ntse ke ga morena wa gagwe. Ee, o tlaa emisiwa; gonne Morena o na le nonofo ya go mo emisa.

₅Motho mongwe o tlotla letsatsi lengwe bogolo go le lengwe; yo mongwe a tlotle malatsi otlhe, a tshwane fela. A motho mongwe le mongwe a ikutlwele ruri mo pelong ya gagwe. ₆Yo o tlotlang letsatsi, o le tlotlela Morena; le yo o jang fela, o jela Morena, gonne o leboga Modimo; le yo o sa jeng, o a ba a sa jele Morena, mme a leboge Modimo. ₇Gonne ga go ope wa rona yo o itshelelang fela, e bile ga go ope yo o itshwelang fela. ₈Gonne le fa re tshela, re tshelela Morena; mme le fa re swa, re swela Morena; ke gone, le fa re tshela, kgotsa re swa, re ntse re le ba Morena fela. ₉Gonne Kereste o swetse gone moo, a ba a tloga a tshela, gore a tle a nne Morena wa baswi le wa batshedi. ₁₀Mme wena, ana o sekisetsang wa gaeno? E bile o nyaletsang wa gaeno e ntse e le wena fela? Gonne rotlhe re tlaa ema fa pele ga senno sa tshekelo sa Modimo. ₁₁Gonne go kwadilwe ga twe: “Jaaka ke tshedile,” go bua Morena, “mangole otlhe a tlaa nkhubamela, le diteme tsotlhe di tlaa ipolelela Modimo.” ₁₂Ke gone jalo, mongwe le mongwe wa rona o tlaa ikarabela Modimo.

₁₃Ke gone, a re se tlholeng re sekisanya, mme bogolo lo akanye mo, gore: Motho ope a se ka a baya sekgopi mo tseleng ya wa ga gabo, le fa e le se se ka mo digang. ₁₄Ke a itse, ke bile ke a tlhomamisa ka Morena Jesu, fa go se sepe se se itshekologileng ka sosi; fa e se go re yo o kayang sengwe fa se itshekologile, mo go ene se itshekologile. ₁₅Gonne fa wa gaeno a hutsafala ka ntlha ya dijo, ga o tlhole o sepela mo loratong. O se ka wa senya ka dijo tsa gago ene yo Keresete o mo swetseng. ₁₆Ka re, a molemo wa lona o se bolelwe ka bosula; ₁₇gonne bogosi jwa Modimo ga se go ja le go nwa, mme ka tshiamo, le kagiso, le boitumelo mo Moweng o o Boitshepo. ₁₈Gonne ene yo o direlang Keresete mo go ntseng jalo, o kgatlha Modimo, o bile o lebosega mo bathong.

₁₉Jalo a re lateleng dilo tse di diranang le kagiso, le dilo tse re ka agelelanang ka tsone. ₂₀Lo se ka lwa rutlolola tiro ya Modimo ka ntlha ya dijo. Le gale dilo tsotlhe di itshekile; le fa go ntse jalo go bosula mo mothong yo o jang ka go kgopisa yo mongwe. ₂₁Go le go ja nama, go le go nwa bojalwa jwa mofine, le gotlhe mo wa gaeno o kgopiwang ka gone, go molemo go kgaogana nago. ₂₂Tumelo e o nang nayo, a e nne ya gago fela fa pele ga Modimo. Go sego motho yo o sa itshekiseng mo go se o dumalanang naso. ₂₃Yo o jang a belaela, o a sekisiwa, ka a sa je ka tumelo, mme le fa e le eng se e seng sa tumelo, ke boleo.