Pesalema 98

₁A ko lo opeleleng Jehofa

sefela se seša; gonne

o dirile dilo tse di gakgamatsang;

seatla sa gagwe se segolo

se mo diretse poloka

le lone letsogo la gagwe

le le boitshepo.

₂Jehofa o itsisitse batho

poloka ya gagwe;

tshiamo ya gagwe o e bonaditse

ka tshenolo mo matlhong a merafe.

₃O gakologetswe boutlwelobotlhoko

jwa gagwe,

le boikanngo jwa gagwe

ka ga ntlo ya Iseraele;

dikhutlo tsotlhe tsa lefatshe

di bonye poloka ya Modimo

wa rona.

₄Tshelela Jehofa lešoa la boitumelo,

wena lefatshe lotlhe;

ponyegang lo opele ka boitumelo;

ee, opelang dipako.

₅Opelelang Jehofa dipako ka harepe;

ka harepe le ka lentswe la kopelo.

₆Ka dinaka le ka modumo

wa diphala,

lo tsheleng lešoa la boitumelo

fa pele ga Kgosi Jehofa.

₇A lewatle le sume,

le bojotlhe jwa lone;

lefatshe le ba ba agileng mo go lone;

₈a merwalela e opaope diatla

tsa yone;

a dithabana di opele mmogo

ka boitumelo;

₉fa pele ga Jehofa

gonne o tla go atlhola lefatshe;

o tlaa atlhola lobopo ka tshiamo

le ditšhaba ka tekatekanyo.