Pesalema 94

₁Jehofa,

wena Modimo o pusoloso

e leng ya gago,

wena Modimo o pusoloso e leng

ya gago, betlamela ntle.

₂Wena moatlhodi wa lefatshe,

itsholetse;

naya ba bopelompe maduo a bone.

₃Jehofa, baikepi ba tlaa nna goleele

go le kaye;

baikepi ba tlaa ja koma goleele

go le kaye?

₄Ba a balabala,

ba bua ka boitelaganyo;

badira tshiamololo botlhe

ba a ipelafatsa.

₅Ba phatlakanya batho ba gago,

Jehofa;

ba tlhokofatsa boswa jwa gago.

₆Ba tle ba bolaye mosadi wa

motlholagadi le moeng ba swe,

ba matle masiela.

₇Mme ba re:

“Jehofa ga a ketla a bona,

le gone Modimo wa ga Jakobe

ga o ketla o tlhokomela.”

₈Tlhokomelang,

lona ba lo leng dieleele mo bathong;

le lona masilo lo tlaa tlhalefa leng?

₉Ene yo o tlhomileng tsebe,

a ga a ketla a utlwa?

Ene yo o bopileng leitlho,

a ga a ketla a bona?

₁₀Ene yo o otlhayang merafe,

a ga a ketla a siamisa,

e bong ene yo o rutang motho kitso?

₁₁Jehofa o itse megopolo ya motho

fa e le lefela fela.

₁₂Go sego monna yo o mo otlhayang,

Jehofa,

o mo ruta ka molao wa gago;

₁₃gore o tle o mo neye

go ikhutsetsa metlha ya pitlagano,

go tsamaye lemena le epelwe

baikepi.

₁₄Gonne Jehofa ga a ketla a latlha

batho ba gagwe, le gone

ga a ketla a tlhala boswa jwa gagwe.

₁₅Gonne katlholo e tlaa boela

mo tshiamong;

le botlhe ba ba thokgameng mo

pelong ba tlaa e sala morago.

₁₆E mang yo o tlaa nkemang nokeng

a ntlhabantsha le badira bosula?

E mang yo o tlaa nkemelang

a ntlhabantsha le badira boikepo?

₁₇Fa Jehofa a ka bo a se ka a nna

thuso ya me,

mowa wa me o ka bo o akofile

wa aga mo tidimalong.

₁₈E rile ke re:

“Lonao lwa me lo a relela,”

boutlwelobotlhoko jwa gago Jehofa,

jwa ntshegetsa.

₁₉Mo bontsing jwa megopolo ya me

e e mo teng ga me,

dikgomotso tsa gago

di tle di jese mowa wa me monate.

₂₀A bonno jwa tshiamololo

bo tlaa amogana nao,

e le se se baakanyang bosenyi

ka molao?

₂₁Ba iphuthela mowa wa mosiami,

ba ba ba sekisa batho

ba ba se nang molato.

₂₂Jehofa e ntse e le ene kago ya me

e e godileng ya phemelo;

le Modimo wa me e ntse ke one

lefika la botshabelo jwa me.

₂₃Mme o ba lereditse

boikepo jwa bone tota,

o tlaa ba kgaola

ba le mo bosuleng jwa bone tota;

Jehofa, Modimo wa rona

o tlaa ba kgaola.