Pesalema 8

₁Jehofa, Morena wa rona,

a bo leina la gago le le lentle

mo lefatsheng lotlhe!

Wena yo o tlhomileng kgalalelo

ya gago godimo ga magodimo.

₂O theile nonofo

ka a a tswang melomong ya banyana

le ba ba anyang,

ka ntlha ya baganetsi ba gago,

gore o tle o didimatse mmaba

le mmusolosi.

₃E a re fa ke akanya

magodimo a gago,

tiro ya menwana ya gago,

kgwedi le dinaledi

tse o di baakantseng;

₄kana motho e be e le eng,

fa e bo ne ne o mo gopola,

le morwa motho,

fa e bo ne ne o mo lekola?

₅Gonne o mo fokoditse boemo

go le gonnye fela mo Modimong,

wa mo rwesa kgalalelo le tlotlo.

₆Wa mo naya taolo mo ditirong

tsa diatla tsa gago;

o beile dilo tsotlhe

tlase ga dinao tsa gagwe;

₇dinku tsotlhe le dikgomo,

ee, le tsone ditshedi tsa naga;

₈dinonyane tsa loapi

le ditlhapi tsa lewatle,

sengwe le sengwe se se ralalang

mawatle ka ditsela tsa one.

₉Jehofa, Morena wa rona,

ana leina la gago le lentle jang

mo lefatsheng lotlhe fela!