Pesalema 58

₁A ruri lo tle lo bue tshiamo

ka go didimala?

A lo tle lo atlhole ka thokgamo,

lona bana ba batho?

₂Ee, lo dira tshiamololo mo pelong;

lo lekanyetsa go thubaka ga diatla

tsa lona kwa ntle mo lefatsheng.

₃Baikepi ba sa le ba nna ba sele

ba sa tswa sebopelong;

ya re ba sa ntse ba belegwa

ba timele ka go bua maaka.

₄Botlhoko jwa bone

bo tshwana le botlhoko jwa noga;

ba tshwana le lebolobolo

le le sa utlweng,

le le thibang tsebe ya lone,

₅e le le le sa reetseng

lentswe la batshereanyi,

le fa go ka tshereanngwa

ka botlhale jo bo ntseng jang.

₆Roba meno a bone, Modimo,

mo melomong ya bone;

roba, o ntshe meno a matona a

ditawana, Jehofa.

₇A ba nyelele

jaaka metsi a a seselang;

e tle e re a kaya metswi ya gagwe,

e nne jaaka ekete e pomilwe.

₈A ba nne jaaka kgopa

e e tlhapologang e ba e nyelela,

jaaka tshenyegelo ya mosadi,

e e se kang ya bona letsatsi.

₉E re pele dipitsa tsa lona

di e se di utlwe molelo wa mitlwa,

o tlaa e tlosa ka setsuatsue,

e e metsi le e e tukang mmogo.

₁₀Mosiami o tlaa itumela

mogang o bonang pusoloso;

o tlaa itlhapisa dinao

mo mading a baikepi.

₁₁Jalo batho ba bo ba tlaa re:

“Ruri go na le tuelo e e nnetseng

mosiami; ruri Modimo o gone

o o atlholang mo lefatsheng.”