Thapelo ya phodiso
Pesalema ya ga Dafite. Ya moopedi yo mogolo.
1Go sego yo o gopolang
bahumanegi;
Jehofa o tlaa mo golola
mo motlheng wa bosula.
2Jehofa o tlaa mo tlamela,
a ba a mo tshedisa,
mme o tlaa segofala mo lefatsheng.
O se ka wa mo neela
mo go rateng ga baba ba gagwe.
3Jehofa o tlaa mo oka
a le mo bolaong jwa topetego;
o a tle o mo alele bolao jwa gagwe
gotlhe fela mo bolwetseng
jwa gagwe.
4Ke rile: “Jehofa,
a ko o nkutlwele botlhoko;
fodisa mowa wa me;
gonne ke go leofetse.”
5Baba ba me ba bua bosula ka ga me,
ba re: “O tlaa swa leng ne,
leina la gagwe la nyelela?”
6Ya re fa a tsile go mpona,
a bue maaka;
pelo ya gagwe e ikgobokanyetse
boikepo;
a re a tswela kwa ntle
a bo bolele fela.
7Botlhe ba ba nkilang
ba sebetsanya ka ga me;
ba ntogela maano
a go nkutlwisa bothloko.
8Ba re:
“O kgomaretswe ke botlhoko jo bo
maswe, jaaka a rapame jaana,
ga a ketla a tlhola a tsoga.”
9Ee, tsala ya me
e ke tlwaelanyeng nayo,
e ke ne ke e ikantse,
e e neng ee ja dijo tsa me, e bile
e ntsholeleditse serethe sa yone.
10Mme wena, Jehofa,
a ko o nkutlwele botlhoko,
o ntsose,
gore ke tle ke ba ikeletse.
11Ke a itse ka mo
fa o itumela thata mo go nna,
ka go bo mmaba wa me
a sa njele koma.
12Ka ga me o ntse o nkokotletsa,
mo go tlhokeng molato ga me,
wa ntlhoma fa pele ga sefatlhogo
sa gago ka bosakhutleng.
13A go nne go bakwe Jehofa,
Modimo wa Iseraele,
go tswa kwa go se nang tshimologo
go ya kwa bosakhutleng.
A go nne jalo, fela jalo.
