Pesalema 34

₁Ke tlaa baka Jehofa ka metlha

yotlhe;

pako ya gagwe e tlaa nna ka gale

mo molomong wa me.

₂Mowa wa me o tlaa ipelafatsa

mo go Jehofa;

ba ba pelonolo ba tlaa go utlwela,

mme ba tlaa itumela.

₃A ko lo godiseng Jehofa le nna,

a re goletseng leina la gagwe

mmogo.

₄Ka batla Jehofa,

mme a nkaraba, a nkgolola

mo dipoifong tsa me tsotlhe fela.

₅Ba ne ba leba kwa go ene,

mme ba sa matlho;

difatlhogo tsa bone ga di ketla

di sosobagana gope.

₆Mohumanegi yo, o ne a bitsa,

mme Jehofa a mo utlwa, a mo golola

mo ditlalelong tsotlhe tsa gagwe.

₇Moengele wa ga Jehofa o thibelela

mo ntlheng tsotlhe

tsa ba ba mmoifang,

mme o a ba golola.

₈A ko lo lekeng

lo bone fa Jehofa a le molemo;

go sego monna yo o mo ikanyang.

₉A ko lo boifeng Jehofa,

lona baitshepi ba gagwe;

gonne ga go na go tlhoka

mo go ba ba mmoifang.

₁₀Ditawana di a tle di tlhoke,

di bolawe ke tlala;

mme ba ba batlang Jehofa bone,

ga ba ketla ba tlhoka sepe

se se molemo.

₁₁Ntlong lo ntheetseng bana ke lona,

ke tlaa lo ruta poifo ya ga Jehofa.

₁₂Ke ofe motho yo o eletsang botshelo,

a rata bontsi jwa malatsi,

gore a tle a bone molemo?

₁₃O kganele loleme lwa gago mo

bosuleng le dipounama tsa gago

mo go bueng tsietso.

₁₄Tlogela bosula,

mme o dire molemo;

batla kagiso, mme o e latelele.

₁₅Matlho a ga Jehofa a mo go ba ba

mmoifang, le ditsebe tsa gagwe

di kwa go goeng ga bone.

₁₆Sefatlhogo sa ga Jehofa se bifetse

ba ba dirang bosula,

go nyeletsa go gopolwa ga bone

mo lefatsheng.

₁₇Basiami ba ne ba goa,

mme Jehofa a utlwa, a ba golola

mo ditlalelong tsotlhe tsa bone.

₁₈Jehofa o gaufi

le ba ba pelo e phatlogileng,

o boloka ba ba mowa

o o ngomogileng.

₁₉Dipatikego tsa mosiami di dintsi;

mme Jehofa o mo golola

mo go tsone tsotlhe.

₂₀O boloka marapo otlhe a gagwe;

ga go na lepe la one

le le robegileng.

₂₁Bosula bo tlaa bolaya moikepi;

le ba ba ilang mosiami

ba tlaa sekisiwa.

₂₂Jehofa o rekolola mowa

wa batlhanka ba gagwe;

mo go ba ba mo ikanyang ga go na

bape ba ba tlaa bonwang molato.