Pesalema 29

₁Nayang Jehofa,

lona bomorwa ba ba thata,

nayang Jehofa kgalalelo le nonofo.

₂Nayang Jehofa kgalalelo

e e tshwanetseng leina la gagwe;

obamelang Jehofa

mo bontleng jwa boitshepo.

₃Lentswe la ga Jehofa

le mo godimo ga metsi;

Modimo wa kgalalelo

o dumisa maru,

e bong ene Jehofa

mo godimo ga metsi a magolo.

₄Lentswe la ga Jehofa le nonofile;

lentswe la ga Jehofa le tletse borena.

₅Lentswe la ga Jehofa

le roba ditlhare tsa masetara;

ee, Jehofa o robaganya masetara

a Lebanone.

₆O bile o a kalapisa jaaka namane;

Lebanone le Sirione

jaaka pholwana ya nare.

₇Lentswe la ga Jehofa le fatoganya

dikgabo tsa molelo.

₈Lentswe la ga Jehofa

le roromisa naga;

Jehofa o roromisa naga ya Kateša.

₉Lentswe la ga Jehofa

le tsadisa ditshephe,

le be le fotlhele dikgwa ruri;

mme mo tempeleng ya gagwe dilo

tsotlhe tsa re: “Kgalalelo!”

₁₀Jehofa o ne a dutse

e le kgosi kwa morwaleleng;

ee, Jehofa o dutse e le kgosi

ka bosakhutleng.

₁₁Jehofa o tlaa naya batho ba gagwe

nonofo;

Jehofa o tlaa segofatsa batho

ba gagwe ka kagiso.