Pesalema 111

₁Bakang Jehofa.

Ke tlaa ntshetsa Jehofa

malebogo ka pelo yotlhe ya me

mo lekgotleng la bathokgami,

le mo phuthegong.

₂Ditiro tsa ga Jehofa di kgolo,

di tlhotlhomisiwa ke botlhe

ba ba kgatlhegang mo go tsone.

₃Tiro ya gagwe ke tlotlo le borena,

mme tshiamo ya gagwe

e eme ka bosakhutleng.

₄O dirile gore ditiro tsa gagwe

tse di gakgamatsang di gakologelwe;

Jehofa o pelotshweu,

o tletse pelotlhomogi.

₅Ba ba mmoifang o ba neile dijo;

o tlaa nna a gakologelwa

kgolagano ya gagwe ka gale.

₆O supeditse batho ba gagwe thata

ya ditiro tsa gagwe,

ka go ba naya boswa jwa merafe.

₇Ditiro tsa diatla tsa gagwe

ke boammaaruri le tshiamiso;

dikaelo tsotlhe tsa gagwe

di tlhomame.

₈Di tlhomamisitswe ka bosakhutleng

le ka bosaengkae,

di dirilwe mo boammaaruring

le mo thokgamong.

₉O iseditse batho ba gagwe kgololo;

kgolagano ya gagwe

o e laoletse ruri;

leina la gagwe le boitshepo,

le a sisimogwa.

₁₀Go boifa Jehofa

ke tshimologo ya botlhale

botlhe ba ba dirang ka ga gone

ba na le tlhaloganyo e e molemo;

pako ya gagwe e eme

ka bosakhutleng.