Pesalema 11

₁Ke ikanya mo go Jehofa;

ana lo raya mowa wa me jang,

lo re:

“Tshabela kwa thabeng ya lona

jaaka dinonyane?

₂Gonne bonang,

aitse baikepi ba oba bora,

ba laela motswi wa bone

mo mogaleng wa bora,

gore ba tle ba re ba le mo lefifing

ba hule ba ba pelo di thokgameng.

₃E a re fa metheo e senngwa,

mosiami o ka dirang”?

₄Jehofa o mo tempeleng ya gagwe

e e boitshepo;

Jehofa, setulo sa gagwe sa bogosi

se mo legodimong;

matlho a gagwe a lebile bana ba batho,

dintshi tsa gagwe tsa matlho

di a ba leka.

₅Jehofa o leka basiami;

moikepi le yo o ratang go thubaka,

mowa wa gagwe o a ba ila.

₆O tlaa nesetsa baikepi meoko;

molelo le sulefura, le phefo e e fisang,

dilo tse, e tlaa nna senwelo sa bone

se ba se abetsweng.

₇Gonne Jehofa o siame;

o rata tshiamo;

bathokgami ba tlaa bona

sefatlhogo sa gagwe.