Pesalema 109

₁O se ka wa didimala

Modimo wa pako ya me;

₂gonne molomo wa baikepi,

le molomo wa tsietso,

ba o nkatlhamiseditse,

ba buile le nna ka loleme lwa maaka.

₃Ba ne ba ntikanyeletsa

ka mafoko a kilo,

ba tlhabana le nna ka bomo.

₄Nna ke lorato mo go bone,

mme bone ke baganetsi ba me;

mme ke ineela mo thapelong.

₅Ba ntueletse molemo ka bosula,

le lorato lwa me ka letlhoo.

₆Mo tlhomele motho yo o moikepi

go mo laola;

a moganetsi a mo eme

ka fa letsogong la gagwe le legolo.

₇A e re a atlholwa,

a tswe a le molato;

mme a morapelo wa gagwe

o fetoge boleo.

₈A malatsi a gagwe

a nne mabotlana;

mme a motho o sele

a tseye tirelo ya gagwe.

₉A bana ba gagwe

ba nne masiela fela,

le mosadi wa gagwe a nne

moswagadi fela.

₁₀A bana ba gagwe ba nne

bakaidikaidi, mme ba kope;

mme a ba senke sejo sa bone

kwa kgakala le matlotla a bone.

₁₁Mme a moikgagapeledi a phamole

gotlhe mo o nang nago;

a baeng ba ntshe mofufutso

wa gagwe thopo.

₁₂A go se nne ope yo o tlaa mo

direlang boutlwelobotlhoko;

le gone a go se nne ope yo o

tlhomogelang masiela a gagwe

pelo.

₁₃A losika lwa gagwe lwa kwa morago

lo kgaolwe; e tlaa re

mo losikeng lo lo rulaganang nalo

a leina la bone le phimolelwe ruri.

₁₄A boikepo jwa borraabo

bo gakologelwe ke Jehofa;

a boleo jwa ga mmaabo

bo se phimolelwe ruri.

₁₅A bo nne bo nne

fa pele ga Jehofa ka gale,

gore a tle a kgaole kgakologelo ya

bone mo lefatsheng.

₁₆Gonne a se ka a gakologelwa

go itshupa kutlwelobotlhoko,

mme a bogisa motho wa

mohumanegi, le wa motlhoki,

le wa pelo e e phatlogileng,

gore a ba bolaye.

₁₇Ee, a rata khutsakanyo,

mme e tsile mo go ene;

ga a ka a kgatlhwa ke go segofatsa,

ga bo go le kgakala le ene.

₁₈Le gone a ikapesa ka khutsakanyo

jaaka seaparo sa gagwe,

mme ya tla ya tsena

mo ditennyeng tsa gagwe

jaaka metsi, le jaaka lookwane

mo marapong a gagwe.

₁₉A e nne mo go ene

jaaka seaparo se o ipipang ka sone,

le jaaka moitlesi o o itlamang

ka one ka gale.

₂₀Eo ke yone tuelo

ya baganetsi ba me,

e e tswang mo go Jehofa,

le ya ba ba buang bosula

ka ga mowa wa me.

₂₁Mme nna, o ntirele,

wena Modimo, Morena,

ka ntlha ya leina la gago,

e re ka boutlwelobothloko jwa gago

bo le molemo, o nkgolole.

₂₂Gonne ke lehuma le botlhokwa,

le pelo ya me e tlhabilwe

mo teng ga me.

₂₃Ke ile, jaaka moriti o o felang;

ke akgwaakgwa jaaka tsie.

₂₄Mangole a me

a kgwetlhisiwa ke go tlhoka go ja;

le nama ya me e tlhorega monono.

₂₅Ke bile ke dule sekgobo

mo go bone; e a re ba mpona

ba thukhuthetse tlhogo tsa bone.

₂₆A ko o nthuse Jehofa

Modimo wa me; a ko o mpoloke

ka fa boutlwelongbotlhoko jwa gago;

₂₇gore ba tle ba itse

fa se e le seatla sa gago;

fa wena Jehofa o se dirile.

₂₈A ba hutsakanye,

mme wena o segofatse;

ba tlaa re ba ema

ba tlhajwe ke ditlhong,

motlhanka wa gago ene

o tlaa itumela.

₂₉A baganetsi ba me ba apesiwe

tlotlologo, mme a ba ipipe

ka ditlhong tsa bone jaaka ka kobo.

₃₀Ke tlaa ntshetsa Jehofa malebogo

a magolo ka molomo wa me;

ee, ke tlaa mmaka

fa gare ga bontsi jwa batho.

₃₁Gonne o tlaa ema motlhoki

ka fa letsogong le legolo,

gore a mo golole mo go bone

ba ba sekisang mowa wa gagwe.