Pesalema 107

₁A ko lo ntshetseng Jehofa

malebogo; gonne o molemo;

gonne boutlwelobotlhoko jwa gagwe

bo eme ka bosakhutleng.

₂A barekolodwi ba go Jehofa

ba bue jalo, ba o ba rekolotseng

mo seatleng sa moganetsi;

₃a ba phutha

a ba ntsha mo mafatsheng,

go tswa kwa botlhabatsatsi,

le kwa bophirimatsatsi,

kwa botsheka le kwa borwa.

₄Ba ne ba pholetha mo nageng

mo tseleng ya sekaka;

ga ba a ka ba bona motse ope

o o nnwang.

₅Ba le tlala le lenyora,

mowa wa bone wa idibala

mo go bone.

₆Foo ba goela kwa go Jehofa

mo tlalelong ya bone,

mme a ba golola a ba ntsha

mo dipitlaganong tsa bone.

₇Le gone a ba goga

ka tsela e e lolameng,

gore ba ye go fitlha

kwa motseng o o ka nnwang.

₈A bo batho ba ka ka ba baka Jehofa

ka ntlha ya molemo wa gagwe,

le ka ntlha ya ditiro tsa gagwe

tse di gakgamatsang

mo baneng ba batho!

₉Gonne o kgorisa mowa o o eletsang,

le mowa o o bolailweng ke tlala

o o kgorise ka molemo.

₁₀Ba ba neng ba dutse mo lefifing

le mo moriting wa loso,

ba bofetswe mo patikong

le mo tshiping;

₁₁e le ka gonne

ba rukhutlhetse mafoko a Modimo,

ba tswitla kgakololo

ya Mogodimodimo;

₁₂ke gone ka ntlha ya mo,

a pagolola pelo ya bone

ka muhuhutso; ba wa,

mme go se na ope yo o thusang.

₁₃Foo ba ikuela Jehofa

mo tlalelong ya bone,

mme a ba boloka, a ba ntsha

mo dipitlaganong tsa bone.

₁₄A ba ntsha mo lefifing

le mo moriting wa loso,

a komoganya dipofo tsa bone.

₁₅A bo batho ba ka ka ba baka Jehofa

ka ntlha ya molemo wa gagwe,

le ka ntlha ya ditiro tsa gagwe

tse di gakgamatsang

mo baneng ba batho!

₁₆Gonne o thubile ditswalo

tsa kgotlho,

a remaganya mephakalego ya tshipi.

₁₇Ba ba dieleele ba tle ba bogisiwe

ka ntlha ya ditlolo tsa bone,

le ka ntlha ya maikepo a bone.

₁₈Mowa wa bone

o feretlhwe ke dilo tsotlhe fela,

mme ba atamele kwa dikgorong

tsa loso.

₁₉Foo ba ikuele Jehofa

mo tlalelong ya bone,

mme a ba golole a ba ntshe

mo dipitlaganong tsa bone.

₂₀A ise lefoko la gagwe, a ba fodise,

a ba swatole mo ditshenyegong

tsa bone.

₂₁A bo batho ba ka ka ba baka Jehofa

ka ntlha ya molemo wa gagwe,

le ka ntlha ya ditiro tsa gagwe

tse di gakgamatsang

mo baneng ba batho!

₂₂A ba ise ditlhabelo tsa tebogo,

a ba kakanye ditiro tsa gagwe

ka go opela.

₂₃Ba ba fologelang kwa lewatleng

ka dikepe, ba tiro ya bone

e leng mo metsing a magolo;

₂₄bao, ba bona ditiro tsa ga Jehofa,

le dikgakgamatso tsa gagwe

mo bodibeng jo bo botengteng.

₂₅Gonne o a laola, mme a tsose

phefo e e matsubutsubu

e e kokomosang makhubu a yone.

₂₆Ba tlhatlogela kwa legodimong,

ba fologela gape kwa matennyeng;

mowa wa bone o nyere

o fele ka ntlha ya tlalelo.

₂₇Ba theekele, ba kgokgweetsege

jaaka motho yo o tagilweng,

mme ba felelwe ke maano otlhe

a bone.

₂₈Foo ba goele kwa go Jehofa

mo tlalelong ya bone,

mme a ba swatole

mo dipitlaganong tsa bone.

₂₉A ritibatse matsubutsubu,

makhubu a one a ba a tla

a tle a eme fela.

₃₀Foo ba ipele ka gobo ba iketlile;

jalo a ba gorosetse

mo bogorogelong jo ba ratang

ba bo ba le mo go jone.

₃₁A bo batho ba ka ka ba baka Jehofa

ka ntlha ya molemo wa gagwe,

le ka ntlha ya ditiro tsa gagwe

tse di gakgamatsang

mo baneng ba batho!

₃₂A ba ke ba mo goletse

le mo phuthegong ya sešaba,

ba mmake mo sennong

sa bagolwane.

₃₃O fetola dinoka naga fela,

le metswedi ya metsi

mmu o o nyorilweng;

₃₄le lefatshe le le matshebe

a le fetole sekaka se se letswai

ka ntlha ya boleo

jwa ba ba agileng mo go lone.

₃₅A fetole naga fela mogobe

o o metsi,

le lefatshe le le omeletseng

metswedi ya metsi.

₃₆A agise ba ba bolailweng ke tlala

gone, gore ba tle ba baakanye

motse o o ka nnwang;

₃₇ba jale masimo,

ba tlhome masimo a mafine,

mme ba iponele maungo a totafalo.

₃₈Le gone a ba segofatse,

ba tle ba nne ba ntsifale thata;

mme a sa leseletse dikgomo tsa bone

go ngobela.

₃₉Gape ba ngotlege,

ba kokobediwe ka patiko,

le tlalelo le bohutsana.

₄₀O gorometsa lonyatso

mo dikgosaneng,

a di pholethise mo dipoeng fela,

kwa go se nang tsela gone.

₄₁Le fa go ntse jalo,

motlhoki o tle a mmeye kwa

godimo kwa ntle ga pogiso,

a mo dire ditshika

jaaka letsomane.

₄₂Bathokgami ba tlaa go bona,

ba itumela; mme boikepo jotlhe

bo tlaa ithiba molomo wa jone.

₄₃Le fa e le bomang ba ba botlhale,

ba tlaa ela dilo tse tlhoko,

mme ba tlaa akanya

mautlwelobotlhoko a ga Jehofa.