Pesalema 102

₁A ko o utlwe morapelo

wa me, Jehofa,

mme a go goa ga me

go ke go fitlhe koo go wena.

₂O se ka wa mphitlhela

sefatlhogo sa gago

mo letsatsing la pitlagano ya me;

o ntshekegele tsebe;

e re mo letsatsing le ke bitsang

ka lone o nkarabe ka bonako.

₃Gonne malatsi a me

a nyelela jaaka mosi;

marapo a me le one

a a ša jaaka serumola.

₄Pelo ya me

e tapetegile jaaka bojang,

e swabile;

gonne ke lebala go ja sejo sa me.

₅Ka ntlha ya lentswe la go duma

ga me, marapo a me

a ngaparetse nama ya me.

₆Ke ntse jaaka khukara ya naga;

ke fetogile

jaaka morubisi wa marotobolo fela.

₇Ke ntse ke lebeletse,

mme ke fetogile jaaka thaga

e e ntseng e le nosi

mo setlhoeng sa ntlo.

₈Baba ba me ba tlhola ba nkgoba

ka letsatsi lotlhe;

ba ba itirang ditsenwa ka ga me

ba hutsakanya ka nna.

₉Gonne ke jele melora jaaka sejo,

ka tlhakanya se ke se nwang

le dikeledi.

₁₀Ke ka ntlha ya kgakatsego ya gago,

le kgalefo ya gago;

gonne o ntsholeditse

wa ntatlhela koo.

₁₁Malatsi a me a tshwana le moriti

o o yang go fela;

mme ke swabile jaaka bojang.

₁₂Mme wena, Jehofa,

o tlaa nnela ruri ka bosakhutleng;

le segopodiso sa gago

go ya ditshikatshikeng tsotlhe fela.

₁₃O tlaa nanoga

o utlwela Sione botlhoko;

gonne ke lobaka

lwa go mo tlhomogela pelo;

ee, lobaka lo lo laotsweng

lo fitlhile.

₁₄Gonne batlhanka ba gago

ba na le kgatlhego

mo majeng a gone,

ba tlhomogela lorole lwa gone pelo.

₁₅Jalo merafe e tlaa boifa

leina la ga Jehofa,

le dikgosi tsotlhe tsa lefatshe,

di tlaa boifa kgalalelo ya gago;

₁₆gonne Jehofa o tsosolositse Sione

go o aga;

o bonetse mo kgalalelong ya gagwe.

₁₇O tlhokometse morapelo

wa ba ba hotlhegileng

ba se na sepe,

ga a ka a nyatsa morapelo wa bone.

₁₈Moo, go tlaa kwalelwa

losika lo lo tlang;

mme tšhaba e e tlaa tlholwang

e tlaa baka Jehofa.

₁₉Gonne o okometse

a le kwa bogodimong

jwa felo ga gagwe ga boitshepo;

Jehofa o ne a lebile lefatshe

a le kwa legodimong;

₂₀go utlwa go fegelwa ga mogolegwi;

go hunolola ba ba laoletsweng loso;

₂₁gore batho ba tle ba bolele

leina la ga Jehofa mo Sione,

le pako ya gagwe mo Jerusalema;

₂₂mogang ditšhaba di phuthegileng

di le mmogo, le magosi,

go direla Jehofa.

₂₃O ne a koafatsa thata ya me

mo tseleng;

a khutsafatsa malatsi a me.

₂₄Ke ne ka re: “Modimo wa me we!

O se ka wa ntlosa

ke le fa gare ga malatsi a me;

aitse dinyaga tsa gago tsone,

di ya le ditshikatshika tsotlhe fela.

₂₅O sa le o thaya motheo

wa lefatshe bogologolo;

le magodimo

ke tiro ya diatla tsa gago.

₂₆Tsone di tlaa nyelela,

mme wena o tlaa nna fela;

ee, tseo tsotlhe

di tlaa onala jaaka seaparo;

o tlaa di fetola jaaka morepo;

mme di tlaa fetoga;

₂₇mme wena,

o ntse o ntse jaaka o ntse fela;

dinyaga tsa gago

ga di ketla di dira le bokhutlo.

₂₈Bana ba batlhanka ba gago

ba tlaa nna fela,

le losika lwa bone

lo tlaa tlhomamisiwa

fa pele ga gago.”