Poko ya botlhale
1A Botlhale ga a kue,
tlhaloganyo a ga a tsholetse
lentswe la gagwe?
2Kwa godimo ga mafelo
a a godimo fa tseleng,
fa ditselana di kopanelang gone,
o eme gone;
3fa dikgorong,
fa botsenong jwa motse,
fa go tsenwang ka mejako gone,
o kuela godimo; a re:
4“Ke kua lona banna;
lentswe la me
le buisa bana ba batho.
5Lona ba lo sa tlhalefang,
tlhaloganyang matseba,
le lona dieleele
lo nne pelo e e tlhaloganyang.
6Utlwang, gonne ke tlaa bua
dilo tse di gaisang mo go
feteletseng;
go tumologa ga dipounama tsa me
e tlaa nna ga dilo tse di siameng.
7Gonne molomo wa me
o tlaa bolela boammaaruri;
boikepo ke makgapha
mo dipounameng tsa me.
8Mafoko otlhe a molomo wa me
a mo tshiamong;
ga go na sepe se se sokameng,
le fa e le se se kgopo mo go one.
9A bonala sentle fela otlhe
mo go ene yo o tlhaloganyang,
a siame mo go ba ba bonang kitso.
10Tsholang thuto ya me,
e seng selefera;
le kitso bogolo go gouta
e e tlhophegileng.
11Gonne botlhale bo molemo bogolo
go diperela, mme dilo tsotlhe
tse motho o ka di eletsang
ga di na go tshwantshiwa le jone.
12Nna, botlhale,
ke dirile matseba boago jwa me,
ke tsoma kitso le pharologanyo.
13Go boifa Jehofa ke go ila bosula;
boikgodiso, le bogoma, le mokgwa
o o bosula le molomo o o lesoko,
ke dilo tse ke di ilang.
14Kgakololo ke ya me,
le kitso e e itekanetseng;
ke nna tlhaloganyo; ke na le thata.
15Dikgosi di busa ka nna,
le dikgosana di tlhoma molao
wa tshiamo ke nna.
16Dikgosana di laola ka nna
le bagolwane,
e bong baatlhodi botlhe ba lefatshe.
17Ke rata bone ba ba nthatang;
ba ba mpatlang ka tlhoafalo
ba tlaa mpona.
18Dikhumo ke na natso le tlotlo,
ee, dikhumo tse di tlhomameng,
le tshiamo.
19Loungo lwa me lo molemo bogolo
go gouta,
ee, bogolo go gouta e e itshekileng;
le totafalelo ya me bogolo
go selefera se se tlhophegileng.
20Ke sepela mo tseleng ya tshiamo,
mo gare ga ditselane tsa tshiamiso.
21Gore ba ba nthatang
ke ba jese boswa jwa dilo,
le gore ke tlatse matlo a bone
a a bayang mahumo.
22Jehofa o ne a na le nna
mo tshimologong ya tsela ya gagwe,
pele ga ditiro tsa gagwe
tsa bogologolo.
23Ke sa le ke emisiwa
kwa bosasimologeng kwa tlholegong,
lefatshe le ise le be le nne.
24E rile go se na ditsiba
tse di botengteng, ka tsalwa;
jale go se na metswedi
e e tletseng metsi.
25Pele dithaba di ise di itshetlele,
le pele ga dithabana, ka tsalwa.
26E rile a ise a dire lefatshe,
le fa e le dinaga, le fa e le
tshimologo ya lorole lwa lobopo,
27jale ka a etleetsa magodimo,
ka bo ke le gone.
Jale ka a baya tikwatikwe
mo bophadiphading
jwa setsiba se se boteng;
28e rile a tiisa loapi kwa godimo,
jale ka metswedi ya boteng
e pumpunyega;
29e rile a beela lewatle molelwane
wa lone, gore metsi
a tle a se ka a tlola taolo ya gagwe;
ya re a rala metheo ya lefatshe,
30foo ke ne ke le fa go ene,
jaaka motho yo e leng tlhogo ya tiro;
ke le natefelo ya gagwe ka malatsi
otlhe, ke ntse ke itumela
ka metlha yotlhe fa pele ga gagwe.
31Ka itumelela lefatshe la gagwe
le le nnwang;
natefelo ya me le yone
e le mo baneng ba batho.
32Ke gone jaana, bomorwaaka, ka re:
Ntheetsang, gonne go sego
ba ba tshegetsang ditsela tsa me.
33Utlwang thuto, lo tlhalefe,
mme lo se ka lwa e gana.
34Go sego motho yo o nkutlwang,
a ntse a lebeletse fa dikgorong
tsa me,
a ntse a letile fa mephakwaneng
ya mejako ya me.
35Gonne yo o mponang o bona
botshelo, mme o tlaa bona
botsalano mo go Jehofa.
36Mme yo o nteofelang o siamololela
mowa wa gagwe tota;
botlhe ba ba nkilang ba rata loso.”
