DIANE 5

₁Morwaaka, tlhokomela botlhale jwa me; sekegela tlhaloganyo ya me tsebe, ₂gore o tle o boloke pharologanyo, le gore dipounama tsa gago di tshegetse kitso. ₃Gonne dipounama tsa mosadi o sele di rotha sedinotshe, magalapa a gagwe a boleta bogolo go lookwane. ₄Mme bokhutlo jwa gagwe bo botlhoko jaaka longana, bo bogale jaaka tšhaka e e magale mabedi. ₅Dinao tsa gagwe di fologela mo losong; dikgato tsa gagwe di ya go tshwara Bobipo. ₆Jalo wa bo a sa wele tselana e e papannweng ya botshelo; ditsela tsa gagwe di raraanye, mme a ba a sa go itse.

₇Mme jaana bomorwaaka, ka re, Ntheetsang, mme lo se ka lwa tlogela mafoko a molomo wa me. ₈Katosetsa tsela ya gago kgakala nae, o se ka wa atamela mojako wa ntlo ya gagwe, ₉o ka tla wa naya ba sele tlotlo ya gago, le dinyaga tsa gago wa di abela tse di bolalome. ₁₀Ba sele ba ka tla ba kgora nonofo ya gago; le matsapa a gago a nna mo ntlong ya motho wa seeng; ₁₁mme wa lela mo bokhutlong jwa gago, motlhang nama ya gago e tlhoregang, le mmele wa gago, ₁₂wa re: “A bo nkile ka ila thuto, pelo ya me ya nyatsa jang kgalemelo; ₁₃le gone ga ke a utlwa lentswe la baruti ba me, le fa e le go sekegela ba ba nthutileng tsebe! ₁₄Ka batla go nna mo bosuleng jotlhe, mo gare ga phuthego le kokoano ya batho.”

₁₅Nwa metsi mo sedibeletsong se e leng sa gago, le metsi a a elang mo motsweding o e leng wa gago. ₁₆A metswedi ya gago e tshwanetse go tšheamela koo kwa ntle, le dinoka tsa metsi go ya le mebila fela? ₁₇A e nne tsa gago o le wesi, mme e seng tsa ba sele nao. ₁₈A motswedi wa gago o nne sego; mme o itumele mo mosading wa bokau jwa gago. ₁₉Jaaka tshephe e namagadi e e lorato, le jaaka lefele le le namagadi le le natefang, a mabele a gagwe a go thethebatse ka metlha yotlhe, o nne o tlhapelwe ke lorato lwa gagwe ka metlha yotlhe. ₂₀Kana morwaaka, o ka bo o ratelang go tlhapelwa ke mosadi yo o leng o sele, wa tlamparela sehuba sa mosadi wa seeng? ₂₁Gonne ditsela tsa motho di fa pele ga matlho a ga Jehofa, mme o lekalekanya ditselana tsotlhe tsa gagwe. ₂₂Moikepi o tlaa tshwarwa ke maikepo a gagwe tota, mme o tlaa tshegediwa ke megala ya boleo jwa gagwe. ₂₃O tlaa swa ka go tlhoka thuto; mme mo bogolong jwa bosilo jwa gagwe o tlaa timela.