DIANE 31

₁Mafoko a kgosi Lemuele; boitseanape jo mmaagwe o bo mo rutileng.

₂Ke eng, morwaaka? Ke eng wena ngwana wa sebopelo sa me? Ke eng, wena ngwana wa maikano a me? ₃O se ka wa naya basadi thata ya gago, le metsamao ya gago o se ka wa e naya sone se se senyang dikgosi. ₄Ga go a tshwanela dikgosi, Lemuele, ga go a tshwanela dikgosi go nwa bojalwa jwa mofine; ga go a tshwanela dikgosana, go re: “Bojalwa jwa mofine jo bo loileng bo kae?” ₅Gonne ba ka tla ba nwa, mme ba lebala molao, ba sokamisa tshiamiso ya bangwe ba ba pitlagantsweng. ₆Naya ene yo o gaufi le go swa bojalwa jo bo loileng, le bojalwa jwa mofine o bo neye ene yo o mowa o galakegang; ₇a a nwe, mme a lebale khumanego ya gagwe, mme a a se tlhole a gakologelwa matladika a gagwe.

₈O tumololele dimumu molomo wa gago, go tlhabanela botlhe ba ba tlogetsweng ba le mo tatlhegong. ₉Tumolola molomo, o atlhole ka tshiamo, o atlholele bahumanegi le batlhoki.

₁₀E mang yo o ka bonang mosadi yo o mokgwa o o iphaphileng? Gonne tlhwatlhwa ya gagwe e feta ya majana a a tlhokegang kgakala.

₁₁Pelo ya monna wa gagwe e mo ikantse, mme ga a ketla a tlhoka papadi.

₁₂O mo direla molemo e seng bosula, ka metlha yotlhe ya botshelo jwa gagwe.

₁₃O tle a senke bobowa le leloba, mme a dire ka bongwe fela jwa pelo ka diatla.

₁₄O ntse jaaka dikepe tsa moreki wa dilo; dijo tsa gagwe o tle a ye go di tsaya kwa kgakala.

₁₅Le gone o tle a tsoge go sa le bosigo, a neye ba ntlo ya gagwe dijo, le barweetsana ba gagwe tiro ya bone.

₁₆O tle a gopole tshimo, mme a e reke; a tlhome tshimo ya mafine ka papadi ya diatla tsa gagwe.

₁₇O ikokwaela mo lothekeng ka nonofo, a ithatafatse mabogo.

₁₈O lemoga fa tlhwatlhwa ya gagwe e na le papadi; lobone lwa gagwe ga lo time bosigo.

₁₉O tle a beye diatla mo selogong, diatla tsa gagwe di tshware letsogo la sone.

₂₀O tle a huporololele bahumanegi seatla; ee, a otlololele batlhoki mabogo.

₂₁Ga a boifele ba ntlo ya gagwe fa go le kapoko, gonne ba ntlo ya gagwe botlhe ba apere bohibidu jo bo letlhololo.

₂₂O itirela dialo tsa letsela le le dirilweng matsabatsaba; diaparo tsa gagwe ke leloba le le boleta le bohibidu jo bo mokgona.

₂₃Monna wa gagwe o itsiwe mo dikgotleng, fa a dutse mo bagolwaneng ba lefatshe.

₂₄O tle a dire diaparo tsa leloba, mme a di rekise; a neele moreki meitlamo.

₂₅Thata le tlotlego ke diaparo tsa gagwe; mme o tlaa tshega lobaka lo lo tlang.

₂₆O tumolola molomo wa gagwe ka botlhale; mme molao wa bopelonomi o bo o le mo lolemeng lwa gagwe.

₂₇O lebaleba mekgwa ya ba ntlo ya gagwe thata, mme ga a je dijo tsa podufalo.

₂₈Bana ba gagwe ba nanoge, ba mmitse mosegofadiwa; monna wa gagwe le ene a mmake a re:

₂₉“Bana bantsi ba basetsana ba dirile sentle, mme wena o ba gaisitse botlhe fela.”

₃₀Boeletsego ke tsietso le bontle ke boithamako, mme mosadi yo o boifang Jehofa, ene o tlaa bakwa.

₃₁Mo neye papadi ya diatla tsa gagwe, mme a ditiro tsa gagwe di mmake mo dikgotleng.