DIANE 29

₁Yo o reng a ntse a kgalemelwa mme a ithatafatsa thamo, o tlaa rojwa ka tshoganetso, mme e tlaa bo e le mo go se nang phodiso.

₂E re mogang basiami ba totang batho ba itumele, mme mogang moikepi o laolang batho ba fegelwe.

₃Motho yo o ratang botlhale o itumedisa rraagwe, mme yo o tsalanang le basadi ba diaka o senya thoto ya gagwe.

₄Kgosi e tlhomamisa lefatshe ka tshiamiso, mme yo o tsayang dineo ka patiko o a le ribegetsa.

₅Monna yo o hakang wa ga gabo ka puo e e borethe o ngamolela dinao tsa gagwe lotloa.

₆Mo tlolong ya motho yo o bosula go na le seru, mme mosiami ene o a opela a itumela.

₇Mosiami o tlaa tlhokomela mafoko a bahumanegi, mme moikepi ga a na tlhaloganyo ya go a itse.

₈Batho ba ba sotlang ba tle ba tutumise molelo mo motseng, mme batho ba ba botlhale ba thibosa bogale.

₉Fa monna yo o botlhale a na le kgang le motho yo o seeleele, le fa a le bogale, le fa a tshega, ga go ketla go nna boikhutso.

₁₀Ba ba nyorelwang madi a batho ba ila yo o itekanetseng, mme ka ga mothokgami ba rata go mmoloya.

₁₁Seeleele se tle se bolele bogale jotlhe jwa sone, mme motho yo o botlhale o a bo kganela a bo didimatse.

₁₂Fa molaodi a reetsa maaka, batlhanka ba gagwe botlhe ke baikepi.

₁₃Mohumanegi le mopatiki ba tle ba kopane; Jehofa o sedifatsa matlho a bone boo babedi.

₁₄Kgosi e e atlholang bahumanegi ka nnete, setulo sa yone sa bogosi se tlaa tlhomama ka bosakhutleng.

₁₅Thupa le kgalemelo di naya motho botlhale, mme ngwana yo o lesiwang fela o tlhabisa mmaagwe ditlhong.

₁₆E a re mogang baikepi ba tota, tlolo e gole, mme basiami ba tlaa leba go wa ga bone.

₁₇Otlhaya morwao, mme o tlaa go naya boikhutso; ee, o tlaa jesa mowa wa gago monate.

₁₈Kwa go se nang ponatshegelo gone, batho ba latlhe boithibo, mme yo o tshegetsang molao o sego.

₁₉Motlhanka o tle a gane go siamisiwa ka puo fela; gonne le fa a tlhaloganya ga a ketla a go tlhokomela.

₂₀A o bona motho yo o bonako mo puong ya gagwe? Go ka solofelwa seeleele bogolo go ene.

₂₁Yo o sa leng a godisa motlhanka wa gagwe mo bonyaneng jwa gagwe ka tlekeetso o tlaa mmona a bile a le morwawe mo bofelong.

₂₂Motho yo o bogale o tsosa kgang, le motho yo o gakalang o tletse ditlolo.

₂₃Boikgodiso jwa motho bo tlaa mo isa tlase, mme yo o mowa o kgobaletseng o tlaa bona tlotlo.

₂₄Yo o tlhakanetseng tiro le legodu o ikila mowa, mme o utlwa ikaniso, mme ga a bolele sepe.

₂₅Poifo ya motho e tle e lere seru, mme yo o ikanyang Jehofa o tlaa bolokega.

₂₆Batho ba le bantsi ba batla botsalano jwa molaodi, mme tshiamiso ya motho e tswa kwa go Jehofa.

₂₇Monna yo o sa siameng ke sefedisapelo mo basiaming, mme yo o siamang mo tseleng ke sefedisapelo mo baikeping.