DIANE 25

₁Tse le tsone ke diane tsa ga Solomone, tse banna ba ga Hesekia kgosi ya Juta ba di kwadileng ka menwana.

₂Ke tlotlego mo Modimong go loba selo, mme tlotlego mo dikgosing ke go tlhotlhomisa selo.

₃Mo go sa kankabediweng ke legodimo ka bogodimo, le lefatshe ka boteng, le pelo ya dikgosi.

₄Okola manyelo mo selefereng, mme motlhapolosi o tlaa tswelwa ke selwane. ₅Tlosa baikepi fa pele ga kgosi, mme setulo sa yone sa bogosi se tlaa tlhomamisiwa mo tshiamong.

₆O se ka wa itlotlomatsa fa pele ga kgosi, o se ka wa ema mo boemong jwa banna ba bagolo; ₇gonne go molemo o rewa go twe: “Tlhatlogela kwano,” bogolo go go isiwa kwa tlase fa pele ga kgosana e matlho a gago a e bonyeng.

₈O se ka wa potlakela go ya go lwa, ka e tlaa re fa wa gaeno a go tlhabisitse ditlhong, o ka tla wa se ka wa itse se o tlaa se dirang mo bofelong jwa gone.

₉Bua kgang ya gago le wa gaeno ka esi, mme o se ka wa bipolola leoma la motho yo mongwe, ₁₀ka gobo yo o go utlwang o ka tla a go kgala, mme kutlwalelo e e bosula ka ga gago e se ke e go tlogele.

₁₁Lefoko le le buiwang ka tebang ya lone, le tshwana jaaka boapole ba gouta mo dirotong tsa selefera.

₁₂Jaaka lenyena la gouta le sekgabisa sa gouta e e itshekileng, mokgalemi yo o botlhale o ntse jalo mo tsebeng e e utlwang.

₁₃Jaaka botsididi jwa kapoko mo motlheng wa thobo, morongwa yo o ikanyegang o ntse jalo mo go ba ba mo romang; gonne o rudisa mowa wa beng ba gagwe.

₁₄Jaaka maru le phefo mo go se nang pula, yo o ipelafatsang ka ga dineo tsa gagwe a aka, o ntse jalo.

₁₅Molaodi o tle a kgonwe ke motho a ikgapa ka bopelotelele, le loleme lo lo bonolo lo tle lo robe marapo.

₁₆A o bonye dinotshe? O je fela mo go go lekanyeng, ka o ka tla wa di kgora bobe, mme wa di tlhatsa. ₁₇A lonao lwa gago lo se tsene bobe mo ntlong ya wa gaeno; o ka tla wa mo lapisa, mme a go ila.

₁₈Motho yo o supang kako ka ga wa ga gabo ke molamu, le tšhaka, le motswi o o bogale.

₁₉Go ikanya motho yo o se nang boikanngo mo motlheng wa tlalelo, go tshwana jaaka leino le le robegetseng, le lonao lo lo lokologileng.

₂₀Jaaka motho yo o apolang kobo go le serame, le jaaka bojalwa jo bo bodila mo lobung, yo o opelelang pelo e e bohutsana o ntse fela jalo.

₂₁Fa mmaba wa gago a bolawa ke tlala, o mo fe dijo; fa a le lenyora o mo nose metsi; ₂₂gonne o tlaa bo o tlhatlaganya magala a molelo mo tlhogong ya gagwe, mme Jehofa o tlaa go duela.

₂₃Phefo ya Tshelamelapo e tlhola pula, go ntse jalo loleme lo lo sebang lo tle lo tsose sefatlhogo se se bifang.

₂₄Go molemo bogolo go nna mo kgokgotshong kwa godimo ga ntlo, bogolo go go aga le mosadi yo o omanang mo ntlong e e atlhameng.

₂₅Jaaka metsi a a tsididi mo mothong yo o lenyora, mafoko a a molemo a a tswang lefatsheng le le kgakala a ntse fela jalo.

₂₆Jaaka motswedi o o kgoberegileng, le sediba se se leswefaditsweng, motho yo o siameng yo o tlosolosiwang ke baikepi o ntse jalo.

₂₇Ga go molemo go ja dinotshe bobe, go ntse jalo ga se tlotlego mo bathong go ipatlela tlotlo.

₂₈Motho yo mowa wa gagwe o se nang bothibo, o tshwana le motse o o thubegileng, mme o se na lorako.