DIANE 23

₁E re fa o nnela go ja le molaodi, o gopole thata yo o fa pele ga gago; ₂mme fa o le motho yo o jang bobe, o ipeye thipa fa mometsong. ₃O se ka wa eletsa dimediwa fela tsa gagwe; ka e le dijo tse di tsietsang.

₄O se ka wa itapisetsa go humisiwa, khutlela botlhale jwa gago. ₅A o a bo o tlaa tlhoma matlho mo go sone se se seyong? Gonne ruri dikhumo di tle di itirele diphuka, jaaka ntswi yo motona yo o fofelang kwa legodimong.

₆O se ka wa ja dijo tsa yo o leitlho le bosula, le gone o se ka wa eletsa dimediwa fela tsa gagwe; ₇gonne jaaka a kaya mo teng ga gagwe, o ntse fela jalo, o go raya, a re: “Ja o nwe,” mme pelo ya gagwe ga e mo go wena. ₈Thathana e o e jeleng o tlaa ba o e tlhatsa, mme o timelwa ke mafoko a gago a a monate.

₉O se ka wa bua mo kutlong ya seeleele, gonne se tlaa nyatsa botlhale jwa mafoko a gago.

₁₀O se ka wa tlosa molelwane wa bogologolo, o bo o se ka wa tsena mo matlhagareng a masiela; ₁₁gonne morekolodi wa bone o thata; o tlaa ba ganelelela ka ga gago.

₁₂Tshegeletsa pelo ya gago mo thutong, le ditsebe tsa gago mo mafokong a kitso.

₁₃O se ka wa gana ka kwatlhao mo ngwaneng, gonne fa o mmetsa ka thupa ga a ketla a a swa. ₁₄Mmetse ka thupa, mme o tlaa golola mowa wa gagwe mo Bobipong.

₁₅Morwaaka, fa pelo ya gago e le botlhale, pelo ya me e tlaa itumela, e bong ya me; ₁₆ee, diphilo tsa me di tlaa ipela thata, motlhang molomo wa gago o buang dilo tse di siameng.

₁₇A pelo ya gago e se nne tshetlha ka ga baleofi: mme o tlhole mo go boifeng Jehofa motshegare otlhe; ₁₈gonne ruri go na le tuelo, le tsholofelo ya gago ga e ketla e kgaolwa.

₁₉Utlwa morwaaka, o nne botlhale, o bo o tsamaise pelo ya gago mo tseleng. ₂₀Se nne mo banwing ba bojalwa jwa mofine, le mo go ba ba bogagaru mo go jeng nama. ₂₁Gonne motagwi le yo o tlabuelang dijo ba tlaa humanega, le kotselo e tlaa apesa motho dikatana.

₂₂Reetsa rraago yo o go tsetseng, o bo o se ka wa nyatsa mmaago fa a tsofetse.

₂₃Reka boammaaruri, mme o se ka wa bo rekisa; ee, le botlhale, le thuto, le tlhaloganyo.

₂₄Rraagwe mosiami o tlaa ipela thata, le yo o tsalang ngwana yo o botlhale o tlaa bona boitumelo ka ga gagwe.

₂₅A borraago le mmaago ba itumele, le yo o go belegeng a ipele thata. ₂₆Morwaaka, nnaya pelo ya gago, mme a matlho a gago a natefelwe ke ditsela tsa me. ₂₇Gonne mosadi yo o seaka ke mosele o o boteng; le mosadi yo e leng o sele ke longope lo lo pitlaganyeng. ₂₈Ee, o tle a lalele jaaka senokwane, mme a ntsifatse ba ba bonongwane mo bathong.

₂₉E mang yo o nang le khutsego? E mang yo o nang le bohutsana? E mang yo o nang le dikgang? E mang yo o nang le ngongorego? E mang yo o nang le dintho tsa lefela? E mang yo o nang le bohidibu jwa matlho? ₃₀Ke ba ba diegang bobe mo bojalweng jwa mofine; ke ba ba lebalebang bojalwa jo bo tlhakantsweng. ₃₁O se ka wa leba bojalwa jwa mofine fa bo hubila, fa bo tsenya phafana mmala wa jone, fa bo tsekeela sentle. ₃₂Kwa bofelong bo tle bo lome jaaka noga, bo lome jaaka šaušawane. ₃₃Matlho a gago a tlaa bona dilo di sela fela, le pelo ya gago e tlaa bua dilo tse di lesoko. ₃₄Ee, o tlaa nna jaaka yo o robalang mo gare ga lewatle, kgotsa yaaka yo o robalang mo godimo ga pinagare ya mokoro. ₃₅O tlaa re: “Ba ntiteile, mme ga ke a ka ka utlwa botlhoko; ba mpeditse, mme ga ke a ka ka go utlwa; ke tlaa kubuga leng? Ke tlaa ba ke bo batla gape.”