DIANE 14

₁Mosadi mongwe le mongwe yo o tlhalefileng o aga ntlo ya gagwe, mme yo o seeleele o e rutlolola ka diatla tsa gagwe.

₂Yo o sepelang mo tshiamong ya gagwe o boifa Jehofa, mme yo o logwadi mo tseleng tsa gagwe o a mo nyatsa.

₃Mo molomong wa dieleele go na le thupa e e betsang boikgodiso, mme dipounama tsa ba ba tlhalefileng di tlaa ba boloka.

₄Kwa go se nang dikgomo gone, lesaka le tle le nne phepa fela, mme go nne totafalo e kgolo ka thata ya kgomo.

₅Mosupi wa boikanngo ga a ke a aka, mme mosupi wa tsietso o bilola maaka fela.

₆Mosotli o batla botlhale, mme ga a bo bone, mme kitso e bofefo mo go ene yo o nang le tlhaloganyo.

₇Tsena fa pele ga motho yo o seeleele, mme ga o ketla o lemoga mo go ene dipounama tsa kitso.

₈Botlhale jwa senokopela ke go tlhaloganya tsela ya sone, mme boeleele jwa dieleele ke tsietso.

₉Masilo a sotla ka boleo, mme mo bathokgaming go na le pelontle.

₁₀Pelo e ikitse bogalaka jwa yone, mme moeng ga a ke a itlhakanya le boitumelo jwa yone.

₁₁Ntlo ya moikepi e tlaa ribegediwa, mme mogope wa mothokgami o tlaa kgaba.

₁₂Go na le tsela e eketeng e siame mo mothong, mme bokhutlo jwa yone ke ditsela tsa loso.

₁₃Le mo setshegong pelo e tle e nne bohutsana, mme bokhutlo jwa tlhapelo ke mahumapelo.

₁₄Motenegi mo pelong o tlaa kgora ditsela tsa gagwe ka esi, le motho yo o molemo o tlaa ikgorisa ka esi.

₁₅Motho yo o sa tlhalefang o dumela lefoko lengwe le lengwe, mme senokopela se tle se itebe tsamao ya sone sentle.

₁₆Motho yo o botlhale o a boifa, mme a kgaogane le bosula, mme seeleele se dira ka makgakga, mme se ikgantshe.

₁₇Yo o bonako go galefa o tle a dire ka boeleele, le motho yo o maano a boikepo o a ilwa.

₁₈Ba ba sa tlhalefang ba ja boeleele boswa, mme ba ba bonokopela ba rwesiwa kitso mo tlhogong.

₁₉Ba ba bosula ba tle ba iname fa pele ga ba ba molemo, le baikepi fa dikgorong tsa basiami.

₂₀Mohumanegi o ilwa le ke wa ga gabo, mme mohumi o na le ditsala di le dintsi.

₂₁Yo o nyatsang wa ga gabo o a leofa, mme yo o tlhomogelang mohumanegi pelo go sego ene.

₂₂A ga ba timele ba ba logang bosula? Mme go tlaa nna boutlwelobotlhoko le boammaaruri kwa go ba ba logang molemo.

₂₃Mo tirong yotlhe go na le thuso; mme palabalo ya dipounama e isa fela mo khumanegong.

₂₄Serwalo sa tlhogo sa ba ba botlhale ke dikhumo tsa bone, mme boeleele jwa dieleele ke boeleele fela.

₂₅Mosupi wa ammaaruri o golola mewa ya batho, mme yo o bilolang maaka o tsosa tsietso.

₂₆Mo go boifeng Jehofa go na le boikanyo jo bo thata, mme bana ba gagwe ba tlaa dirana le botshabelo.

₂₇Go boifa Jehofa ke motswedi wa botshelo, ke go tlogela diru tsa loso.

₂₈Kgalalelo ya kgosi ke go dirana le bontsi jwa batho; mme tshenyego ya kgosana ke go tlhoka batho.

₂₉Ene yo o bonya ga galefa o na le tlhaloganyo e kgolo, mme yo o mowa o potlakang o godisa bosilo.

₃₀Pelo e e thethebetseng fela ke botshelo jwa nama, mme bopelotshetlha ke podiso ya marapo.

₃₁Yo o patikang mohumanegi o kgoba Mmopi wa gagwe, mme yo o tlhomogelang motlhoki pelo o a mo tlotla.

₃₂Moikepi o tlobelelwa mo go direng bosula ga gagwe, mme mosiami o na le tsholofelo mo losong lwa gagwe.

₃₃Botlhale bo ikhutsa mo pelong ya yo o nang le tlhaloganyo, mme se se mo botengnyeng jwa dieleele se a utlwadiwa.

₃₄Tshiamo e goletsa morafe, mme boleo ke kgobo mo tšhabeng nngwe le nngwe.

₃₅Natefo ya kgosi e lebanye le motlhanka yo o dirang ka botlhale, mme bogale jwa yone bo tukele ene yo o tlhabisang ditlhong.