DIPALO 15

₁Jehofa a bua le Moše, a re: ₂“Bua le bana ba Iseraele, o ba reye o re: E tlaa re lo sena go fitlha mo lefatsheng la maago a lona le ke le lo nayang, ₃lo rata go direla Jehofa tshupelo ka molelo, tshupelo e e fisiwang, kgotsa setlhabelo, go tla lo dirafatsa ikano nngwe, kgotsa e le tshupelo ya peleego fela, kgotsa e le mo medirong ya lona e e tlhomilweng, go tla lo direla Jehofa monko o o monate, ga matlhape kgotsa ga letsomane; ₄foo yo o isetsang Jehofa tshupelo ya gagwe, a a tlise tsupelo ya boupe jwa kilokerame e le nngwe fela, e tlhakanye le litara ya lookwane, ₅le bojalwa jwa mofine jwa tshupelo e e nowang, bo le litara e le nngwe fela, o tlaa bo baakanyetsa tshupelo e e fisiwang, kgotsa setlhabelo, o e pataganye le kwanyana nngwe le nngwe. ₆Kgotsa fa e le ga phelefu, o tlaa baakanya tshupelo ya boupe e le dikilokerame di le pedi, di tlhakanye le lookwane lo le dilitara di le 1,5. ₇O ise dilitara di le 1,5 tsa bojalwa jwa mofine, e le tshupelo e e nowang, ya monko o o monate mo go Jehofa. ₈E re fa o baakanya kgongwana ya tshupelo e e fisiwang, kgotsa ya setlhabelo, go tla o dirafatsa ikano nngwe, kgotsa e le ya ditshupelo tsa kagiso go Jehofa, ₉foo a pataganye kgongwana le tshupelo ya boupe e le dikilokerame di le tharo, di tlhakanye le dilitara di le pedi tsa lookwane. ₁₀Fa e le tshupelo e e nowang, o ise dilitara di le pedi tsa bojalwa jwa mofine, e le tshupelo e e dirwang ka molelo, e le ya monko o o monate mo go Jehofa.

₁₁“A kgongwana nngwe le nngwe e direlwe jalo, le phelefu nngwe le nngwe, le kwanyana e tonanyana nngwe le nngwe, le potsane nngwe le nngwe. ₁₂Jaaka palo e lo tlaa e baakanyang, lo tlaa direla nngwe le nngwe jalo ka fa palong ya tsone. ₁₃Botlhe ba ba tsaletsweng mo gae ba tlaa dira dilo tse ka mokgwa o, fa ba isa tshupelo e e dirwang ka molelo, ya monko o o monate mo go Jehofa. ₁₄Fa moeng a jakile mo go lona, kgotsa le fa e le mang yo o mo go lona go ya le dikokomana tsotlhe tsa lona, a rata go isa tshupelo e e dirwang ka molelo, ya monko o o monate mo go Jehofa, jaaka lo dira, le ene a a dire fela jalo. ₁₅Mo phuthegong tao a e nne nngwe fela ya lona le ya moeng yo o jakileng mo go lona, e le tao e e sa khutleng go ya le dikokomana tsa lona, jaaka lona lo ntse, moeng a nne jalo fa pele ga Jehofa. ₁₆Molao o nne mongwe fela le taolelo mo go lona, le mo moenyeng yo o jakileng mo go lona.”

₁₇Jehofa a bua le Moše a re: ₁₈“Bua le bana ba Iseraele, o ba reye o re: E tlaa re lo fitlha mo lefatsheng le ke lo isang kwa go lone, ₁₉e tlaa re fa loo ja dijo tsa lefatshe, lo isetse Jehofa tshupelo ya tsholetso. ₂₀Ga boupe jwa lona jwa ntlha jo bo dubilweng lo ise papetlana ya senkgwe e le tshupelo ya tsholetso, jaaka lo tle lo dire tshupelo ya tsholetso ya sebupi sa pholelo, lo se tsholetse jalo. ₂₁Ga boupe jwa lona jwa ntlha jo bo dubilweng lo tlaa isetsa Jehofa tshupelo ya tsholetso go ya le dikokomana tsotlhe tsa lona.

₂₂“E tlaa re fa lo ka leofa, lo sa tlhokomele ditaolo tse tsotlhe, tse Jehofa o di boleletseng Moše, ₂₃e bong tsotlhe tse Jehofa o di lo laoletseng ka seatla sa ga Moše, go simolola ka letsatsi le Jehofa o laotseng ka lone, go ya kwa pele le dikokomana tsotlhe tsa lona; ₂₄foo go tlaa diragala gore fa go dirilwe ka timelo fela kwa ntle ga kitso ya phuthego, phuthego yotlhe e ise kgongwana e le nngwe fela e le tshupelo e e fisiwang, go nna monko o o monate mo go Jehofa, e na le tshupelo ya yone ya boupe, le tshupelo ya yone e e nowang, ka fa mokgweng o laotsweng, le phoko e le nngwe fela ya tshupelo ya boleo. ₂₅A moperesiti a direle phuthego yotlhe ya bana ba Iseraele tetlanyo, mme ba tlaa itshwarelwa, gonne e ne e le timelo fela; ba lerile seromololo sa bone, tshupelo e e direlwang Jehofa ka molelo, le tshupelo ya bone ya boleo, ba di isitse fa pele ga Jehofa ka ga timelo ya bone. ₂₆Phuthego yotlhe ya bana ba Iseraele e tlaa itshwarelwa, le moeng yo o jakileng mo go bone, gonne ka ga batho botlhe go ne go dirilwe ka botlhokakitso.

₂₇“Fa motho a le mongwe fela a leofa ka timelo, foo a ise podi e namagadi ya ngwaga wa ntlha e le tshupelelo ya boleo. ₂₈Motho yo o timelang, mme e se ka bomo, moperesiti o tlaa mo direla tetlanyo fa pele ga Jehofa, mme o tlaa itshwarelwa. ₂₉Lo nne le molao o le mongwe fela wa yo o dirang sengwe ka go timela fela, wa yo o tsaletsweng mo gae mo baneng ba Iseraele, le wa moeng yo o jakileng mo go bone. ₃₀Motho yo o dirang sengwe ka boikgodiso, le fa e ka nna yo o tsaletsweng mo gae, kgotsa moeng, motho yoo o tlhapatsa Jehofa; motho yoo o tlaa kgaolwa a tswa mo bathong ba ga gabo. ₃₁Ka a nyaditse lefoko la ga Jehofa, a tlodile taolo ya gagwe, motho yoo a kgaolelwe ruri, boikepo jwa gagwe bo tlaa nna mo go ene.”

₃₂E rile bana ba Iseraele ba sa le mo nageng, ba fitlhela motho a rwalela ka letsatsi la Sabata. ₃₃Ba ba mo fitlhetseng a rwalela ba mo isa kwa go Moše le Arone, le kwa phuthegong yotlhe. ₃₄Ba mo tsenya mo tebelong, ka go ne go ise go bolelwe se o tlaa se dirwang. ₃₅Jehofa a raya Moše, a re: “Ruri motho yoo o tlaa bolawa; a phuthego yotlhe e mo kgobotletse ka maje kwa ntle ga bothibelelo.” ₃₆Phuthego yotlhe ya mo isa kwa ntle ga bothibelelo, ba mo kgobotletsa ka maje, a swa; jaaka Jehofa a laotse Moše.

₃₇Jehofa a bua le Moše, a re: ₃₈“Bua le bana ba Iseraele o ba laole gore ba itirele makantsa fa dintlheng tsa diaparo tsa bone, go ya le dikokomana tsotlhe tsa bone, mo makantseng a ntlha nngwe le nngwe ba beye mogala wa bobududu. ₃₉E nne lekantsa go lona, gore lo le lebe, lo itse go gakologelwa ditaolo tsotlhe tsa ga Jehofa, le go di dira; le gore lo se tsamayetsamaye fela ka fa dipelong tsa lona, le ka fa matlhong a lona, a lo ntseng lwa nna lwa a sala morago lwa ya go akafala, ₄₀gore lo gakologelwe ditaolo tsa me tsotlhe go di dira, le gore lo nne boitshepelo Modimo wa lona. ₄₁Ke nna Jehofa Modimo wa lona, yo ke lo ntshitseng mo lefatsheng la Egepeto, go nna Modimo wa lona, ke nna Jehofa Modimo wa lona.”