DIPALO 10

₁Jehofa a bua le Moše, a re: ₂“Itirele dinaka di le pedi tsa selefera; o di dire ka selefera se se papetlilweng ka noto; o tlaa dira ka tsone mo go bitseng phuthego, le mo go tsamayeng ga makoko. ₃E re ba di letsa, a phuthego yotlhe e phuthegele kwa go wena fa mojakong wa mogope wa bophuthegelo. ₄Fa ba letsa lo le longwe fela, foo dikgosana, ditlhogo tsa makgolokgolo a Iseraele, di phuthegele kwa go wena. ₅E re lo letsa go opa mokgosi, makoko a a nnang ntlheng ya botlhabatsatsi a a bothologe. ₆E re lo letsa mokgosi lwa bobedi, makoko a a nnang ntlheng ya borwa a a bothologe, e re go bothologwa, ba letse mokgosi. ₇Mme e re phuthego e phuthwa lo letse fela, lo se ka lwa letsa go opa mokgosi. ₈Baperesiti, bomorwa Arone, ke bone ba tlaa letsang dinaka; e nne molao mo go lona ka bosakhutleng go ya le dikokomana tsa lona. ₉E tle e re mo lefatsheng la lona, fa lo bolola ntwa lo ya go tlhabana le mmaba yo o lo patikang, foo lo tlaa letsa mokgosi ka dinaka; mme lo tlaa gakologelwa fa pele ga Jehofa Modimo wa lona, mme lo tlaa gololwa mo babeng ba lona. ₁₀Le gone e re mo letsatsing la go itumela ga lona, le mo medirong ya lona e e laotsweng, le mo go rogweng ga dikgwedi tsa lona, lo tlaa letsa dinaka godimo ga ditshupelo tse di fisiwang, le godimo ga ditlhabelo tsa ditshupelo tsa lona tsa kagiso; di tlaa nna segopodiso sa lona fa pele ga Modimo wa lona; ke nna Jehofa Modimo wa lona.”

₁₁Ga dirala ya re ka ngwaga wa bobedi ka kgwedi ya bobedi, ka letsatsi la 20 la kgwedi, leru la tsholediwa la tloga fa godimo ga motlaagana wa tshupo. ₁₂Bana ba Iseraele ba bothologa ka fa metsamaong ya bone ba tswa mo nageng ya Sinai; leru la nna mo nageng ya Parane. ₁₃Ba tloga lwa ntlha ka fa taolong ya ga Jehofa, ka seatla sa ga Moše. ₁₄Sa ntlha ga bothologa mokgele wa bothibelelo jwa bana ba ga Juta, ka fa masomosomong a bone; molaodi wa lesomosomo la gagwe e ne e le Našone morwa Aminatabe. ₁₅Molaodi wa lesomosomo la lotso lwa bana ba ga Isakare e le Nethanele morwa Suare. ₁₆Molaodi wa lesomosomo la lotso lwa bana ba ga Sebulone e le Eliabe morwa Helone.

₁₇Motlaagana wa tlhomololwa; bomorwa Gerešone le bomorwa Merari, ba ba rweleng motlaagana, ba bothologa. ₁₈Mokgele wa bothibelelo jwa ga Rubene wa bothologa ka fa masomosomong a bone. Molaodi wa lesomosomo la gagwe e ne e le Elisure morwa Shedure. ₁₉Molaodi wa lesomosomo la lotso lwa bana ba ga Simeone e ne e le Shelumiele morwa Surišatai. ₂₀Molaodi wa lesomosomo la lotso lwa bana ba ga Gate e le Eliasafe morwa Duele.

₂₁Baknhathe ba bothologa, ba rwele ntlo e e boitshepo, ba bangwe ba tlhoma metlaagana, ba e baakanyetsa go tla ga bone. ₂₂Mokgele wa bothibelelo jwa bana ba ga Eferaime wa bothologa ka fa masomosomong a bone; molaodi wa lesomosomo la gagwe e ne e le Elišame morwa Amihute. ₂₃Molaodi wa lesomosomo la lotso lwa bana ba ga Manase e ne e le Gamaliele morwa Petasure. ₂₄Molaodi wa lesomosomo la lotso lwa bana ba ga Benjamine e ne e le Abitane morwa Giteoni.

₂₅Mokgele wa bothibelelo jwa bana ba ga Dane ba e ne e le bone tshimega ya mabothologo otlhe, wa bothologa ka fa masomosomong a bone; molaodi wa lesomosomo la gagwe e ne e le Ahiesere morwa Amišatai. ₂₆Molaodi wa lesomosomo la lotso lwa bana ba ga Ašere e ne e le Pagiele morwa Okerane. ₂₇Molaodi wa lesomosomo la lotso lwa bana ba ga Nafetali e le Ahira morwa Enane. ₂₈Metsamao ya bana ba Iseraele ka fa masomosomong a bone ya nna jaana; mme ba bothologa.

₂₉Moše a raya Hobabe morwa Reuele wa Momidiane, mogwagadia Moše, a re: “Re etele kwa Jehofa o buileng ka ga gone, a re o tlaa go re naya. Tsamaya le rona, mme re tlaa go direla molemo, gonne Jehofa o boletse molemo ka ga Iseraele.” ₃₀A mo raya a re: “Ga ke tsamaye; ke tlaa itsamaela ke ya kwa lefatsheng la gaetsho, le kwa go bagaetsho.” ₃₁Mme a re: “Ke a go rapela, o se ka wa re tlogela; e tswa o itse ka fa re nang le go thibelela ka teng mo nageng, o tlaa nna mo boemong jwa matlho mo go rona. ₃₂Go tlaa diragala go re fa o tsamaya le rona, ee, go tlaa diragala go re le fa e ka nna molemo ofe o Jehofa o o re direlang, one re tlaa o direla wena.”

₃₃Ba tswelela mosepele wa malatsi a le mararo ba tswa thabeng ya ga Jehofa; mme letlole la kgolagano ya ga Jehofa la ba etelela pele mosepele wa malatsi a le mararo, la ya go ba senkela felo ga boikhutso. ₃₄E rile ba bothologa mo bothibelelong, leru la ga Jehofa la bo le ba okame motshegare.

₃₅Ga dirala e ne e tle e re letlole le bothologa, Moše a re: “A ko o nanoge Jehofa, a baba ba gago ba phatlaladiwe; a ba ba go ilang ba tshabe fa pele ga gago.” ₃₆E re le ikhutsa a re: “A ko o boe Jehofa; o boele mo makgolong a makgolokgolo a Iseraele.”