DIPALO 1

₁Jehofa a bua le Moše kwa nageng ya Sinai, mo mogopeng wa bophuthegelo, ka letsatsi la ntlha la kgwedi ya bobedi, ka ngwaga wa bobedi ba sena go tswa mo lefatsheng la Egepeto, a re: ₂“Dirang palo ya phuthego yotlhe ya bana ba Iseraele, ka ditshika tsa bone, ka dikgotla tsa borra ba bone, ka fa palong ya maina, lonna lotlhe, mongwe le mongwe wa bone, ka ditlhogo, ₃go simolola ka ba ba dinyaga di 20 ga ya kwa go bomogoloa bone, botlhe ba ba nonofileng go bolola ntwa mo Iseraele, wena le Arone lo ba bale ka fa masomosomong a bone. ₄A go dire le lona monna wa lotso longwe le longwe; mongwe le mongwe e le tlhogo ya kgotla ya borraagwe. ₅Mme a, ke one maina a banna ba ba tlaa emang le lona: Wa Rubene, Elisure morwa Shedure; ₆wa Simeone, Shelumiele morwa Surišatai; ₇wa Juta, Našone morwa Aminatabe; ₈wa Isakare, Nethanele morwa Suare; ₉wa Sebulone, Eliabe morwa Helone; ₁₀wa bana ba ga Josefe: wa Eferaime, Elišama morwa Amihute; wa Manase, Gamaliele morwa Petasure; ₁₁wa Benjamine, Abitane morwa Giteoni; ₁₂wa Dane, Ahiesere morwa Amišatai; ₁₃wa Ašere, Pagiele morwa Okerane; ₁₄wa Gate, Eliasafe morwa Duele; ₁₅wa Nafetali, Ahira morwa Enane.”

₁₆Ba ke bone ba phuthego, ba ba biditsweng, e le dikgosana tsa ditso tsa borraabo; e ne e le bone ditlhogo tsa masomosomo a Iseraele.

₁₇Moše le Arone ba tsaya banna bao ba ba boletsweng ka maina, ₁₈ba phutha phuthego yotlhe ka letsatsi la ntlha la kgwedi ya bobedi, mme ba bolela matso a bone, ka fa ditshikeng tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, mongwe le mongwe wa bone, ka ditlhogo. ₁₉Jaaka Jehofa a laotse Moše, a ba bala jalo mo nageng ya Sinai.

₂₀Bana ba ga Rubene motsalwapele wa ga Iseraele, dikokomana tsa bone ka ditshika tsa bone, ka dikgotla tsa borra ba bone, ka fa palong ya maina, mongwe le mongwe wa bone, lonna lotlhe, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₂₁ba ba badilweng mo go bone ba lotso lwa ga Rubene, e ne e le 46 500.

₂₂Ba bana ba ga Simeone, dikokomana tsa bone, ka ditshika tsa bone, ka dikgotla tsa borra ba bone, ba ba badilweng mo go bone ka fa palong ya maina, mongwe le mongwe wa bone, monna mongwe le mongwe yo o dinyaga di 20 go ya kwa go bomogoloa bone, botlhe ba ba nonofileng go bolola ntwa, ₂₃ba ba badilweng mo go bone ba lotso lwa ga Simeone, e ne e le 59 300.

₂₄Ba bana ba ga Gate, dikokomana tsa bone ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₂₅ba ba badilweng mo go bone, ba lotso lwa ga Gate, e ne e le 45 650.

₂₆Ba bana ba ga Juta, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₂₇ba ba badilweng mo go bone, ba lotso lwa ga Juta, e ne e le 74 600.

₂₈Ba bana ba ga Isakare, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₂₉ba ba badilweng mo go bone, ba lotso lwa ga Isakare, e ne e le 54 400.

₃₀Ba bana ba ga Sebulone, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₃₁ba ba badilweng mo go bone, ba lotso lwa ga Sebulone, e ne e le 57 400.

₃₂Ba bana ba ga Josefe, e bong ba bana ba ga Eferaime, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₃₃ba ba badilweng mo go bone, ba lotso lwa ga Eferaime, e ne e le 40 500.

₃₄Ba bana ba ga Manase, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₃₅ba ba badilweng mo go bone, ba lotso lwa ga Manase, e ne e le 32 200.

₃₆Ba bana ba ga Benjamine, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₃₇ba ba badilweng mo go bone, ba lotso lwa ga Benjamine, e ne e le 35 400.

₃₈Ba bana ba ga Dane, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₃₉ba ba badilweng mo go bone, ba lotso lwa ga Dane, e ne e le 62 700.

₄₀Ba bana ba ga Ašere, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₄₁ba ba badilweng mo go bone ba lotso lwa ga Ašere, e ne e le 41 500.

₄₂Ba bana ba ga Nafetali, dikokomana tsa bone, ka ditshika tsa bone, ka dikgotla tsa borra ba bone, ka fa palong ya maina, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa, ₄₃ba ba badilweng mo go bone ba lotso lwa ga Nafetali, e ne e le 53 400.

₄₄Ba ke bone ba ba badilweng, ba Moše le Arone ba ne ba ba bala ba na le dikgosana tsa Iseraele, e le banna ba le 12; mongwe le mongwe a emetse kgotla ya borraagwe. ₄₅Botlhe ba ba badilweng ba bana ba Iseraele ka dikgotla tsa borra ba bone, go simolola ka ba ba dinyaga di 20 go ya kwa go bomogoloa bone, botlhe ba ba nonofileng go bolola ntwa mo Iseraele, ₄₆e bong bone botlhe ba ba badilweng e ne e le 603 550.

₄₇Mme Balefi ka fa lotsong lwa borra ba bone ga ba a ka ba balelwa mo go bone. ₄₈Gonne Jehofa o ne a buile le Moše a re: ₄₉“Lotso lwa ga Lefi ke lone losi lo o se ketlang o lo bala, le gone o se ka wa tsaya palo ya bone mo baneng ba Iseraele. ₅₀Mme o tlhome Balefi mo tebelong ya motlaagana wa tshupo, le mo tebelong ya dilo tsotlhe tse di nnang mo go one, le mo tebelong ya dilo tsotlhe fela tse e leng tsa one; ba rwale motlaagana le dilo tsotlhe tse di nnang mo go one; ba o direle; ba thibelele mo tikologong ya motlaagana. ₅₁Fa motlaagana o na le go tswelela kwa pele, a Balefi ba o tlhomolole, mme fa motlaagana o na le go tlhongwa, a Balefi ba o tlhome; mme moeng yo o o atamelang a a bolawe. ₅₂A bana ba Iseraele ba tlhome megope ya bone, mongwe le mongwe fa bothibelelong jwa gagwe, le mongwe le mongwe fa mokgeleng wa gagwe, ka fa masomosomong a bone. ₅₃Mme a Balefi ba tlhome mo tikologong ya motlaagana wa tshupo, gore go se wele bogale mo phuthegong ya bana ba Iseraele; a Balefi ba lebele motlaagana wa tshupo.” ₅₄Bana ba Iseraele ba ne ba dira jalo; jaaka tsotlhe tse Jehofa o di laoletseng Moše, ba dira fela jalo.