MAREKO 4

₁Gape a simolola go ruta fa lewatleng. Ga bo go phuthegetse kwa go ene bontsi jo bogolo jwa batho, a ba a tla a tsena mo mokorong, a dula mo lewatleng; mme bontsi jotlhe jwa bo bo ikamile lewatle, bo le mo lefatsheng. ₂Mme a ba ruta dilo di le dintsi ka ditshwantsho. Mo thutong ya gagwe a ba raya a re:

₃“Reetsang. Bonang, mojadi o kile a tswa a ya go jala. ₄Mme ga dirala, ya re a ntse a jala, ditlhaka dingwe tsa wela fa tseleng, mme dinonyane tsa tla, tsa di sela. ₅Tse dingwe tsa wela fa go leng matlapa, fa go leng mmu o mosesane teng; mme tsa akofa tsa tlhaba, ka di se mo mmung o o boteng; ₆mme e rile letsatsi le sena go gotela, tsa ša, mme ka di se na medi tsa omelela fela. ₇Tse dingwe tsa wela mo mitlweng, mme mitlwa ya gola, ya di hupetsa, mme di se ka tsa ungwa sepe. ₈Tse dingwe tsa wela mo mmung o o molemo, tsa ungwa ka di gola di ata; tsa tsala, tsa nna 30, le 60, le 100.” ₉Mme a re: “Yo o nang le ditsebe go utlwa, a a utlwe.”

₁₀Mme e rile a le esi, ba ba fa go ene ba na le ba ba 12, ba mmotsa ka ga ditshwantsho. ₁₁Mme a ba raya a re: “Lona lo neilwe bosaitsiweng jwa bogosi jwa Modimo, mme bone ba ba kwa ntle, dilo tsotlhe ba di direlwa ka ditshwantsho, ₁₂gore ka go bona ba bone, mme ba se ka ba lemoga; le ka go utlwa ba utlwe, mme ba se ka ba tlhaloganya, e se re kgotsa ba sokologa, mme ba go itshwarelwa.”

₁₃A ba raya a re: “A ga lo itse setshwantsho se? Mme lo tlaa itse jang ditshwantsho tsotlhe? ₁₄Mojadi o jala lefoko. ₁₅Ba ke bone ba ba fa tseleng, kwa lefoko le jalwang teng. Mme e a re ba sena go utlwa, Satane a akofe a tle, a tlose lefoko le le jadilweng mo go bone. ₁₆Jalo le bone ba ba jadilweng fa go matlapa, ke ba e a reng ba sena go utlwa lefoko, ba akofe ba le tshole ka boitumelo; ₁₇mme ga ba na modi mo go bone ka bosi, ba tle ba eme ka lobakanyana fela; e re mogang go tsogang patikego, kgotsa pogiso, ka ntlha ya lefoko, ba akofe ba kgopiwe. ₁₈Ba bangwe ke ba ba jadilweng mo mitlweng; bao ke ba ba utlwileng lefoko; ₁₉mme go bapalwa ke lefatshe, le tsietso ya mahumo, le dithato tsa dilo tse dingwe, di hupetse lefoko, mme ba ungologe. ₂₀Mme ba ke ba ba jadilweng mo mmung o o molemo; ba utlwa lefoko, ba le tshole, ba ungwe 30, le 60, le 100.”

₂₁A ba raya a re: “A lobone lo tle lo tlisiwe gore lo huhumediwe tlase ga seelo, kgotsa ka fa tlase ga bolao? A ga se gore lo tlhongwe mo setlhomong? ₂₂Gonne ga go a subiwa sepe, fa e se gore se tle se senolwe, le gone ga go a ka ga lobiwa sepe, fa e se gore se tle se tswele mo leseding. ₂₃Fa motho le fa e le mang a na le ditsebe go utlwa, a utlwe.”

₂₄A ba raya a re: “Lo tlhokomele se lo se utlwang; selekanyo se lo lekanyang ka sone, lo tlaa lekanyediwa ka sone fela; mme lo tlaa okelediwa. ₂₅Gonne yo o nang le sengwe, ene o tlaa newa; mme yo o se nang sepe, le se o nang naso o tlaa se tseelwa.”

₂₆Mme a re: “Bogosi jwa Modimo bo ntse jaana, bo ntse jaaka fa motho a ka bo a latlhela peo mo mmung; ₂₇mme a robale, a tsoge bosigo le motshegare, mme peo e ka mela, ya gola, ene a sa itse ka fa e golang ka teng. ₂₈Lefatshe le a ikungwisa ka losi; e re pele go tswe mogwang; foo go tswe seako, morago mabele a a tletseng mo seakong. ₂₉Mme ya re fa mabele a budule, motho a akofe a tsenye thipa, ka gobo go roba go fitlhile.”

₃₀Mme a re: “Ana re tlaa tshwantsha bogosi jwa Modimo jang? Kgotsa re tlaa bo kaya ka setshwantsho sefe? ₃₁Bo tshwana le tlhaka ya peo ya mosetara, e e a reng e jadilwe mo mmung, le fa e le potlana mo dipeong tsotlhe tse di mo lefatsheng. ₃₂Le fa go ntse jalo fa e jadilwe, e tlhoge e gole, e be e fete merogo yotlhe, e ntshe dikala tse dikgolo; go bo go tle go tle dinonyane tsa loapi, di bone go kwaya mo moriting wa sone.”

₃₃A bua lefoko nabo ka ditshwantsho di le dintsi tse di ntseng jaana, go ya ka fa ba nonofileng go le utlwa ka teng. ₃₄Mme a se ka a bua nabo fa e se ka ditshwantsho; mme e ne e tle e re fa ba le bosi, a rarabololele barutwa ba gagwe dilo tsotlhe.

₃₅Ya re ka letsatsi leo, go le maitseboa, a ba raya a re: “A re tsheleleng kwa moseja.” ₃₆Mme ba tlogela bontsi jwa batho, ba mo tsaya, a ya nabo mo mokorong fela jaaka a ntse. A bo a patilwe ke mekoro e mengwe. ₃₇Mme ga tsoga matsubutsubu a matona a phefo, mme makhubu a metsi a tlolela mo mokorong; mokoro wa ba wa rata go tlala. ₃₈Mme ene a bo a le kwa moseong ga mokoro, a robetse mo mosamong; mme ba mo tsosa, ba mo raya ba re: “Moruti, a ga o re sepe fa re nyelela?”

₃₉Mme a tsoga, a kgalemela phefo, a raya lewatle a re: “Kgaotsa, o sisibale!” Mme phefo ya khutla, ga ba ga nna tuulalo e kgolo. ₄₀Mme a ba raya a re: “Ana lo boifelang? A ga lo ise lo nne le tumelo?”

₄₁Mme ba boifa thatathata ba re: “Ana motho yo e a bo e le mang, fa e bo ne ne phefo e mo utlwa le lewatle jaana?”