MAREKO 2

₁E rile malatsi mangwe a sena go feta, a tsena gape mo Kaperenaume; mme ga utlwiwa fa a le mo gae. ₂Batho ba le bantsi ba ne ba phuthegile, ga ba ga tla ga tlhokafala fa ba emang teng, le fa e le fa mojakong, mme a bua lefoko nabo. ₃Bangwe ba tla ba lere mo go ene monna yo o bobolang bolwetse jwa teteselo, a rwelwe ke batho ba le bane. ₄E rile ka ba retelelwa ke go mo atamela ka ntlha ya bontsi jwa batho, ba tlhomesolola ntlo bolebana nae; ya re ba sena go phunya, ba folosa yo o bobolang bolwetse jwa teteselo ka bolao jo o letseng mo go jone. ₅Mme Jesu ka a bona tumelo ya bone, a raya yo o bobolang bolwetse jwa teteselo, a re: “Morwaaka, dibe tsa gago o di itshwaretswe.”

₆Mme ga bo go dutse bangwe ba bakwadi teng, ba akanya mo pelong tsa bone ba re: ₇“Monna yo o buelang jaana? O a tlhapatsa. E mang yo o ka itshwarelang dibe, fa e se a le mongwe fela, e bong Modimo?”

₈Ya re fela ka bonako, ka Jesu a lemoga mo moweng wa gagwe fa ba akanya jalo mo teng ga bone, a ba raya a re: “Ana lo akanyeletsang dilo tse mo dipelong tsa lona? ₉Mo go ka nnang bofefo ke gofe, a e ka nna go raya motho yo o bobolang bolwetse jwa teteselo, go re: ‘Dibe tsa gago o di itshwaretswe;’ kgotsa go re: ‘Tsoga, o tseye bolao jwa gago, o tsamaye’? ₁₀Mme gore lo itse fa Morwa Motho a na le thata mo lefatsheng go itshwarela dibe,” a raya yo o bobolang bolwetse jwa teteselo, a re: ₁₁“Ke a go raya, Tsoga o tseye bolao jwa gago, o ye kwa ntlong ya gago.”

₁₂Mme a tsoga, a tsaya bolao jwa gagwe fela ka bonako, a tswa fa pele ga bone botlhe; ba ba ba gakgamala botlhe, ba galaletsa Modimo ba re: “Ga re ise re ke re bone mo go ntseng jaana gope.”

₁₃A ba a tswa a ya fa lewatleng gape; mme bontsi jotlhe jwa batho jwa nna jwa ya kwa go ene, mme a ba ruta. ₁₄Mme ya re a feta, a bona Lefi morwa Alefaio a dutse fa go kgethelwang gona, mme o mo raya a re: “Ntshala morago.” Mme a nanoga a mo sala morago.

₁₅Ga dirala gore, e re a dutse a ja mo ntlong ya ga Lefi, bakgethisi ba le bantsi le baleofi ba bo ba na le Jesu le barutwa ba gagwe, gonne ba ne ba mo setse morago ka bontsi. ₁₆Mme bakwadi ba Bafarisai ba re ba bona fa a a ja le baleofi le bakgethisi, ba raya barutwa ba gagwe ba re: “O ja a a nwa le bakgethisi le baleofi.”

₁₇Ya re Jesu a utlwa a ba raya a re: “Ba ba itekanetseng ga ba dire ngaka sepe, fa e se ba ba lwalang fela; ga ke a tlela go bitsa basiami, fa e se baleofi fela.”

₁₈Barutwa ba ga Johane le Bafarisai ba bo ba ikiditse dijo; mme ba tla ba mo raya ba re: “Ana fa e bo ne ne barutwa ba ga Johane le barutwa ba Bafarisai ba ikitsa go ja, mme barutwa ba gago ba sa ikitse go ja, ke ka ntlha yang?”

₁₉Jesu a ba raya a re: “A bagwe ba ka ikitsa go ja monyadi a sa ntse a na nabo? E a re monyadi a sa ntse a na nabo, boo ba sa ka ke ba ikitsa go ja. ₂₀Mme metlha e tlaa tla e monyadi o tlaa tlosiwang mo go bone ka yone; foo ba tlaa ikitsa go ja mo motlheng oo.

₂₁“Ga go na ope yo o ka rokelelang sebata se se kweletlanyeng mo seaparong se se onetseng, ka gobo fa se se bitiela, se tlaa se garola, se seša se garole se segologolo, mme kgagogo e keketsege. ₂₂Le gone ga go na ope yo o thelang bojalwa jwa mofine jo boša mo mefalong e e onetseng; gonne bojalwa jwa mofine bo tlaa phanya mefalo, mme bojalwa jwa mofine bo senyege, mefalo le yone; mme ba tle ba thele bojalwa jwa mofine jo boša mo mefalong e meša.”

₂₃Ga dirala ya re a ralala masimo a mabele go le letsatsi la Sabata, mme barutwa ba re ba tsamaya ba simolola go roba diako tsa mabele. ₂₄Mme Bafarisai ba mo raya ba re: “Bona, e a re go le letsatsi la Sabata ba bo ba direlang se se sa letlelelwang?”

₂₅Mme a ba raya a re: “A ga lo ise lo ke lo bale gope ka fa Dafite o kileng a dira ka teng, jale ka a tlhoka, mme a bolailwe ke tlala, ene le ba o neng a na nabo? ₂₆Jaaka a ne a tsena mo ntlong ya Modimo, Abiathare e le moperesiti yo mogolo, mme a ja dinkgwe tsa tshupelo, e le tse di sa tshwanelang go jewa fa e se ke baperesiti fela, mme a ba a fa le ba o nang nabo?”

₂₇A ba raya a re: “Sabata o diretswe motho, motho ga a a direlwa Sabata; ₂₈jalo Morwa Motho ke Morena le wa Sabata.”