MATHAIO 24

₁Jesu a tswa mo tempeleng, mme a re o itsamaela fela; barutwa ba gagwe ba tla kwa go ene, go mo supetsa dikago tsa tempele.

₂Mme a ba fetola a re: “A ga lo bone dilo tsotlhe tse? Ammaaruri ke a lo raya: Ga go ketla go lesiwa lentswe lepe fa, le tlhatlhaganye le le lengwe, le le se ketlang le digwa.”

₃Mme e rile a dutse mo Thoteng ya Lotlhware, barutwa ba gagwe ba ya kwa go ene kwa thoko, ba re: “Re bolelele gore dilo tse di tlaa dirafala leng? Sesupo e tlaa nna eng sa go tla ga gago, le sa bokhutlo jwa lefatshe?”

₄Jesu a ba fetola a re: “Lo itise gore ope a se ka a lo timetsa. ₅Gonne batho ba le bantsi ba tlaa tla ka leina la me ba re: ‘Ke nna Keresete;’ mme ba tlaa timetsa batho ba le bantsi. ₆Mme lo tlaa utlwela dintwa, le medumo ya dintwa; lo bone gore lo se ka lwa kgoberega, gonne dilo tse di na le go dirafala; mme e bo e ise e nne bokhutlo. ₇Gonne morafe o tlaa tsogologela morafe, le bogosi bo tsogologele bogosi; go tlaa nna meswele, le dithoromo tsa lefatshe mo mafelong mangwe le mangwe. ₈Dilo tsotlhe tse, ke tshimologo ya botlhoko jwa pelega.

₉“Ke gone ba tlaa lo tsenyang mo dipitlaganong, ba lo bolaya, mme lo tlaa ilwa ke merafe yotlhe, ka ntlha ya leina la me. ₁₀Foo ba le bantsi ba tlaa kgopiwa, ba tlaa okana ba ilana. ₁₁Baperofeti ba le bantsi ba e seng bone ba tlaa tsoga, mme ba tlaa timetsa batho ba le bantsi. ₁₂E tlaa re ka boikepo bo tlaa bo bo ntsifetse, lorato lwa bontsi bogolo lo tlaa tsidifala. ₁₃Mme yo o itshokelang bokhutlong, ene yoo o tlaa bolokwa. ₁₄Mafoko a a Molemo a, a bogosi, a tlaa rerwa mo lefatsheng lotlhe, go nna tshupo mo merafeng yotlhe; foo ke gone bokhutlo bo tlaa tlang.

₁₅“Ke gone e tlaa reng lo bona se se makgapha a a swafatsang, se se boletsweng ke moperofeti Daniele, se eme mo felong ga boitshepo, a yo o balang a tlhaloganye. ₁₆Foo ba ba mo Jutea ba tshabele kwa dithabeng; ₁₇yo o mo godimo ga ntlo, a a se fologele go ntsha dilwana tse di mo ntlong ya gagwe. ₁₈Le ene yo o kwa mosimo, a se ka a boela go tsaya kobo ya gagwe. ₁₉A bo go tlaa bo go latlhega ba ba imana, le ba ba amusang mo metlheng eo! ₂₀Mme lo rapele gore tshabo ya lona e se ka ya nna mariga, le fa e le ka letsatsi la Sabata; ₂₁gonne go tlaa nna sepitla se segolo mo metlheng eo, se se iseng se ke se nne, e sa le ka tshimologo ya lefatshe go tla nakong eno; nnyaa, le gone go se ketla go tlhola go nna jalo gope. ₂₂Mme fa e ka bo metlha eo e se ka ya khutshwafadiwa, e ka bo ne ne fano motho ope a se nka a bolokwa; mme e tlaa re ka ntlha ya baitshenkedwi metlha eo e tlaa khutshwafadiwa.

₂₃“Foo e tlaa re fa mongwe a lo raya a re: ‘Bonang, Keresete ke yo, kgotsa, ke yole,’ lo se ka lwa dumela. ₂₄Gonne go tlaa tsoga boKeresete ba e seng bone, le baperofeti ba e seng bone, mme ba tlaa bonatsa ditshupo tse dikgolo, le dikgakgamatso; gore fa go ka nna jalo, ba timetse le ba e leng baitshenkedwi ka bosi. ₂₅Bonang, ke lo boletletse go sa le gale.

₂₆“Ke gone fa ba lo raya ba re: ‘Bonang, o kwa nageng,’ lo se ka lwa tswa. Fa ba re: ‘Bonang, o mo matlwaneng a a kwa teng,’ lo se ka lwa dumela. ₂₇Gonne jaaka logadima lo tle lo gadime kwa botlhabatsatsi, mme lo bonale fela le kwa bophirimatsatsi; go tla ga Morwa Motho go tlaa nna fela jalo.

₂₈“Gongwe le gongwe kwa setoto se leng teng, manong a tle a phuthegele teng.

₂₉“Mme gautshwane, morago ga sepitla sa metlha eo, letsatsi le tlaa fifala, kgwedi le yone ga e ketla e ntsha lesedi la yone, dinaledi di tlaa wa kwa legodimong, le dinonofo tsa magodimo di tlaa reketlisiwa. ₃₀Ke gone go tlaa bonalang sesupo sa Morwa Motho kwa legodimong. Foo ditšhaba tsotlhe tsa lefatshe di tlaa hutsafala, mme di tlaa bona Morwa Motho a tla ka maru a legodimo, ka nonofo le ka kgalalelo e kgolo. ₃₁O tlaa roma baengele ba gagwe ka tumo e kgolo ya lonaka, mme ba tlaa phutha baitshenkedwi ba gagwe kwa diphefong tsoo nne, go tswa sekhutlong sengwe sa legodimo go ya go se sengwe.

₃₂“Jaana ithuteng ka setlhare sa mofeige setshwantsho sa sone: E re fa kala ya sone e setse e le nana, e kukunya makakaba, lo bo lo itse fa selemo se atametse. ₃₃Le lona fela jalo, e tlaa re lo bona dilo tsotlhe tse, lo bo lo itse fa a le gaufi, a le fela fa mejakong. ₃₄Ammaaruri ke a lo raya: Losika lo ga lo ketla lo feta go tle go tsamaye dilo tsotlhe tse di dirafale pele. ₃₅Legodimo le tlaa feta le lefatshe, mme mafoko a me ga a ketla a feta.

₃₆“Ka ga letsatsi leo le nako eo, ga go itse ope, le fa e le baengele ba legodimo, le fa e le morwa, fa e se Rara a le esi fela. ₃₇Jaaka metlha ya ga Noa e ne e ntse, go tla ga Morwa Motho go tlaa nna fela jalo. ₃₈Gonne jaaka go ne ga nna mo metlheng eo ya pele ga morwalela, ba ne ba ja, ba nwa, ba nyala, ba newa nyalong, go tla go fitlha mo tsatsing le Noa o tsenyeng mo ntlong e e kokobalang ka lone. ₃₉Ba sa itse, morwalela wa ba wa tla wa ba tlosa botlhe; go tla ga Morwa Motho le gone go tlaa nna fela jalo. ₄₀Foo banna ba le babedi ba tlaa bo ba le mo nageng; mongwe o tlaa tsewa, yo mongwe a tlogelwe; ₄₁basadi ba le babedi ba tlaa bo ba sila; mongwe o tlaa tsewa, yo mongwe a tlogelwe.

₄₂“Ke gone disang, gonne ga lo itse letsatsi le Morena wa lona o tlaa tlang ka lone. ₄₃Mme mo lo a go itse gore fa mong wa ntlo a ka bo a itsile nako ya bosigo e legodu le tlaa tlang ka yone, o ka bo a disitse, mme o ka bo a se ka a leseletsa ntlo ya gagwe ya phunngwa. ₄₄Ke gone, le lona nnang fela lo iketleeditse, gonne Morwa Motho o tlaa tla ka nako e lo sa mo solofeleng ka yone.

₄₅“Ana, motlhanka yo o boikanngo le yo o botlhale e a bo e le mang, yo morena wa gagwe o mo tlhomileng go laola ba ntlo ya gagwe, go ba abela dijo ka dipaka tse e leng tsone? ₄₆Go sego motlhanka yo e tlaa reng morena wa gagwe a tla a mo fitlhele a ntse a dira jalo. ₄₇Ammaaruri ke a lo raya, o tlaa mo tlhoma molaodi wa dilo tsotlhe tse o nang natso. ₄₈Mme e tlaa re fa motlhanka yoo, yo o busula, a ka ithaya mo pelong ya gagwe a re: ‘Morena wa me o diegile;’ ₄₉mme a simolola go betsa batlhanka ka ene, mme a ja, a nwa le matagwa, ₅₀morena wa motlhanka yo o tlaa tla ka letsatsi le o sa mo lebeleleng ka lone, le ka nako e o sa e itseng. ₅₁Mme o tlaa mo seola mo gogolo, a ba a mo laolela bonno le baitimokanyi; go tlaa nna selelo le khuranyo ya meno teng.