Jesu o tsena mo Jerusalema ka megolokwane
1E rile ba atamela Jerusalema, ba fitlha kwa Bethefage, fa Thoteng ya Lotlhware; foo Jesu a roma barutwa ba le babedi, 2a ba raya a re: “Yang mo motsaneng o lo lebaganyeng nao, mme lo tlaa akofa lo fitlhela esela e golegilwe, e na le eselana ya yone; di gololeng, lo tle natso kwano go nna. 3Mme fa mongwe a bua sengwe le lona, lo re: ‘Morena o a di batla;’ mme o tlaa akofa a di lesa.”
4Jaana golo mo, go dirilwe, gore go dirafale se se kileng sa buiwa ke moperofeti a re: 5“Bolelelang Morwadia Sione, lo re: ‘Bona, Kgosi ya gago e tla kwa go wena, e le pelonolo, e pagame esela, le eselana, ngwana wa esela.’ ”
6Barutwa ba ya ba dira fela jaaka Jesu a ba laotse. 7Ba lere esela le eselana, ba baya diaparo tsa bone mo go tsone; mme a nna mo go tsone. 8Bogolo jwa bontsi jwa batho jwa ala diaparo tsa jone mo tseleng; ba bangwe ba kgaola dikala tsa ditlhare, ba di ala mo tseleng. 9Batho ba bantsi ba ba mo eteletseng pele, le ba ba mo setseng morago, ba duduetsa, ba re: “Hosana, Morwa Dafite; go bakwe yo o tlang ka leina la Morena; Hosana mo bogodimodimong.”
10E rile a sena go fitlha mo Jerusalema, motse otlhe wa fuduega wa re: “Yo e a bo e le mang?”
11Mme matshutitshuti a batho a re: “Yo ke ene moperofeti, Jesu yo o tswang kwa Nasaretha wa Galilea.”
Go phepafadiwa ga tempele
12Mme Jesu a tsena mo tempeleng ya Modimo, mme a leleka botlhe ba ba rekisang le ba ba rekang mo tempeleng, a pitikolola dimati tsa ba ba ananyang madi, le ditulo tsa ba ba rekisang maphoi. 13A ba raya a re: “Go kwadilwe ga twe: ‘Ntlo ya me e tlaa bidiwa Ntlo ya thapelelo’; mme lona lo e ntshitse mongobo wa dinokwane.”
14Difofu le ba ba tlhotsang ba tla kwa go ene mo tempeleng; mme a ba fodisa. 15Mme ya re baperesiti ba bagolo le bakwadi ba bona dilo tse di gakgamatsang tse o di dirang, le banyana ba duduetsa ba re: “Hosana, Morwa Dafite,” ba šakgala. 16Ba mo raya ba re: “A o a utlwa se ba se buang ba?” Jesu a ba raya a re: “Ee, a ga lo ise lo ke lo bale fa go reng: ‘O lekantse pako ka a a tswang melomong ya banyana, le ba ba anyang?’ ”
17Mme a ba tlogela, a tswa mo motseng a tswela kwa Bethania, mme a lala teng.
Go hutsiwa ga setlhare sa mofeige
18Jaana ya re go le ka moso, fa a boela kwa motseng, a tshwarwa ke tlala. 19Mme ya re a bona setlhare sa mofeige se le fa tseleng se le sosi, a ya kwa go sone, mme a se ka a fitlhela sepe mo go sone, fa e se matlhare fela; mme a se raya a re: “A go se tlhole go bonwa loungo mo go wena, go tloga fano go ya bosakhutleng.” Ka bonako fela setlhare sa mofeige sa omelelela ruri.
20Ya re barutwa ba bona, ba gakgamala ba re: “Kana setlhare sa mofeige se omeleletse ruri ka bonako jang?”
21Mme Jesu a ba fetola a re: “Ammaaruri ke a lo raya: Fa lo na le tumelo, lo sa belaele, lo tlaa dira, e seng mo go diretsweng setlhare se sa mofeige go le gosi, mme le fa lo ka raya thaba e, lwa re: ‘Manologa, o thabuegele mo lewatleng!’ Go tlaa dirala. 22Le gone dilo tsotlhe tse lo di lopang mo thapelong, ka go dumela, lo tlaa di amogela.”
Go bodiwa ka ga thata ya ga Jesu
23E rile a sena go tsena mo tempeleng, baperesiti ba bagolo le bagolwane ba tla kwa go ene ka a ruta, ba re: “Ana dilo tse, o di dira ka taolo efe? E mang yo o go neileng taolo e?”
24Jesu a ba fetola a re: “Le nna ke tlaa lo botsa lefoko lengwe, le e tlaa reng fa lo ka le mpolelela, le nna ke lo bolelele taolo e ke dirang dilo tse ka yone. 25Ana kolobetso ya ga Johane e ne e tswa kae? A e ne e tswa legodimong kgotsa mo bathong?” Mme ba tseisanya kgang, ba re: “E tlaa re fa re re: ‘E tswa legodimong,’ a re reye a re: ‘Lo ne lo sa mo dumeleleng?’ 26Fa re re: ‘E tswa mo bathong,’ re bo re boifa batho; gonne botlhe ba kaya Johane fa e le moperofeti.” 27Mme ba fetola Jesu, ba re: “Ga re itse.” Le ene a ba raya a re: “Le nna ga ke lo bolelele taolo e ke dirang dilo tse ka yone.
Setshwantsho sa barwa ba babedi
28“Lo gopolang? Monna mongwe o ne a na le bomorwawe ba le babedi. Mme a tla mo go wa ntlha a re: ‘Morwaaka, ya o dire mo tshimong ya me ya mafine gompieno.’ 29Mme a mo fetola a re: ‘Ke a gana;’ mme morago a ikwatlhaya, a ya. 30Mme a tla mo go wa bobedi, a bua jalo. Ene a fetola a re: ‘Ke a ya morena;’ mme a se ka a ya. 31Ke ofe wa babedi yo o dirileng go rata ga rraagwe?” Ba re: “Wa ntlha.” Jesu a ba raya a re: “Ammaaruri ke a lo raya, Bakgethisi le diaka ba a lo feta, ba tsena pele ga lona mo bogosing jwa legodimo. 32Gonne Johane o ne a tla kwa go lona ka tsela ya tshiamo; mme ga lo a ka lwa mo dumela; mme bakgethisi le diaka bone ba mo dumela; mme lona ga e a ka ya re lo bona, le fa e le go sala lo ikwatlhaya morago, gore lo mo dumele, ga lo a ka lwa go dira.
Setshwantsho sa tshimo ya mofine le badiri
33“Utlwang setshwantsho se sengwe: Go kile ga ne go le mong wa ntlo, a tlhomile tshimo ya mafine, a e agelela ka logora, a epa bogatelo jwa bojalwa jwa mofine mo go yone, a aga sefata sa baleti, mme tshimo a e neela badira masimo ba ba e thapang ka tuelo; mme a etela kwa lefatsheng le sele. 34E rile motlha wa maungo o atamela, a roma batlhanka ba gagwe kwa go bone badira masimo, gore ba ye go tsaya maungo a gagwe. 35Mme badira masimo ba tshwara batlhanka ba gagwe, ba betsa mongwe, ba bolaya yo mongwe, yo mongwe ba mo kgobotletsa ka maje. 36A ba a tloga a roma batlhanka ba bangwe ba le bantsi bogolo go ba pele; le bone ba ba direla fela jalo. 37Kwa morago a roma morwawe kwa go bone a re: ‘Ba tlaa sisimoga morwaake.’ 38Ya re badira masimo ba bona morwawe, ba raana ba re: ‘Yo, ke moruaboswa; ntlong, re mmolayeng, re gape boswa jwa gagwe.’ 39Mme ba mo tshwara, ba mo latlhela kwa ntle ga tshimo ya mafine, ba mmolaya.
40“Ke gone e tlaa reng morena wa tshimo ya mafine a tla, o tlaa ba dirang badira masimo bao?”
41Ba mo raya ba re: “Batho bao ba ba se nang pelo, o tlaa ba senya ka botlhokapelo, mme o tlaa neela ba sele tshimo ya gagwe, ba ba tlaa mo nayang maungo mo metlheng ya one.”
42Jesu a ba raya a re: “A go lo ise lo ke lo bale mo dikwalong, fa go tweng:
“ ‘Lentswe le baagi ba le ganneng,
e bile ke lone le le dirilweng
lentswe la kgokgotsho.
Golo mo go dirilwe ke Morena,
mme go a gakgamatsa mo matlhong
a rona’?
43“Ke gone ke lo raya ke re: Bogosi jwa Modimo lo tlaa bo tlosediwa, bo tlaa newa morafe o o tla ntshang maungo a lona. 44Yo o welang mo lentsweng le, o tlaa thubaganngwa; mme yo le mo welang, le tlaa mo phatlalatsa jaaka lorole.”
45Ya re baperesiti le Bafarisai ba utlwa ditshwantsho tsa gagwe ba lemoga fa a bua ka ga bone. 46Mme ya re ba leka go mo tshwara, ba boifa batho, gonne ba mo kaya fa e le moperofeti.
