MATHAIO 19

₁Ga dirala e rile Jesu a sena go wetsa mafoko a, a huduga kwa Galilea, a tla mo melelwaneng ya Jutea, kwa moseja ga Joretane; ₂mme batho ba ba matshutitshuti a magolo ba mo sala morago; mme a ba fodisa teng.

₃Ga tla Bafarisai kwa go ene, ba mo lalela, ba re: “A go letleletswe monna go tlhala mosadi wa gagwe ka ntlha ya sengwe le sengwe?”

₄Mme a ba fetola a re: “A ga lo ise lo ke lo bale fa yo o ba dirileng mo tshimologong a ba dirile nona le tshadi, ₅a ba a re: ‘Ke gone ka moo, motho o tlaa tlogelang rraagwe le mmaagwe, a ngaparela mosadi wa gagwe; mme bobedi jo bo tlaa nna nama e le nngwe fela?’ ₆Jalo ba bo ba sa tlhole ba le babedi, mme ke nama e le nngwe fela. Ke gone se se kopantsweng ke Modimo, a se se kgaoganngwe ke motho.”

₇Ba mo raya ba re: “Mme e le foo Moše a ba a reng, fa a laola gore go ntshiwe lokwalo lwa tlhalo, mme go tlhalwe mosadi?”

₈A ba raya a re: “Moše a lo leseletsa go tlhala basadi ba lona ka ntlha ya bothata jwa dipelo tsa lona; mme go tswa kwa tshimologong ga go a nna jalo. ₉Le nna ke lo raya ke re: Le fa e le mang yo o tlaa tlhalang mosadi wa gagwe, fa e se ka ntlha ya boaka, mme a nyala yo mongwe, o dira boaka; le yo o mo nyalang a sena go tlhalwa, o dira boaka.”

₁₀Barutwa ba mo raya ba re: “Fa monna a ntse jalo le mosadi wa gagwe, go bo go se molemo go nyala.”

₁₁Mme a ba raya a re: “Batho botlhe ga ba ka ke ba tshola lefoko le, fa e se ba ba go neetsweng. ₁₂Gonne go na le banna ba baopa, ba ba sa leng ba tsalwa jalo, ba sa tswa sebopelong sa bommaabo; go bile go na le baopa ba ba opafaditsweng ke batho; mme go na le baopa ba ba ikopafaditseng, ka ntlha ya bogosi jwa legodimo. Yo o nonofileng go go tshola, a a go tshole.”

₁₃Foo ga tlisiwa banyana kwa go ene, gore a ba beye diatla, mme a rapele; mme barutwa ba ba kgalemela. ₁₄Mme Jesu a re: “Lesang banyana, se ba itseng go tla kwa go nna, gonne bogosi jwa legodimo ke jwa ba ba ntseng jaolo.”

₁₅Mme a ba baya diatla; mme a tloga a tswa teng.

₁₆Mme bonang, mongwe a tla kwa go ene a re: “Moruti, ana, ke direng se se molemo, gore ke bone botshelo jo bo sa khutleng?”

₁₇Mme a mo raya a re: “O mpoletsang ka ga se se molemo? Go mongwe fela yo o molemo; mme fa o rata go tsena mo botshelong, tshegetsa ditaolo.”

₁₈A mo raya a re: “Dife?” Jesu a re: “O se ka wa bolaya motho, o se ka wa dira boaka, o se ka wa utswa, o se ka wa supa maaka; ₁₉tlotla rraago le mmaago, gape, o rate wa gaeno jaaka o ithata.”

₂₀Mme lekau la mo raya la re: “Dilo tsolthe tse ke di tlhokometse; ke sa tlhoka eng?”

₂₁Jesu a mo raya a re: “Fa o rata go itekanela, ya o rekise tse o nang natso, o abele bahumanegi, mme o tlaa dirana le khumo kwa legodimong; mme o tle o ntshale morago.”

₂₂Ya re lekau le utlwa lefoko leo, la tsamaya ka bohutsana; gonne e ne e le motho yo o dithuo dikgolo.

₂₃Jesu a raya barutwa ba gagwe a re: “Ammaaruri ke a lo raya: Go tlaa thatafalela mohumi go tsena mo bogosing jwa legodimo. ₂₄Ke bile ke lo raya ke re: Go ka nna bofefo kamela go tsena ka letshofa la lomao, bogolo go mohumi go tsena mo bogosing jwa Modimo.”

₂₅Ya re barutwa ba utlwa, ba gakgamala thata, ba re: “Fa e le jalo go a bo go ka bolokwa mang?”

₂₆Mme Jesu a ba leba, a ba raya a re: “Mo bathong golo mo, go retetse; mme mo Modimong dilo tsotlhe di ka dirafala.”

₂₇Foo Petere a mo fetola a re: “Bona, rona re tlogetse gotlhe, mme re go setse morago; mme ka re, rona re a bo re tlaa bona eng?”

₂₈Jesu a ba raya a re: “Ammaaruri ke a lo raya ka re: Lona ba lo ntshetseng morago, e tlaa re mo Bošafatsong jwa dilo tsotlhe, fa Morwa Motho a dula mo setulong sa gagwe sa bogosi sa kgalalelo, le lona lo tlaa dula mo ditulong tsa bogosi di le 12, lo atlhola ditso tse 12 tsa Iseraele. ₂₉Mme mongwe le mongwe yo o tlogetseng matlo, le fa e le bomorwa rraagwe, le fa e le bokgaitsadie, le fa e le rraagwe, le fa e le mmaagwe, (le fa e le mosadi,) le fa e le bana, le fa e le masimo, ka ntlha ya leina la me, o tlaa amogela galekgolo, mme o tlaa rua botshelo jo bo sa khutleng. ₃₀Ba le bantsi ba tlaa nna ba morago, ba e neng e le ba pele; mme ba e neng e le ba pele, ba tlaa nna ba morago.