MATHAIO 14

₁E rile ka lobaka loo molaodi Herote a utlwela tumedi ka ga Jesu. ₂Mme a raya batlhanka ba gagwe a re: “Yo ke Johane Mokolobetsi; o tsogile mo baswing; ke gone ka fa dinonofo tse, di dirang mo go ene ka teng.”

₃Gonne Herote o ne a tshwere Johane, a mo golega, a mo tsenya mo ntlong ya kgolegelo ka ntlha ya ga Herodiase, mosadi wa ga Filipo morwa rraagwe. ₄Gonne Johane o ne a mo reile a re: “Ga o a letlelelwa go nna nae.” ₅Mme a eletsa go mmolaya, mme a boifa batho, ka ba ne ba mo kaya fa e le moperofeti.

₆E rile go fitlha letsatsi la botsalo jwa ga Herote, morwadia Herodiase a bina mo modirong, mme a kgatlha Herote. ₇Foo a mo solofetsa ka ikano a re, se o tlaa se mo lopang o tlaa se mo naya fela.

₈Ene ka a laetswe ke mmaagwe a re: “Nnaya fela fano tlhogo ya ga Johane Mokolobetsi ka mogotšana jaana.”

₉Kgosi ya hutsafala; le fa go ntse jalo ya laola gore a e newe, ka ntlha ya maikano a yone, le ka ntlha ya ba ba jang nayo. ₁₀Mme a roma batho, ba ya ba kgaola Johane tlhogo mo ntlong ya kgolegelo. ₁₁Tlhogo ya gagwe ya leriwe ka mogotšana, ya newa morweetsana; ene a e isa kwa go mmaagwe. ₁₂Mme barutwana ba gagwe ba ya ba tsaya setoto, ba mo fitlha; mme ba ya ba bolelela Jesu.

₁₃Jaana e rile Jesu a utlwa, a tloga teng ka mokoro a ngongwaelela kwa thoko, felong fa go se nang batho; mme batho ba ba matshutitshuti ba re ba utlwa, ba mo latela ba tsamaya ka dinao, ba tswa mo metseng. ₁₄A tswa, a bona bontsintsi jo bogolo jwa batho mme a ba tlhomogela pelo, a fodisa balwetse ba bone.

₁₅Ya re go nna maitseboa barutwa ba gagwe ba tla mo go ene ba re: “Golo fa ke naga fela, le lobaka lo setse lo fetile; phatlalatsa batho, gore ba ye mo metsaneng go ithekela dijo.”

₁₆Jesu a ba raya a re: “Ga ba na go tsamaya; ba feng ba je.”

₁₇Ba mo raya ba re: “Fano ga re na sepe fa e se dinkgwe di le tlhano, le ditlhapi di le pedi fela.”

₁₈A re: “Di lereng kwano go nna.” ₁₉Mme a laola ba ba matshutitshuti go nna mo bojannyeng, a tsaya dinkgwe tse tlhano le ditlhapi tse pedi, a lelalela legodimong, a di segofatsa, a di ngathoganya, mme dinkgwe a di neela barutwa, barutwa ba di abela batho. ₂₀Mme ba ja botlhe ba kgora; mme ba sela dikabetla tse di setseng, ya nna diroto tse di tletseng di le 12. ₂₁Ba ba jeleng e ka ne e le banna ba le 5 000, go sa balwe basadi le banyana.

₂₂A akofa a laola barutwa go tsena mo mokorong, ba mo etelelela pele kwa moseja, ene a sa ntse a phatlalatsa batho. ₂₃Ya re a sena go phatlalatsa batho, a tlhatlogela mo thabeng kwa thoko, a ya go rapela; mme ya re go nna maabanyane a bo a le teng a le esi. ₂₄Mokoro one wa bo o setse o le fa gare ga lewatle, o kgarakgatshiwa ke makhubu a metsi; gonne ba tlhabaganye le phefo.

₂₅Ya re bosigo, ka lobaka lwa tebelo ya bone, a ya kwa go bone a tsamaya ka dinao mo godimo ga lewatle. ₂₆Barutwa ba re ba mmona a tsamaya ka dinao mo godimo ga lewatle, ba fuduega ba re: “Ke sedimo;” mme ba goisiwa ke poifo.

₂₇Mme Jesu a akofa a bua nabo a re: “Nametsegang; ke nna; se boifeng.”

₂₈Petere a mo fetola a re: “Morena, fa e le wena, nthaya, o re ke ye koo go wena mo godimo ga metsi.”

₂₉Mme a re: “Ntlo.” Petere a fologa mo mokorong, a tsamaya mo godimo ga metsi, a re o ya kwa go Jesu. ₃₀Mme ya re a utlwa phefo e le thata, a boifa; mme ya re a simolola go nwela a goa a re: “Morena, mpoloka.”

₃₁Ka bofefo Jesu a otlolola letsogo, a mo tshwara, a mo raya a re: “Ao! Wena yo o tumelo e e potlana, o ne o belaelelang?”

₃₂Ya re ba sena go pagama mo mokorong phefo ya kokobela. ₃₃Mme ba ba mo mokorong ba mo obamela ba re: “Ammaaruri o Morena Modimo.”

₃₄E rile ba sena go kgabaganya, ba fitlha mo lefatsheng la Genesarete. ₃₅Ya re batho ba felo foo ba mo lemoga, ba roma mo tikologong yotlhe ya lefatshe leo, ba tlisa kwa go ene botlhe ba ba lwalang. ₃₆Ba mo rapela, gore a mme ba ke ba ame le fa e ka bo e le makantsa a seaparo sa gagwe; mme ba ba mo amileng ba fodisiwa botlhe fela.