Barongwa ba ba tswang kwa go Mokolobetsi
1Ga dirala, e rile Jesu a sena go wetsa go laya barutwa ba gagwe ba ba 12, a tloga a tswa gone a ya go ruta le go rera mo metseng ya bone.
2Jaana e rile Johane a le mo ntlong ya kgolegelo, mme a utlwa ditiro tsa ga Keresete, a roma barutwa ba gagwe, 3a mo raya a re: “A ke wena yo o tlang kgotsa a ke re lebelele o sela?”
4Mme Jesu a ba fetola a re: “Tsamayang, lo ye lo bolelele Johane dilo tse lo di utlwang, le tse lo di bonang: 5Difofu di a bona, batlhotsi ba a tsamaya, balepero ba a ntlafadiwa, babosusu ba a utlwa, baswi ba a tsosiwa, le bahumanegi ba rerelwa Mafoko a a Molemo. 6Go sego yo o sa fitlheleng sepe mo go nna se se mo kgopisang.”
7Ya re bao ba tsamaya, Jesu a simolola go bua le matshutitshuti a batho ka ga Johane a re: “Kana lo ne lo tswela kwa nageng lo ya go bona eng? A e ne e le lotlhaka lo lo tshikinngwang ke phefo? 8Mme lo ne lo tswa lo ya go bona eng? A e ne e le monna yo o apereng diaparo tse di boleta? Bonang, ba ba apereng tse di boleta ba mo matlong a dikgosi. 9Mme lo ne lo tswelang? A e ne e le go bona moperofeti? Ee, ke a lo raya, e bile e le yo mogolo bogolo go feta moperofeti. 10Yo ke ene go kwadilweng ka ga gagwe ga twe: ‘Bonang, ke roma morongwa wa me fa pele ga sefatlhogo sa gago, yo o tlaa go baakanyetsang tsela ya gago.’ 11Ammaaruri ke a lo raya ka re: Mo go ba ba tsetsweng ke basadi ga go a tsoga ope yo mogolo go feta Johane Mokolobetsi; le fa go ntse jalo, yo o leng mmotlana mo bogosing jwa legodimo o mogolo bogolo go ene. 12Mme e sa le ka lobaka lwa ga Johane Mokolobetsi le gompieno, bogosi jwa legodimo bo ntse bo tlhaselwa, mme batlhasedi ba bo gapa ka thata. 13Gonne baperofeti botlhe le molao, ba ne ba ntse ba ruta, Johane a ba a tsamaya a tla. 14Mme fa lo rata go amogela se, ka re: Ke ene Elija yo o bileng a tla. 15Yo o nang le ditsebe go utlwa a a utlwe.
16“Ke tlaa tshwantsha losika lo ka eng? Lo tshwana le banyana ba ba dutseng mo mananeng a motse, ba bitsanya le bankana ba bone ba re: 17‘Re ne ra lo leletsa ditlhaka, mme ga lo a ka lwa bina; ra kurueletsa godimo, mme ga lo a ka lwa lela.’ 18Gonne Johane o tsile a sa je, a sa nwe, mme ba re: ‘O na le mowa o o maswe.’ 19Morwa Motho a tla a ja, a nwa, mme ba re: ‘Bonang, motho yo tshikhiri, monwi wa bojalwa jwa mofine, tsala ya bakgethisi le ya baleofi.’ Mme botlhale bo atlholelwa ke ditiro tsa gagwe.”
Metse e e sa ikwatlhaeng
20Foo a simolola go kgoba metse e bontsi jwa ditiro tsa gagwe tsa nonofo di dirilweng mo go yone, ka e se ka ya ikwatlhaya a re: 21“A bo go latlhega wena Korasine! Go latlhega wena Bethesaita! Gonne fa ditiro tsa nonofo tse di dirilweng mo go lona di ka bo di dirilwe mo Ture le Sitone, ba ka bo ba sa bolo go ikwatlhaya, ba apere letsela la kgetse le melora. 22Le fa go ntse jalo ke a lo raya: E tlaa re mo motlheng wa tsheko, go tlaa nna botoka ka ga metse ya Ture le Sitone, bogolo go lona. 23Mme wena, Kaperenaume, a o tlaa golediwa kwa legodimong? O tlaa fologela mo Bobipong; gonne fa ditiro tsa nonofo tse di dirilweng mo go wena di ka bo di dirilwe mo Sotoma, o ka bo o sa ntse o eme le gompieno. 24Le fa go ntse jalo, ke a lo raya: E tlaa re mo motlheng wa tsheko, go tlaa nna botoka ka ga lefatshe la Sotoma, bogolo go wena.”
Tlang kwa go nna mme lo itapolose
25E rile ka lobaka loo Jesu a bua a re: “Ke a go leboga Rara, Morena wa legodimo le lefatshe, ka dilo tse o di lobetse ba ba botlhale le ba ba tlhaloganyang, mme wa di senolela banyana ba bannye. 26Ee, Rra; gonne go ne go le kgatlhego gore go nne jalo mo matlhong a gago.
27“Dilo tsotlhe ke di neetswe ke Rre; mme ga go ope yo o itseng Morwa fa e se Rara, le gone ga go ope yo o itseng Rara, fa e se Morwa le mongwe le mongwe yo Morwa o ratang go mo mo senolela.
28“Tlang kwano go nna lotlhe ba lo lapileng, ba lo imelwang, mme ke tlaa lo lapolosa. 29Ipeleseng jokwe ya me, lo ithute ga me; gonne ke bonolo le boingotlo mo pelong, mme lo tlaa bonela mewa ya lona tapologo. 30Gonne jokwe ya me e bonolo, le morwalo wa me o motlhofo.”
