LUKE 7

₁Jaana e rile a sena go swetsa mafoko otlhe a gagwe mo ditsebeng tsa batho, a tsena mo Kaperenaume. ₂Ga bo go le molaodi wa mophato, a na le motlhanka, mme a mo rata thata, a bo a lwala a le gaufi le go swa. ₃O rile a utlwa ka ga Jesu, a roma bagolwane ba Bajuta kwa go ene, ba mo rapela gore a tle go fodisa motlhanka wa gagwe. ₄Bone, ya re ba fitlha kwa go Jesu, ba mo rapela thata ba re: “Ke motho yo o tshwanetseng fa o ka mo direla jalo; ₅gonne o rata morafe wa rona, e bile ene ka esi o re agetse ntlo ya thuto.”

₆Foo Jesu a ya nabo. Ya re jaana a setse a se kgakala le ntlo, molaodi wa mophato a roma ditsala kwa go ene, tsa ya go mo raya tsa re: “Morena, o se ka wa itapisa, ka gobo ga ke a tshwanela fa o ka tsena kwano tlase ga ditlhomeso tsa me. ₇Ke gone ke ikaileng le gone fa ke sa tshwanela go ya koo go wena; mme bua lefoko fela, mme motlhanka wa me o tlaa fodisiwa. ₈Gonne le nna ke monna yo ke beilweng mo taolong, ke bile ke na le batlhabani ba mo taolong ya me; mme ke reye mongwe ke re: ‘Tsamaya,’ mme a tsamaya; ke reye yo mongwe ke re: ‘Ntlo,’ mme a tle; le motlhanka wa me: ‘Dira se,’ mme a se dire.”

₉Jesu ya re a utlwa dilo tse a mo gakgamalela, mme a retologa a raya batho ba bantsi ba ba mo setseng morago a re: “Ke a lo raya, ga ke ise nke ke bone tumelo e kgolo jaana, nnyaa, le fa e le mo Iseraele.”

₁₀Ba ba romilweng, ya re ba boela kwa ntlong, ba fitlhela motlhanka (yo o neng a ntse a lwala) a fodile.

₁₁Ga dirala ya re ka moso, a ya kwa motseng o o bidiwang, Naine; le barutwa ba gagwe ba le bantsi ba ya nae, le bontsi jo bogolo jwa batho. ₁₂Jaana ya re a atamela kgoro ya motse, bonang, ga bo go rwelwe moswi, a isiwa kwa ntle; ya bo e le morwa mmaagwe yo o esi, mme ene mmaagwe ya bo e le motlholagadi; le batho ba le bantsi ba motse ba bo ba na le mosadi. ₁₃Ya re Morena a mmona, a mo tlhomogela pelo, a mo raya a re: “Se lele.” ₁₄Mme a atamela a ama setsholo; ba ba mo rweleng ba ema. Mme a re: “Lekau, ke a go raya, tsoga.” ₁₅Yo o neng a sule a rapamologa, mme a simolola go bua. Mme a mo neela mmaagwe.

₁₆Poifo ya ba tshwara botlhe; mme ba galaletsa Modimo ba re: “Go tsogile moperofeti yo mogolo gare ga rona; Modimo o lekotse batho ba one.”

₁₇Tumedi e ka ga gagwe, ya tswela mo lefatsheng lotlhe la Jutea, le mo tikologong yotlhe ya teng.

₁₈Barutwa ba ga Johane ba mmolelela dilo tsotlhe tse. ₁₉Johane a ipiletsa barutwa ba gagwe ba le babedi a ba roma kwa go Jesu, ba ya go re: “A ke wena yo o tlang, kgotsa a re lebelele o sele?”

₂₀Ya re banna bao ba sena go fitlha kwa go ene ba re: “Re romilwe ke Johane Mokolobetsi kwano go wena, a re: ‘A ke wena yo o tlang, kgotsa a re lebelele o sele?’ ”

₂₁Ya re e sa ntse e le nako eo a fodisa batho ba le bantsi malwetse le dipobolo, le mewa e e bosula; le difofu di le dintsi a di naya go bona. ₂₂Jesu a bua, a ba raya a re: “Tsamayang, lo ye lo bolelele Johane dilo tse lo di bonyeng, le tse lo di utlwileng, lo re: Difofu di a bona, batlhotsi ba a tsamaya, balepero ba a ntlafadiwa, basusu ba a utlwa, baswi ba a tsosiwa, bahumanegi ba rerelwa Mafoko a a Molemo. ₂₃Mme go sego ene yo o se ketlang a fitlhela sekgopi sepe mo go nna.”

₂₄E rile barongwa ba ga Johane ba sena go tsamaya, a simolola go bua le matshutitshuti a batho ka ga Johane a re: “Kana lo ne lo tswela kwa nageng lo ya go bonang? A lo ne lo solofetse go bona lotlhaka lo lo tshikinngwang ke phefo ne? ₂₅Kana lo ne lo tswa lo ya go bonang? A lo ne lo re, monna yo o apereng diaparo tse di boleta? Bonang, ba ba apereng dietsela, le ba ba tshelang mo letlepung, ba nna mo malwapeng a dikgosi. ₂₆Mme kana lo ne lo tswa lo ya go bonang? A lo ne lo re moperofeti? Ee, ke a lo raya e bile ke yo mogolo go feta moperofeti. ₂₇Yo ke ene go kwadilweng ka ga gagwe ga twe: ‘Bona, ke roma morongwa wa me fa pele ga sefatlhogo sa gago, yo o tlaa baakanyang tsela ya gago fa pele ga gago.’ ₂₈Ke a lo raya ka re, mo go ba ba tsetsweng ke basadi ga go na moperofeti ope yo o mogolo go feta Johane Mokolobetsi; mme ene yo o leng mmotlana mo bogosing jwa Modimo o mogolo go feta ene.”

₂₉Batho botlhe ba mo utlwa, le bakgethisi, ba atlholela Modimo tshiamo, ka ba kolobeditswe ka kolobetso ya ga Johane. ₃₀Mme Bafarisai le ba molao ba tsupuetsa boikaelelo jwa Modimo ka ga bone, ka ba se ka ba kolobediwa ke ene.

₃₁Morena a ba a re: “Ana batho ba losika lo, ke tlaa ba tshwantsha ka eng? Mme ba tshwana le eng? ₃₂Ba tshwana le banyana ba ba dutseng mo mananeng a motse, ba bitsanya ba re: ‘Re lo leleditse diletso, mme ga lo a ka lwa bina; ra kuruetsa, mme ga lo a ka lwa lela.’ ₃₃Gonne Johane Mokolobetsi o tsile, a sa je senkgwe, a sa nwe bojalwa jwa mofine; mme lwa re: ‘O na le mowa o o bosula.’ ₃₄Morwa Motho o tsile, a ja, a nwa; mme lwa re: ‘Bonang motho yo o tshikiri, le monwa bojalwa, tsala ya bakgethisi le baleofi!’ ₃₅Mme botlhale bo atlholetswe tshiamo ke bana botlhe ba jone.”

₃₆Mongwe wa Bafarisai a mo lopa gore a ye go ja nae. Mme a tsena mo ntlong ya Mofarisai, a dula a ja. ₃₇Bonang, mosadi mongwe yo o mo motseng, e le moleofi, ya re a tlhaloganya fa Jesu a dutse a ja mo ntlong ya Mofarisai, a lere setlolo ka sedibelwana sa alebasetara. ₃₈A ema ka fa morago, fa dinaong tsa gagwe, a lela, mme a simolola go kolobetsa dinao tsa gagwe ka dikeledi, a di phimola ka moriri wa tlhogo ya gagwe, a ba a mo atla dinao, a di tlotsa setlolo. ₃₉Jaana ya re Mofarisai yo o mmiditseng a bona jalo, a ithaya a re: “Monna yo, fa e ka bo e le moperofeti, o ka bo a lemogile mosadi yo o mo amang gore ke mang, le ka fa o ntseng ka teng, ka e le moleofi.”

₄₀Mme Jesu a mo fetola a re: “Simone, ke na le sengwe se nka se buang nao.” Ene a re: “Moruti, a ko o bue.”

₄₁“Ga bo go le motho yo go tsewang dilo molato mo go ene, a bo a na le batho ba le babedi ba ba molato nae; mongwe a le molato diponto di le 50, yo mongwe a le molato diponto di le tlhano fela. ₄₂E rile ka ba se na sepe go lefa ka sone, a ba itshwarela boo babedi. Ka re, mpolelela gore yo o tlaa mo ratang bogolo mo go bone ke ofe?”

₄₃Simone a mo fetola a re: “Ke a gopola e tlaa nna ene yo o mo itshwaretseng go le gogolo.” A mo raya a re: “O gopotse sentle.” ₄₄A retologela mosadi, a raya Simone a re: “A o bona mosadi yo? Ke tsile mo ntlong ya gago, ga o a ka wa nnaya metsi a dinao; mme yo o nkolobeditse dinao ka dikeledi, a di phimola ka moriri wa gagwe. ₄₅Ga o a ka wa nkatla; mme mosadi yo, ke sa le ke tsena, ga a ise a ke a khutle go nkatla dinao. ₄₆Tlhogo ya me ga o a ka wa e tlotsa lookwane; mme mosadi yo, o ntloditse dinao ka setlolo. ₄₇Ke gone ke go rayang ke re, dibe tsa gagwe tse di leng dintsi o di itshwaretswe, gonne o ratile go le gogolo; mme yo o itshwaretsweng go le gobotlana, o rata go le gobotlana.”

₄₈A raya mosadi a re: “Dibe tsa gago o di itshwaretswe.”

₄₉Ba ba dutseng nae ba ja, ba simolola go ithaya ba re: “E mang yo, yo o itshwarelang dibe le gone?”

₅₀Mme a raya mosadi a re: “Tumelo ya gago e go bolokile; tsamaya ka kagiso.”